ଅହମ୍ମଦାବାଦ: ଭାରତରେ ଜାରି ରହିଥିବା ଆଇସିସି ଦିନିକିଆ ବିଶ୍ବକପ୍ ୨୦୨୩ ଏବେ ଶେଷ ପର୍ଯ୍ୟାୟ ଆଡ଼କୁ ଗତି କରୁଛି । ହାଇପ୍ରୋଫାଇଲ୍ ଟୁର୍ଣ୍ଣାମେଣ୍ଟର ଲିଗ୍ ପର୍ଯ୍ୟାୟ ପ୍ରାୟତଃ ଶେଷ ହୋଇଥିବାବେଳେ ରବିବାର ଶେଷ ମ୍ୟାଚ୍ରେ ନେଦରଲ୍ୟାଣ୍ଡକୁ ଭେଟିବ ଆୟୋଜକ ଭାରତ । ଏହାପରେ ୨ଟି ସେମିଫାଇନାଲ ଏବଂ ଫାଇନାଲ ମ୍ୟାଚ୍ ମଧ୍ୟ ଖେଳାଯିବ । ଏହା ପୂର୍ବରୁ ବର୍ତ୍ତମାନ ସୁଦ୍ଧା ବିଭିନ୍ନ ଦଳର ଖେଳାଳି ଅନେକ ବଡ଼ ବଡ଼ ରେକର୍ଡ ଭାଙ୍ଗିବାରେ ସଫଳ ହୋଇଛନ୍ତି । ତେବେ ଏହି ରେକର୍ଡ ଭାଙ୍ଗିବା ରେସ୍ରେ ଦର୍ଶକ ମଧ୍ୟ ପଛରେ ପଡ଼ିନାହାନ୍ତି । ସେମିଫାଇନାଲ ପୂର୍ବରୁ ଚଳିତ ବିଶ୍ବକପ୍ରେ ଦର୍ଶକଙ୍କ ନାମରେ ମଧ୍ୟ ଏକ ବିଶ୍ବ ରେକର୍ଡ ଯୋଡ଼ି ହୋଇଛି ।
ରେକର୍ଡ ଭାଙ୍ଗିଲେ ଦର୍ଶକ: ୧୨ ବର୍ଷ ପରେ ପୁଣିଥରେ ଭାରତ ଆୟୋଜନ କରୁଛି ଦିନିକିଆ ବିଶ୍ବକପ୍ ଟୁର୍ଣ୍ଣାମେଣ୍ଟ । ଚଳିତବର୍ଷ ଏହି ଟୁର୍ଣ୍ଣାମେଣ୍ଟରେ ଅନେକ ଐତିହାସିକ ରେକର୍ଡ ଦେଖିବାକୁ ମିଳିଛି । ନେଦରଲ୍ୟାଣ୍ଡ ଏବଂ ଆଫଗାନିସ୍ତାନ ଭଳି ଦଳ ମଧ୍ୟ ଏହି ମେଗା ଇଭେଣ୍ଟରେ ଦମଦାର ଖେଳ ପ୍ରଦର୍ଶନ କରି ପ୍ରଶଂସକଙ୍କ ହୃଦୟ ଜିତିଛନ୍ତି । ତେବେ ଏହି ବିଶ୍ବକପ୍କୁ ସଫଳ କରିବାରେ ସବୁଠାରୁ ବଡ଼ ଭୂମିକା ଗ୍ରହଣ କରିଛନ୍ତି ଦର୍ଶକ । ଚଳିତ ବିଶ୍ବକପ୍ ୨୦୨୩ରେ ବର୍ତ୍ତମାନ ପର୍ଯ୍ୟନ୍ତ ଖେଳା ଯାଇଥିବା ସମସ୍ତ ମ୍ୟାଚ୍ରେ ଷ୍ଟାଡିୟମରେ ଉପସ୍ଥିତ ଦର୍ଶକଙ୍କ ସଂଖ୍ୟା ଏକ ଐତିହାସିକ ରେକର୍ଡ ହାସଲ କରିଛି । ଏପର୍ଯ୍ୟନ୍ତ ମୋଟ ୧ ମିଲିୟନ, ଅର୍ଥାତ ୧୦ ଲକ୍ଷରୁ ଅଧିକ ଦର୍ଶକ ବିଭିନ୍ନ ଷ୍ଟାଡିୟମରେ ପହଞ୍ଚି ବିଭିନ୍ନ ମ୍ୟାଚ୍ ଦେଖିଛନ୍ତି । ଯାହା କୌଣସି ଏକ ଆଇସିସି ଟୁର୍ଣ୍ଣାମେଣ୍ଟରେ ସର୍ବାଧିକ । କେବଳ ଭାରତର ନୁହେଁ, ଅନ୍ୟ ଦଳଗୁଡ଼ିକର ମ୍ୟାଚ୍ରେ ମଧ୍ୟ ବହୁ ସଂଖ୍ୟାରେ ଦର୍ଶକ ଷ୍ଟାଡିୟମରେ ପହଞ୍ଚିଥିବା ଦେଖିବାକୁ ମିଳିଛି । ଏପର୍ଯ୍ୟନ୍ତ ବିଭିନ୍ନ ଷ୍ଟାଡିୟମରେ ହୋଇଥିବା ମ୍ୟାଚ୍ ଗୁଡ଼ିକ ୧୦ ଲକ୍ଷରୁ ଅଧିକ ଦର୍ଶକ ଷ୍ଟାଡିୟମରେ ଦେଖିଥିବା ଆଇସିସି ଟ୍ବିଟ୍ କରି ସୂଚନା ଦେଇଛି ।