ମୁମ୍ବାଇ:ଗୋଆ ଛୁଟି କାଟିବାକୁ ଗଲାବେଳେ ହଟହଟା ହେଲେ ଭାରତୀୟ ବ୍ୟାଟ୍ସମ୍ୟାନ ପୃଥ୍ବୀ ଶ' । ମହାରାଷ୍ଟ୍ରରେ କୋରୋନା ସଂକ୍ରମଣ ଉପର ମୁହାଁ ରହିଛି । ଏଭଳିସ୍ଥିତିରେ ରାଜ୍ୟରେ ଲକଡାଉନ ଘୋଷଣା ହୋଇଛି । ବାହାର ରାଜ୍ୟ କିମ୍ବା ଅନ୍ୟ କୌଣସି ସ୍ଥାନକୁ ଯିବାକୁ ହେଲେ ଇ-ପାସକୁ ବାଧ୍ୟତାମୂଳକ କରାଯାଇଛି । ତେବେ ଗୋଆ ଯିବା ସମୟରେ ପୃଥ୍ବୀ ଶ'ଙ୍କ ପାଖରେ ଇ-ପାସ ନଥିବାରୁ ତାଙ୍କୁ ଅଧାବାଟରେ ପୋଲିସ ଅଟକାଇ ଥିଲା ।
ମହାରାଷ୍ଟ୍ରର ସିନ୍ଧୁଦୂର୍ଗ ଜିଲ୍ଲାରେ ପୃଥ୍ବୀ ଶ'ଙ୍କୁ ଅଟକାଇ ଥିଲା ପୋଲିସ । ଗୋଆ ଯିବା ପାଇଁ ତାଙ୍କ ପାଖରେ ଇ-ପାସ ନଥିବାରୁ ପୋଲିସ ତାଙ୍କୁ ଅଟକାଇ ଥିଲା । ଇ-ପାସ ପାଇଁ ସେ ଆବେଦନ କରିଥିଲେ । କିନ୍ତୁ ଆବେଦନ ଗ୍ରହଣ ହେବାପୂର୍ବରୁ ସେ ଗୋଆ ଯିବାକୁ ବାହାରି ପଡ଼ିଥିଲେ । ସେଠାରେ ପୋଲିସ ତାଙ୍କୁ ପୁନଃ ଇ-ପାସ ଆବେଦନ କରିବାକୁ କହିଥିଲେ । ଏକ ଘଣ୍ଟା ଅପେକ୍ଷା କରିବା ପରେ ପୃଥ୍ବୀ ଶ'ଙ୍କୁ ଇ-ପାସ ମିଳିଥିଲା । ଏହାପରେ ପୋଲିସ ତାଙ୍କୁ ମହାରାଷ୍ଟ୍ର ବାହାରକୁ ଯିବାକୁ ଅନୁମତି ଦେଇଥିଲା।