ହାଇଦ୍ରାବାଦ: ଦିନିକିଆ ବିଶ୍ବକପ୍ ୨୦୨୩ ପାଇଁ ଭାରତରେ ଅଛନ୍ତି ପାକିସ୍ତାନ କ୍ରିକେଟ ଟିମ୍ । ବାବର ଆଜମଙ୍କ ଟିମ୍ ଯେତେବେଳେ ଭାରତରେ ପହଞ୍ଚିଥିଲା, ସେତେବେଳେ ସେମାନଙ୍କୁ ହାଇଦ୍ରାବାଦ ବିମାନବନ୍ଦରରେ ଜବରଦସ୍ତ ସ୍ବାଗତ କରାଯାଇଥିଲା । ସେବେଠାରୁ ହାଇଦ୍ରାବାଦରେ ରହିଛି ପାକିସ୍ତାନ ଟିମ୍ । ତେବେ ଏଠାରେ ପାକିସ୍ତାନୀ ଖେଳାଳିମାନେ ଲୋକାଲ ଖାଦ୍ୟର ଭରପୁର ମଜା ଉଠାଇଛନ୍ତି । ଏପରିକି ପାକିସ୍ତାନୀ ଦଳ ଭାରତର ଆତିଥ୍ୟତାକୁ ନେଇ ମଧ୍ୟ ବେଶ ଖୁସି ଥିବା ଦେଖିବାକୁ ମିଳିଛି । ଯାହାକୁ ନେଇ ପ୍ରଥମ ସାମ୍ବାଦିକ ସମ୍ମିଳନୀରେ ପ୍ରକାଶ କରିଛନ୍ତି ପାକିସ୍ତାନ କ୍ରିକେଟ ଦଳର ଉପଅଧିନାୟକ ଶଦାବ ଖାନ ।
ପାକିସ୍ତାନ ଦଳର ଅଭିଜ୍ଞ ଲେଗ୍ ସ୍ପିନର ତଥା ଉପଅଧିନାୟକ ଶଦାବ ଖାନ ହାଇଦ୍ରାବାଦୀ ଖାଦ୍ୟକୁ ପ୍ରଶଂସା କରିଥିଲେ । ଏପରିକି ସିଙ୍ଘମ ଭଳି ବଲିଉଡ୍ ଫିଲ୍ମକୁ ମଧ୍ୟ ସେ ବହୁତ ପସନ୍ଦ କରନ୍ତି ବୋଲି ଏକ ସାମ୍ବାଦିକ ସମ୍ମିଳନୀରେ ପ୍ରକାଶ କରିଛନ୍ତି ଶଦାବ । ବଲିଉଡ ଚଳଚ୍ଚିତ୍ର ଏବଂ ଭାରତର ଲୋକାଲ ଖାଦ୍ୟକୁ ବହୁତ ଭଲ ପାଆନ୍ତି ବୋଲି ଶଦାବ କହିଛନ୍ତି । ଟିମ୍ ଦ୍ବାରା ଆୟୋଜିତ ପ୍ରଥମ ଗଣମାଧ୍ୟମ ସମ୍ମିଳନୀରେ ଶଦାବ କହିଛନ୍ତି, "ହାଇଦ୍ରାବାଦ ବିମାନବନ୍ଦରରେ ଆମକୁ ବେଶ ଭଲ ଭାବରେ ସ୍ବାଗତ କରାଯାଇଥିଲା ଏବଂ ହୋଟେଲକୁ ମଧ୍ୟ ଅନେକ ଲୋକ ଆସିଥିଲେ । ଏଠାକାର ଆତିଥ୍ୟତା ଆମକୁ ବେଶ ଭଲ ଲାଗିଲା ।" ହାଇଦ୍ରାବାଦୀ ବିରିୟାନୀକୁ ସମସ୍ତେ ପସନ୍ଦ କରନ୍ତି ଏବଂ ଶଦାବ ମଧ୍ୟ ଏଥିରୁ ବାଦ ପଡ଼ିନାହାନ୍ତି ।