ପର୍ଥ: ଟସ୍ ଜିତି ଭାରତର ବ୍ୟାଟିଂ ନିଷ୍ପତ୍ତି । T20 ବିଶ୍ବକପ ସୁପର ୧୨ ପର୍ଯ୍ୟାୟରେ ଆଜି ଭାରତ ବନାମ ଦକ୍ଷିଣ ଆଫ୍ରିକା ମ୍ୟାଚ ଖେଳାଯାଉଛି । ଭାରତ ଟସ ଜିତି ଅଧିନାୟକ ରୋହିତ ଶର୍ମା ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଛନ୍ତି । ଫଳରେ ପ୍ରଥମେ ବୋଲିଂ କରିବ ଦକ୍ଷିଣ ଆଫ୍ରିକା ।
ଆଜିର ମ୍ୟାଚରେ ଭାରତୀୟ ଦଳର ଗୋଟିଏ ପରିବର୍ତ୍ତନ ହୋଇଛି । ଅଲରାଉଣ୍ଡର ଅକ୍ଷର ପଟେଲଙ୍କ ବଦଳରେ ଦୀପକ ହୁଡାକୁ ଚୂଡାନ୍ତ ଏକାଦଶରେ ସ୍ଥାନ ମିଳିଛି । ତେବେ ଆଜିର ମ୍ୟାଚ ଜିତି ଭାରତ ବିଜୟଧାରା ବଜାୟ ରଖିବା ଲକ୍ଷ୍ୟରେ ରହିବ । ଗ୍ରୁପ ୨ ପଏଣ୍ଟ ଟେବୁଲର ଦୁଇ ଶକ୍ତିଶାଳୀ ଦଳ ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ହାଇଭୋଲଟେଜ ମୁକାବିଲା ନେଇ ଆଶା କରାଯାଉଛି । ପାକିସ୍ତାନ ଓ ନେଦରଲାଣ୍ଡସକୁ ହରାଇବା ପରେ ଟିମ୍ ଇଣ୍ଡିଆ ପାଇଁ ଦକ୍ଷିଣ ଆଫ୍ରିକା ମ୍ୟାଚ୍ ବହୁତ ଗୁରୁତ୍ବ ବହନ କରୁଛି । କାରଣ ଅପରାଜେୟ ଭାରତ ଦକ୍ଷିଣ ଆଫ୍ରିକାକୁ ହରାଇ ସେମିଫାଇନାଲ ପାଇଁ ଆଗୁଆ ଟିକେଟ୍ ହାତେଇବାକୁ ଚେଷ୍ଟା କରିବ ।
ଭାରତ ବର୍ତ୍ତମାନ ସୁଦ୍ଧା ୨ଟି ମ୍ୟାଚ ଖେଳି ୪ ପଏଣ୍ଟ ହାତେଇ ଗ୍ରୁପ ୨ ପଏଣ୍ଟ ଟେବୁଲରେ ଶୀର୍ଷରେ ରହିଛି । ଯଦି ଆଜି ଭାରତ ମ୍ୟାଚ ବିଜୟୀ ହେଉଛି ତେବେ ଟିମ୍ ଇଣ୍ଡିଆ ୬ ପଏଣ୍ଟ ହାସଲ କରିବା ସହିତ ସେମିରେ ସ୍ଥାନ ପକ୍କା କରିବ । ସେପଟେ ଦକ୍ଷିଣ ଆଫ୍ରିକା ମଧ୍ୟ ମ୍ୟାଚ ଜିତିବା ପାଇଁ ଆପ୍ରାଣ ଉଦ୍ୟମ ଜାରି ରଖିବ । ପୂର୍ବ ମ୍ୟାଚରେ ଦକ୍ଷିଣ ଆଫ୍ରିକା ବାଂଲାଦେଶ ବିପକ୍ଷରେ ରିଲେ ରୁସୋଙ୍କ ଦମଦାର ଶତକ ବଳରେ ୨୦୫ ରନର ବିଶାଳ ସ୍କୋର କରିଥିଲା । ସେପଟେ ଦକ୍ଷିଣ ଆଫ୍ରିକାର ବ୍ୟାଟିଂ ଓ ବୋଲିଂ ବିଭାଗ ମଜଭୁତ ରହିଛି । ଦଳରେ କାଗିସ ରାବଡା, ଏନରିଚ ନୋର୍କିଆଙ୍କ ଭଳି ପେସ୍ ବୋଲର ରହିଛନ୍ତି । ସ୍ପିନରଙ୍କ ଅପେକ୍ଷା ପେସରମାନଙ୍କୁ ପର୍ଥ ଷ୍ଟାଡିୟମ ଅଧିକ ସୁହାଇଥିବା ରେକର୍ଡ ରହିଛି ।