ମୁମ୍ବାଇ: ବିଶ୍ବର ସବୁଠାରୁ ବଡ଼ କ୍ରିକେଟ୍ ପ୍ରିମିୟର୍ ଲିଗ୍ ଆଇପିଏଲ୍କୁ ଆଉ ମାତ୍ର ଦିନ କେଇଟା ବାକି ଅଛି । ମିନି ଅକ୍ସନ ପୂର୍ବରୁ ରଣନୀତି ପ୍ରସ୍ତୁତ କରିଛନ୍ତି ବିଭିନ୍ନ ଦଳ । ହେଲେ ଏହାରି ଭିତରେ ଆଇପିଏଲ୍ର ଏକ ସଫଳତମ ଦଳ ଭାବେ ପରିଚୟ ପାଇଥିବା ମୁମ୍ବାଇ ଇଣ୍ଡିଆନ୍ସ ଏକ ବଡ଼ ପରିବର୍ତ୍ତନ କରି ଚର୍ଚ୍ଚାକୁ ଆସିଛି । ପ୍ରାଞ୍ଚାଇଜ୍ ରୋହିତ ଶର୍ମାଙ୍କୁ ହଟାଇ ହାର୍ଦ୍ଦିକ ପାଣ୍ଡ୍ୟାଙ୍କୁ ଅଧିନାୟକ ନିଯୁକ୍ତ କରିଛି । ଯାହାକୁ ନେଇ ଫ୍ୟାନ୍ସଙ୍କ ମଧ୍ୟରେ ଦେଖାଦେଇଛି ତୀବ୍ର ଅସନ୍ତୋଷ । ସେପଟେ ହାର୍ଦ୍ଦିକ ଗୁଜରାଟ ଛାଡ଼ି ମୁମ୍ବାଇକୁ ଫେରିବା ସମୟରେ ଅଧିନାୟକ ରହିବାକୁ ସର୍ତ୍ତ ରଖି ଆସିଥିବା ଖବର ପ୍ରକାଶ ପାଇଛି । ଯାହାକୁ ନେଇ ସୋସିଆଲ୍ ମିଡିଆରେ ପ୍ରଶଂସକଙ୍କ ଅସନ୍ତୋଷର ଶିକାର ହୋଇଛି ମୁମ୍ବାଇ ଇଣ୍ଡିଆନ୍ସ । ହାର୍ଦ୍ଦିକଙ୍କୁ ଅଧିନାୟକ ନିଯୁକ୍ତ କରିବାର କିଛି ସମୟ ମଧ୍ୟରେ ପ୍ରାୟ ୫ ଲକ୍ଷ ପ୍ରଶଂସକ ମୁମ୍ବାଇକୁ ଅନ୍ଫଲୋ କରିଛନ୍ତି । ସେପଟେ ଗତକାଲିଠାରୁ ଏକ୍ସରେ ଟ୍ରେଣ୍ଡ ହେଉଛି '#ShameOnMI' ।
ରୋହିତଙ୍କୁ ହଟାଇ ପାଣ୍ଡ୍ୟାଙ୍କୁ ଅଧିନାୟକ କଲା MI: ରୋହିତ ଶର୍ମା ଆଇପିଏଲ୍ ୨୦୧୩ଠାରୁ ମୁମ୍ବାଇ ଇଣ୍ଡିଆନ୍ସ ଦଳର ନେତୃତ୍ବ ନେଇଥିଲେ । ସେ ବିଗତ ୧୦ ବର୍ଷରେ ଦଳକୁ ସଫଳତାର ଶିଖରରେ ପହଞ୍ଚାଇଥିଲେ । ରୋହିତଙ୍କ ଅଧିନାୟକତ୍ବରେ ମୁମ୍ବାଇ ୫ ଥର ଆଇପିଏଲ୍ ଟାଇଟଲ୍ ଜିତିଥିଲା । ୨୦୧୩, ୨୦୧୫, ୨୦୧୭, ୨୦୧୯ ଏବଂ ୨୦୨୦ରେ ମୁମ୍ବାଇକୁ ଚମ୍ପିଆନ୍ କରାଇଥିଲେ ରୋହିତ ଶର୍ମା । ପୂର୍ବରୁ ମୁମ୍ବାଇର ସଦସ୍ୟ ରହି ଗୋଟିଏ ଥର ଟ୍ରଫି ଜିତିହାର ଗୌରବ ଅର୍ଜନ କରିଥିଲେ ରୋହିତ । ହେଲେ ଶୁକ୍ରବାର ହଠାତ ସମସ୍ତଙ୍କୁ ଆଶ୍ଚର୍ଯ୍ୟ କରି ରୋହିତ ଶର୍ମାଙ୍କୁ ହଟାଇ ହାର୍ଦ୍ଦିକ ପାଣ୍ଡ୍ୟାଙ୍କୁ ଅଧିନାୟକ ନିଯୁକ୍ତ କରିଛି ମୁମ୍ବାଇ ଇଣ୍ଡିଆନ୍ସ । ଯାହାକୁ ନେଇ ଖପ୍ପା ହୋଇଛନ୍ତି ପ୍ରଶଂସକ । ଏହା ପରଠାରୁ କ୍ରମାଗତ ଭାବେ ପ୍ରଶଂସକ ମୁମ୍ବାଇକୁ ଅନ୍ଫଲୋ କରିଚାଲିଛନ୍ତି ।
କ୍ୟାପ୍ଟେନ୍ ହେବା ସର୍ତ୍ତ ରଖି ଆସିଥିଲେ ପାଣ୍ଡ୍ୟା !: ଆଇପିଏଲ୍ ୨୦୧୫ ପାଇଁ ହୋଇଥିବା ନିଲାମୀ ପ୍ରକ୍ରିୟାରେ ହାର୍ଦ୍ଦିକ ପାଣ୍ଡ୍ୟାଙ୍କୁ ନିଜ ଦଳରେ ସାମିଲ କରିଥିଲା ମୁମ୍ବାଇ ଇଣ୍ଡିଆନ୍ସ । ଧିରେ ଧିରୋ ରୋହିତଙ୍କ କାନ୍ଧରେ କାନ୍ଧ ମିଶାଇ ଦଳର ଜଣେ ପ୍ରମୁଖ ସଦସ୍ୟ ହୋଇପାରିଥିଲେ ଏହି ଷ୍ଟାର ଅଲରାଉଣ୍ଡର । ହେଲେ ହଠାତ ଆଇପିଏଲ୍ ୨୦୨୨ ପୂର୍ବରୁ ସମସ୍ତଙ୍କୁ ଚକିତ କରି ପାଣ୍ଡ୍ୟାଙ୍କୁ ନିଜ ଦଳରୁ ରିଲିଜ୍ କରିଥିଲା ମୁମ୍ବାଇ । ଏହାପରେ ଆଇପିଏଲ୍ରେ ନବାଗତ ଗୁଜରାଟ ଟାଇଟନ୍ସ ପାଣ୍ଡ୍ୟାଙ୍କୁ ନିଜ ଦଳରେ ସାମିଲ କରି ନେତୃତ୍ବ ଦେଇଥିଲା । ସେହି ଡେବ୍ୟୁ ସଂସ୍କରଣରେ ହିଁ ଗୁଜରାଟ୍କୁ ଚମ୍ପିଆନ୍ କରାଇଥିଲେ ହାର୍ଦ୍ଦିକ । ଏହାପରେ କ୍ରମାଗତ ଦ୍ବିତୀୟ ଅର୍ଥାତ ୨୦୨୩ ଆଇପିଏଲ୍ରେ ଦଳକୁ ରନର୍ ଅପ୍ କରିବାରେ ସକ୍ଷମ ହୋଇଥିଲେ । ହେଲେ ଆଇପିଏଲ୍ ୨୦୨୪ ପୂର୍ବରୁ ପୁଣି ବିଗିଡ଼ ଯାଇଛି ସବୁ ଅଙ୍କ । ଗୁଜରାଟ ଛାଡ଼ି ପୁଣିଥରେ ମୁମ୍ବାଇକୁ ଫେରିଛନ୍ତି ହାର୍ଦ୍ଦିକ । ହେଲେ ଗଣମାଧ୍ୟମ ରିପୋର୍ଟ ଅନୁସାରେ ହାର୍ଦ୍ଦିକ ମୁମ୍ବାଇର କ୍ୟାପ୍ଟେନ୍ ହେବା ସର୍ତ୍ତ ନେଇ ମୁମ୍ବାଇକୁ ଫେରିଥିବା କୁହାଯାଉଛି । ଏନେଇ ଟିମ୍ ମ୍ୟାନେଜ୍ମେଣ୍ଟ ରୋହିତଙ୍କ ସହ ମଧ୍ୟ ଆଲୋଚନା କରିଥିଲେ ବୋଲି ଖବର ପ୍ରକାଶ ପାଇଛି ।