ହାଇଦ୍ରାବାଦ: ରାୟପୁରରେ ଭ୍ରମଣକାରୀ ନ୍ୟୁଜିଲାଣ୍ଡକୁ ୮ ୱିକେଟ୍ରେ ହରାଇ ସିରିଜ କବ୍ଜା କରିଛି ଘରୋଇ ଭାରତ । ୧୦୯ ରନ ବିଜୟ ଲକ୍ଷରେ ମୈଦାନକୁ ଓହ୍ଲାଇଥିବା ଭାରତୀୟ ଅଧିନାୟକ ରୋହିତ ଶର୍ମା ୫୧ ରନର ପାଳି ଖେଳିଥିଲେ । ମ୍ୟାଚ୍ ପରେ କିନ୍ତୁ ଭାରତୀୟ ଅଧିନାୟକଙ୍କ ବହୁ ଦିନରୁ ଚାଲିଥିବା ଖରାପ ଫର୍ମ ଓ ୩ ବର୍ଷରେ କୌଣସି ଶତକ ହାସଲ କରିପାରୁନଥିବା ନେଇ ପ୍ରଶ୍ନ ଉଠିଥିଲା । ତେବେ ଏନେଇ ରୋହିତ ଶର୍ମା ମଧ୍ୟ ନିଜର ପ୍ରତିକ୍ରିୟା ରଖିଛନ୍ତି । ସେ ବର୍ତ୍ତମାନର ଫର୍ମକୁ ନେଇ ଖୁସି ଥିବା କହିଛନ୍ତି ।
ବିରାଟ କୋହଲିଙ୍କ ପରେ ଭାରତୀୟ କ୍ରିକେଟ ଦଳର ଅଧିନାୟକ ଦାୟିତ୍ବରେ ଥିବା ରୋହିତ ଶର୍ମା ଦିନିକିଆରେ ୧୯ ଜାନୁଆରି ୨୦୨୦ ମସିହାରେ ଅଷ୍ଟ୍ରେଲିଆ ବିପକ୍ଷରେ ନିଜର ଶେଷ ଶତକ ହାସଲ କରିଥିଲେ । ଏହା ପରଠାରୁ ହିଟ୍ମ୍ୟାନ ଲୟରେ ନଜର ଆସୁନାହାନ୍ତି । ତେବେ ସେ ବହୁ ଦିନରୁ ଶତକ ହାସଲ କରିପାରୁନଥିବା ନେଇ କହିଛନ୍ତି ଯେ, ସେ ନିଜ ଖେଳ ବଦଳାଇବାକୁ ଚେଷ୍ଟା ଜାରି ରଖିଛନ୍ତି ଓ ପ୍ରଥମରୁ ହିଁ ପ୍ରତିପକ୍ଷ ବୋଲରଙ୍କ ଉପରେ ଚାପ ପକାଉଛନ୍ତି । କାରଣ ବିପକ୍ଷ ଦଳ ଉପରେ ଚାପ ସୃଷ୍ଟି କରିବା ନିହାତି ଆବଶ୍ୟକ ।