ନୂଆଦିଲ୍ଲୀ: ଟ୍ରମ୍ପଙ୍କ ସହ ଗଲ୍ଫ ଖେଳିଲେ ଭାରତୀୟ କ୍ରିକେଟ ଦଳର ପୂର୍ବତନ ଅଧିନାୟକ ମହେନ୍ଦ୍ର ସିଂହ ଧୋନୀ । ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ଧୋନୀ ଗଲ୍ଫ ଖେଳୁଥିବାର ଫଟୋ ଓ ଭିଡିଓ ସାମ୍ନାକୁ ଆସିଛି । ଯାହାକି ଏବେ ସୋସିଆଲ୍ ମିଡିଆରେ ଖୁବ୍ ଭାଇରାଲ ହେବାରେ ଲାଗିଛି । ପ୍ରଶଂସକ ମଧ୍ୟ ଏହି ଫଟୋ ଓ ଭିଡିଓକୁ ବେଶ ପସନ୍ଦ କରୁଛନ୍ତି ଓ ସେୟାର ମଧ୍ୟ କରୁଛନ୍ତି । ତେବେ ଧୋନୀ ଏବଂ ଟ୍ରମ୍ପ୍ ଉଭୟ ନ୍ୟାସନାଲ ଗଲ୍ଫ କ୍ଲବ୍ରେ ଏକାଠି ଗଲ୍ଫ ଖେଳୁଥିବା ଦେଖିବାକୁ ମିଳିଛି ।
ଜାରି ରହିଥିବା 'ୟୁଏସ୍ ଓପନ୍ ୨୦୨୩' କ୍ବାର୍ଟର ଫାଇନାଲ୍ ମ୍ୟାଚ୍ରେ ମୁହାଁମୁହିଁ ହୋଇଥିବା ଆଲେକ୍ଜେଣ୍ଡର୍ ବେରେବ୍ ଓ କାର୍ଲୋଜ୍ ଆଲ୍କାରାଜ୍ଙ୍କ ଖେଳ ଦେଖିବାର ଦିନକ ପରେ ଶୁକ୍ରବାର ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ଗଲ୍ଫ ଖେଳୁଥିବା ଦେଖିବାକୁ ମିଳିଥିଲା । ହିତେଶ ସାଙ୍ଘୱି ନାମକ ଦୁବାଇର ଜଣେ ବ୍ୟବସାୟୀ ସାମାଜିକ ଗଣମାଧ୍ୟମରେ ଏହାର ସୂଚନା ଦେଇ ନିଜ ଇନ୍ଷ୍ଟା ହ୍ୟାଣ୍ଡେଲ୍ରେ ଏହାର ଫଟୋ ଓ ଭିଡିଓ ସେୟାର କରିଥିଲେ । ନିୟୁଜର୍ସିରେ ଥିବା 'ଟ୍ରମ୍ପ ନ୍ୟାସ୍ନାଲ୍ ଗଲ୍ଫ କ୍ଲବ୍ ବ୍ୟାଡ୍ମିନ୍ଷ୍ଟର୍'ରେ ଧୋନୀ ଟ୍ରମ୍ପ୍ଙ୍କ ସହିତ ଗଲ୍ଫ ଖେଳୁଥିବା ବେଳର ଫଟୋ ସେ ସେୟାର କରିଛନ୍ତି । ଏହାର କ୍ୟାପ୍ସନରେ ସେ ଲେଖିଛନ୍ତି, "ଆମକୁ ଆତିଥ୍ୟ ଦେଇଥିବାରୁ ଆପଣଙ୍କ ନିକଟରେ କୃତଜ୍ଞ ରାଷ୍ଟ୍ରପତି ମହୋଦୟ ।"