ହାଇଦ୍ରାବାଦ : ସାହିଦ ଆଫ୍ରିଦିଙ୍କ ଝିଅ ହାତ ଧରିଲେ ସାହିନ ଆଫ୍ରିଦି । କ୍ରିକେଟ ଦୁନିଆରେ ଏବେ ବାହାଘର ଋତୁ ଚାଲିଛି । ଗୋଟିଏ ପରେ ଗୋଟିଏ କ୍ରିକେଟରଙ୍କ ଶାହାନାଇ ବାଜିବା ଖବର ଗଣମାଧ୍ୟମରେ ପ୍ରକାଶ ପାଉଛି । ନିକଟରେ ଭାରତର ଦୁଇ କ୍ରିକେଟର ତଥା ଲୋକେଶ ରାହୁଲ ଏବଂ ଅକ୍ଷର ପଟେଲଙ୍କ ହାତଗଣ୍ଠି ପଡିଥିବା ବେଳେ ଗତକାଲି (ଶୁକ୍ରବାର) ପାକିସ୍ତାନର ଫାଷ୍ଟ ବୋଲର ସାହିନ ଆଫ୍ରିଦି ବିବାହ ବନ୍ଧନରେ ବାନ୍ଧି ହୋଇଛନ୍ତି । ପାକିସ୍ତାନର ପୂର୍ବତନ ଅଧିନାୟକ ସାହିଦ ଆଫ୍ରିଦିଙ୍କ ଝିଅ ଅଂଶା ସହିତ ସାହିନ ଆଫ୍ରିଦିଙ୍କ ବିବାହ ଅନୁଷ୍ଠିତ ହୋଇଛି । ଶୁକ୍ରବାର ଉଭୟଙ୍କ ବିବାହ ଫଟୋ ସୋସିଆଲ ମିଡିଆରେ ଭାଇରାଲ ହୋଇଥିଲା ।
ତେବେ ଝିଅ ଅଂଶାର ବିବାହକୁ ନେଇ ଭାବବିହ୍ବଳ ହୋଇଛନ୍ତି ପାକିସ୍ତାନର ପୂର୍ବତନ ଅଧିନାୟକ ସାହିଦ ଆଫ୍ରିଦି । ଏନେଇ ଆଫ୍ରିଦି ସୋସିଆଲ ମିଡିଆରେ ଭାବବିହ୍ବଳ ହୋଇ ଏକ ପୋଷ୍ଟ ମଧ୍ୟ କରିଛନ୍ତ । ତାଙ୍କ ଝିଅ ଏବଂ ଜ୍ବାଇଁଙ୍କ ଫଟୋ ପୋଷ୍ଟ କରି ଆଫ୍ରିଦି ଲେଖିଛନ୍ତି "ଝିଅ ଆପଣଙ୍କ ବଗିଚାର ସବୁଠୁ ସୁନ୍ଦର ଫୁଲ । ସେ ବଡ ହେଲେ ବହୁତ ସୁନ୍ଦର ଭାବରେ ଫୁଟିଥାଏ । ଝିଅ ସିଏ ଯାହା ସହିତ ଆପଣ ଆପଣଙ୍କର ସ୍ବପ୍ନ ସଜାଡିଥାନ୍ତି ଏବଂ ହସିଥାନ୍ତି । ଝିଅକୁ ଆପଣ ହୃଦୟରୁ ଭଲପାଇବା ଦେଇ ବଢାଇଥାନ୍ତି । ବାପା ହିସାବରେ ମୁଁ ମୋର ଝିଅର ହାତ ସାହିନ ଆଫ୍ରିଦିଙ୍କୁ ଦେଇଛି । ଉଭୟଙ୍କୁ ଶୁଭେଚ୍ଛା । " ତେବେ ସାହିନ ଆଫ୍ରିଦି ଓ ଅଂଶାଙ୍କ ବିବାହ ପରେ ଉଭୟଙ୍କୁ ଛୁଟିଛି ଶୁଭେଚ୍ଛାର ସୁଅ । ସାହିନ ଆଫ୍ରିଦିଙ୍କ ବିବାହ ଉତ୍ସବରେ ସରଫରାଜ ଅହମ୍ମଦ, ବାବର ଆଜମ, ଫାଷ୍ଟ ବୋଲର ନସିମ ଶାହା, ଅଲରାଉଣ୍ଡର ଶାଦବ ଖାନ, ପାକିସ୍ତାନର ପୂର୍ବତନ ଅଧିନାୟକ ମହମ୍ମଦ ହଫିଜ ସାମିଲ ହୋଇଥିଲେ।