ମୁମ୍ବାଇ: IPL 2022ରେ ଜାରି ରହିଥିବା ୩୪ତମ ମ୍ୟାଚ୍ରେ ଧୂଆଁଧାର ପାଳି ଖେଳିଛନ୍ତି ରାଜସ୍ଥାନ ରାୟଲ୍ସର ଓପନର ଜୋଶ ବଟଲର୍ । ବଟଲର୍ଙ୍କ ପ୍ରହାରରେ ଦିଲ୍ଲୀ କ୍ୟାପିଟାଲ୍ସ ବୋଲରଙ୍କ ଲାଇନ୍ଲେନ୍ଥ ବିଗିଡ଼ି ଯାଇଥିଲା । ବଟଲରଙ୍କ ଶତକ ବଳରେ ରାଜସ୍ଥାନ ରୟାଲ୍ସ ଦିଲ୍ଲୀ କ୍ୟାପିଟାଲ୍ସକୁ ୨୨୩ ରନ୍ର ବିଶାଳ ଟାର୍ଗେଟ ଦେଇଛି ।
ଇନିଂସ ଆରମ୍ଭରୁ ହିଁ ରାଜସ୍ଥାନ ଓପନର ଜଗିରଖି ଖେଳିଥିଲେ । ତେବେ ପ୍ରଥମ ୪ ଓଭର ପରେ ଓପନରଙ୍କ ଖେଳିବା ତରିକା ବଦଳି ଯାଇଥିଲା । ଦେବଦତ୍ତ ପାଦିକ୍କଲ ଓ ଜୋଶ ବଟଲର୍ ବଡ଼ ସଟ୍ ଖେଳିବା ଆରମ୍ଭ କରି ଦେଇଥିଲେ । ଉଭୟଙ୍କ ମଧ୍ୟରେ ପ୍ରଥମ ୱିକେଟ ପାଇଁ ୧୫୫ ରନ୍ର ଭାଗିଦାରୀ ହୋଇଥିଲା । ଜୋଶ ବଟଲର୍ ୬୫ ବଲ୍ରୁ ୧୧୬ ରନ୍ କରିଛନ୍ତି । ଏଥିରେ ୯ଟି ଛକା ଓ ୯ଟି ଚୌକା ସାମିଲ ରହିଥିଲା ।
୧୫.୧ତମ ଓଭରରେ ରାଜସ୍ଥାନ ପ୍ରଥମ ୱିକେଟ ହରାଇଥିଲା । ସେତେବେଳକୁ ଦଳୀୟ ସ୍କୋର ୧୫୫ରେ ପହଞ୍ଚି ସାରିଥିଲା । ଦେବଦତ୍ତ ପାଦିକ୍କଲ ୫୪ ରନ୍ କରି ପାଭେଲିୟନ ଫେରିଥିଲେ । ଏହାପରେ ଅଧିନାୟକ ସଞ୍ଜୁ ସାମସନ୍ ମଧ୍ୟ ବଡ଼ ସଟ୍ ଖେଳିବା ଆରମ୍ଭ କରିଥିଲେ । ସେ ୧୯ ବଲ୍ରୁ ଦ୍ରୁତ ୪୬ ରନ୍ ସଂଗ୍ରହ କରିଥିଲେ । ଯାହାଫଳରେ ଦଳ ନିର୍ଦ୍ଧାରିତ ୨୦ ଓଭରରେ ୨୨୨ ରନ୍ କରିଛି ।
ସେପଟେ ଦିଲ୍ଲୀ କ୍ୟାପିଟାଲ୍ସ ଦଳ ମାତ୍ର ଦୁଇଟି ୱିକେଟ ନେବାକୁ ସକ୍ଷମ ହୋଇପାରିଛି । ଖଲିଲ୍ ଅହମ୍ମଦ ଓ ମୁସ୍ତାଫିଜୁର ରେହମାନ ଗୋଟିଏ ଲେଖାଏଁ ୱିକେଟ ନେଇଛନ୍ତି । ସମସ୍ତ ବୋଲର ଆଜି ମହଙ୍ଗା ସାବ୍ୟସ୍ତ ହୋଇଛନ୍ତି । ତା ସହିତ ଦିଲ୍ଲୀ ଦଳ ପକ୍ଷରୁ ଅଥି ସାଧାରଣ ଫିଲ୍ଡିଂ ପ୍ରଦର୍ଶନ ଦେଖିବାକୁ ମିଳିଥିଲା । ରାଜସ୍ଥାନ ଦେଇଥିବା ବିଶାଳ ଲକ୍ଷ୍ୟ ପିଛା ଦିଲ୍ଲୀ କିଭଳି କରିବ ତାହାରି ଉପରେ ନଜର ରହିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
