ସିଡନୀ: ୧୩ ବର୍ଷ ପରେ ଟି-୨୦ ବିଶ୍ବକପ ଫାଇନାଲରେ ପ୍ରବେଶ କରିଲା ପାକିସ୍ତାନ । ନ୍ୟୁଜିଲାଣ୍ଡକୁ ୭ ୱିକେଟରେ ପରାସ୍ତ କରି ଫାଇନାଲରେ ପ୍ରବେଶ କରିଲା ବାବର ଆଜମଙ୍କ ଟିମ୍ । ପ୍ରଥମେ ଧିମା ବ୍ୟାଟିଂ କରିବା ପରେ ବୋଲିଂରେ ମଧ୍ୟ ବିଫଳ ହେଲା କିୱି ଦଳ । ପାକିସ୍ତାନ ବ୍ୟାଟରଙ୍କ ଆଗରେ ହାର୍ ମାନିଲା ବ୍ଲାକ୍ କ୍ୟାପ୍ସର ରଣନୀତି । ନ୍ୟୁଜିଲାଣ୍ଡ ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ୨୦ ଓଭରରେ ୪ ୱିକେଟ ହରାଇ ୧୫୨ ରନ୍ କରିଥିଲା । ଏହାର ଜବାବରେ ମହମ୍ମଦ ରିଜୱାନ ଓ ବାବର ଆଜମଙ୍କ ଦମଦାର ଅର୍ଦ୍ଧଶତକ ବଳରେ ପାକିସ୍ତାନ ନିର୍ଦ୍ଧାରିତ ୧୯.୧ ଓଭରରେ ୩ ୱିକେଟ ହରାଇ ୧୫୩ ରନ୍ କରିଛି । ତେବେ ଗୁରୁତ୍ୱପୂର୍ଣ୍ଣ ମ୍ୟାଚରେ ପାକିସ୍ତାନର ଷ୍ଟାର ବ୍ୟାଟର ମହମ୍ମଦ ରିଜଓ୍ୱାନ ମ୍ୟାନ୍ ଅଫ୍ ଦ ମ୍ୟାଚ ବିବେଚିତ ହୋଇଛନ୍ତି ।
ଟି୨୦ ବିଶ୍ବକପରେ ପାକିସ୍ତାନ ପ୍ରଥମ ଦୁଇଟି ମ୍ୟାଚ ହାରିବା ପରେ ଦଳର ଅପରାଜୟ ଧାରା ଜାରି ରହିଛି । ଫାଇନାଲ ଟିକଟ୍ ହାତେଇବା ଲକ୍ଷ୍ୟ ନେଇ ମଇଦାନକୁ ଓହ୍ଲାଇଥିଲା ବାବର ଆଜମ ଦଳ । ଆରମ୍ଭରୁ ହିଁ ନ୍ୟୁଜିଲାଣ୍ଡ ବିପକ୍ଷରେ ମାପି ଚୁପି ବୋଲିଂ କରିଥିଲା ପାକିସ୍ତାନ । ଶେଷରେ ନ୍ୟୁଜିଲାଣ୍ଡକୁ ୧୫୨ ରନରେ ରୋକିବାରେ ସକ୍ଷମ ରହିଥିଲା ମେନ୍ ଇନ୍ ଗ୍ରୀନ୍ ।