କଲମ୍ବୋ: ଜାରି ରହିଥିବା ଏସିଆ କପ୍ ୨୦୨୩ରେ ଶ୍ରୀଲଙ୍କା ବିପକ୍ଷ ମୁକାବିଲାରେ ଏକ ଖାସ୍ ଉପଲବ୍ଧି ହାସଲ କରିଛନ୍ତି ଭାରତୀୟ ଦଳର ଅଧିନାୟକ ରୋହିତ ଶର୍ମା । ଶ୍ରୀଲଙ୍କା ବିପକ୍ଷରେ ୪୮ ବଲରୁ ୫୩ ରନର ଗୁରୁତ୍ବପୂର୍ଣ୍ଣ ପାଳି ଖେଳିଥିବା ରୋହିତ ଦିନିକିଆ କ୍ରିକେଟ୍ରେ ୧୦ ହଜାର ରନ ପୂରଣ କରିଛନ୍ତି । ଏହି ଉପଲବ୍ଧି ହାସଲ କରିବାରେ ରୋହିତ ହେଉଛନ୍ତି ଷଷ୍ଠ ଭାରତୀୟ ବ୍ୟାଟର । ପୂର୍ବରୁ ମହାନ କ୍ରିକେଟର ସଚିନ ତେନ୍ଦୁଲକର, ସୌରଭ ଗାଙ୍ଗୁଲି, ରାହୁଲ ଦ୍ରାବିଡ଼, ମହେନ୍ଦ୍ର ସିଂହ ଧୋନୀଙ୍କ ସମେତ ଟିମ୍ ଇଣ୍ଡିଆର ଷ୍ଟାର୍ ବ୍ୟାଟର ବିରାଟ କୋହଲି ଏହି ସଫଳତା ହାସଲ କରି ସାରିଛନ୍ତି ।
ଶ୍ରୀଲଙ୍କା ବିପକ୍ଷରେ ଭାରତ ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲା । ଅଧିନାୟକ ରୋହିତ ଶର୍ମା ଶ୍ରୀଲଙ୍କା ବିପକ୍ଷ ମ୍ୟାଚ୍ରେ ବ୍ୟାଟିଂ କରିବାକୁ ମୈଦାନକୁ ଓହ୍ଲାଇବା ପୂର୍ବରୁ ତାଙ୍କୁ ୧୦ ହଜାର ରନ ପୂରଣ ପାଇଁ ମାତ୍ର ୨୨ ରନର ଆବଶ୍ୟକତା ରହିଥିଲା । ଏହି ମାଇଲଖୁଣ୍ଟକୁ ମାତ୍ର ୨୪୧ ଇନିଂସରେ ଛୁଇଁଛନ୍ତି ହିଟ୍ମ୍ୟାନ୍ । ଆଜିର ପାଳି ସରିବା ବେଳକୁ ସେ ୨୪୧ ଇନିଂସରୁ ୪୮.୯୩ ହାରରେ ୯୦.୨୮ ଷ୍ଟ୍ରାଇକ୍ ରେଟ୍ରେ ୧୦ ହଜାର ୩୧ ରନ୍ କରିଛନ୍ତି । ଏଥିରେ ୩୦ ଶତକ ଓ ୫୦ ଅର୍ଦ୍ଧଶତକ ସାମିଲ୍ ରହିଛି । ଉଲ୍ଲେଖଯୋଗ୍ୟ, ଏସିଆ କପ୍ ୨୦୨୩ ସୁପର-୪ ପର୍ଯ୍ୟାୟରେ ପାକିସ୍ତାନ ବିପକ୍ଷ ଦ୍ଵିତୀୟ ମୁକାବିଲାରେ ରୋହିତ ବିସ୍ଫୋରକ ଅର୍ଦ୍ଧଶତକ ହାସଲ କରିଥିଲେ । ଏହି ମ୍ୟାଚ୍ରେ ସେ ଦିନିକିଆରେ ୫୦ତମ ଅର୍ଦ୍ଧଶତକ ପୂରଣ କରିଥିଲେ । ଏହାପରେ ଆଜି ଆଉ ଏକ ଉପଲବ୍ଧି ହାସଲ କରିଛନ୍ତି ହିଟ୍ମ୍ୟାନ୍ ।