ମେଲବର୍ଣ୍ଣ :ମେଲବର୍ଣ୍ଣରେ ବର୍ଷା ଜାରି ରହିଛି । ପୂର୍ବରୁ ଆଫଗାନିସ୍ତାନ ବନାମ ନ୍ୟୁଜିଲାଣ୍ଡ ମ୍ୟାଚ ବାତିଲ ହୋଇଥିଲା । ଏବେ ଅଷ୍ଟ୍ରେଲିଆ ଏବଂ ଇଂଲଣ୍ଡ ମ୍ୟାଚ ମଧ୍ୟ ବାତିଲ ହୋଇଛି । ତେବେ ଏହି ଚାରୋଟି ଟିମକୁ ୧ ପଏଣ୍ଟରେ ସନ୍ତୁଷ୍ଟ ହେବାକୁ ପଡିଛି । ନିର୍ଦ୍ଧାରିତ ସମୟ ଅନୁସାରେ ଖେଳ ଆରମ୍ଭ ହେବାର ଯୋଜନା ରହିଥିଲା । ହେଲେ ମେଲବର୍ଣ୍ଣରେ ବର୍ଷା ଜାରି ରହିଥିବା କାରଣରୁ କୌଣସି ମ୍ୟାଚରେ ଟସ ପଡି ପାରି ନଥିଲା । ଯାହା ଫଳରେ ମ୍ୟାଚକୁ ପରବର୍ତ୍ତୀ ସମୟରେ ବାତିଲ କରିଦିଆଯାଇଛି । ଗ୍ରୁପ ୧ କୁ ଗ୍ରୁପ ଅଫ ଡେଥ କୁହାଯାଉଛି । ହେଲେ ବର୍ଷା ପାଇଁ ମ୍ୟାଚର ପରିଣାମ ଓଲଟ ପାଲଟ ହେଉଛି । ଏହାର ପ୍ରଭାବ ସିଧାସଳଖ ପଏଣ୍ଟ ଟେବୁଲ ଉପରେ ପଡୁଛି । କାରଣ ପଏଣ୍ଟ ଟେବୁଲରେ ରହିଥିବା ଶୀର୍ଷ ଦୁଇଟି ଦଳ ସେମିଫାଇନାଲ ଖେଳିବା ପାଇଁ ଯୋଗ୍ୟତା ହାସଲ କରିବେ ।
ସୁପର ୧୨ ପର୍ଯ୍ୟାୟରେ ଅଷ୍ଟ୍ରେଲିଆ ଏବଂ ଇଂଲଣ୍ଡ ଏପର୍ଯ୍ୟନ୍ତ ତିନୋଟି ମ୍ୟାଚ ଖେଳି ୩ ପଏଣ୍ଟ ପାଇଛି । ଉଭୟ ଦଳ ଗୋଟିଏ ମ୍ୟାଚ ଜିତି ଥିବା ବେଳେ ଗୋଟିଏ ମ୍ୟାଚରେ ପରାଜୟ ବରଣ କରିଥିଲେ । ଏବଂ ଆଜିର ମ୍ୟାଚ ବାତିଲ ହୋଇଥିବା ସହିତ ଉଭୟଙ୍କୁ ଗୋଟିଏ ଲେଖାଏଁ ପଏଣ୍ଟ ମିଳିଛି । ଉଭୟ ଇଲିଂସ ଟିମ ଏବଂ କଙ୍ଗାରୁ ଦଳ ଗ୍ରୁପ ୧ ପଏଣ୍ଟ ଟେବୁଲରେ ତିନି ପଏଣ୍ଟ ଲେଖାଏଁ ପାଇଛନ୍ତି । ଡିଫେଣ୍ଡିଂ ଚମ୍ପିଆନ ତଥା ଆୟୋଜକ ଅଷ୍ଟ୍ରେଲିଆ ପ୍ରଥମ ମ୍ୟାଚରେ ନ୍ୟୁଜିଲାଣ୍ଡଠାରୁ ପରାସ୍ତ ହୋଇଥିଲା । ଏହାପରେ ଦ୍ବିତୀୟ ମ୍ୟାଚରେ ଶ୍ରୀଲଙ୍କାକୁ ପରାସ୍ତ କରି ପଏଣ୍ଟ ଖାତା ଖୋଲିଥିଲା । ଏବଂ ଆଜିର ମ୍ୟାଚ ଇଂଲଣ୍ଡ ସହିତ ବାତିଲ ହୋଇଛି । ସେପଟେ ଇଂଲଣ୍ଡ ପ୍ରଥମ ମ୍ୟାଚରେ ଆଫଗାନିସ୍ତାନକୁ ହରାଇ ଟି୨୦ ବିଶ୍ବକପରେ ବିଜୟ ଅଭିଯାନ ଆରମ୍ଭ କରିଥିଲା । ଦ୍ବିତୀୟ ମ୍ୟାଚରେ DLS ମେଥଡ ଅନୁଯାୟୀ ଆୟାରଲାଣ୍ଡଠାରୁ ପରାସ୍ତ ହୋଇଥିଲା । ଏବଂ ଆଜିର ମ୍ୟାଚ ଅଷ୍ଟ୍ରେଲିଆ ସହିତ ବାତିଲ ହୋଇଛି ।