କଟକ:ବାରବାଟୀରେ ମଣିପାଲ ଟାଇଗର୍ସ ଓ ଭିଲୱାରା କିଙ୍ଗସ ମଧ୍ୟରେ ଲିଜେଣ୍ଡ୍ସ ଲିଗ କ୍ରିକେଟର ଖେଳାଯାଇଥିବା ମୁକାବିଲାରେ ଭିଲୱାରାକୁ ମାତ୍ ଦେଇଛି ମଣିପାଲ। ବ୍ୟାଟିଂ ଓ ବୋଲିଂରେ ଚମତ୍କାର ପ୍ରଦର୍ଶନ କରି ହରଭଜନ ସିଂଙ୍କ ନେତୃତ୍ବାଧୀନ ମଣିପାଲ କିଙ୍ଗସ ଲିଗର ପ୍ରଥମ ବିଜୟ ହାସଲ କରିଛି । 3 ରନରେ ଭିଲୱାରା କିଙ୍ଗସକୁ ପରାସ୍ତ କରିଛି ଦଳ । ବିଜୟରେ ମୁଖ୍ୟ ଭୂମିକା ଗ୍ରହଣ କରିଥିଲେ ଦିଲହାରା ଫର୍ଣ୍ଣାଣ୍ଡୋ । ଶେଷ ଓଭରରେ କିଙ୍ଗସକୁ ବିଜୟ ପାଇଁ 9 ରନ ଆବଶ୍ୟକ ଥିଲା ।
ଏହି ଓଭରରେ 5ରନ ଦେଇ 2ଟି ୱିକେଟ ନେବା ସହ ମଣିପାଲକୁ ବିଜୟୀ କରାଇଥିଲେ ଫର୍ଣ୍ଣାଣ୍ଡୋ । ଉଚ୍ଚକୋଟୀର ପ୍ରଦର୍ଶନ ପାଇଁ ଫର୍ଣ୍ଣାଣ୍ଡୋ ପ୍ଲେୟାର ପ୍ଲେୟାର ଅଫ ଦି ମ୍ୟାଚ୍ ବିବେଚିତ ହୋଇଥିଲେ । ଭିଲୱାରା କିଙ୍ଗସ ଅଧିନାୟକ ଇର୍ଫାନ ପଠାନ ଟସ ଜିତି ଫିଲ଼୍ଡିଂ ନିଷ୍ପତ୍ତି ନେଇଥିଲେ । ବ୍ୟାଟଂ ଆମନ୍ତ୍ରଣ ପାଇଥିବା ମଣିପାଲ ଟାଇଗର୍ସର ଦୁଇ ଓପନର ଜେସି ରାଇଡର ଓ ତାଟେଣ୍ଡା ତାଇବୁ ପାଳି ଆରମ୍ଭ କରିଥିଲେ । ଟାଇଗର୍ସ ଭଲ ଆରମ୍ଭ କରିଥିଲା । ଉଭୟ ଓପନର ବିସ୍ଫୋରକ ବ୍ୟାଟିଂ କରିଥିଲେ । ଭିଲୱାରା ବୋଲରଙ୍କୁ ନିର୍ଧୁମ ପ୍ରହାର କରିଥିଲେ କିଙ୍ଗସ ବ୍ୟାଟର । ଦୁଇ ଓପନରଙ୍କ ମଧ୍ୟରେ ଶତକୀୟ ଭାଗିଦାରୀ ହୋଇଥିଲା ।
ଜେସି ରାଇଡର 35 ବଲରୁ ଦ୍ରୁତ 47 ରନ (6 ଚୌକା, 2ଛକା) ରନ କରିଥିଲେ । ତାଇବୁ ଅର୍ଦ୍ଧଶତକୀୟ ପାଳି ଖେଳିଥିଲେ । 54 ରନ (5ଚୌକା, 4ଛକା) କରିଥିଲେ। ଏହି ଓପନିଂ ଯୋଡିକୁ ଭାଙ୍ଗିବା ଭିଲୱାରା ବୋଲରଙ୍କ ପାଇଁ କାଠିକର ପାଠ ହୋଇଥିଲା । ଶେଷର ୟୁସୁଫ ପଠାନ ଏହି ଯୋଡିକୁ ଭାଙ୍ଗିଥିଲେ । ଏହାପରେ ଦଳର ରନ ଗାଡି ଧିମା ପଡିଥିଲା । ପ୍ରଦୀପ ସାହୁ (0), କୋରି ଆଣ୍ଡରସନ (20), ରିଟାର୍ଡୋ ପୋୱେଲ (1) ହରଭଜନ ସିଂ (0) ଓ ମୁରଲୀଥରନ (0)ରେ ପାଭିଲିୟନ ଫେରିବା ପରେ ଦଳ ବିପର୍ଯ୍ୟୟର ସାମ୍ନା କରିଥିଲା । ସଙ୍କଟ ସମୟରେ ମହମ୍ମଦ କୈଫ ସ୍ଥିତି ସମ୍ଭାଳିଥିଲେ । 25 ବଲରେ 32 ରନ କରି ଦଳୀୟ ସ୍କୋରକୁ ଆଗକୁ ନେଇଥିଲେ । ମଣିପାଲ କିଙ୍ଗସ 8 ୱିକେଟ ହରାଇ 175 ରନ କରିଥିଲା । ଭିଲୱାରା ପକ୍ଷରୁ ଟିନୋ ବେଷ୍ଟ ସର୍ବାଧିକ 3ଟି ୱିକେଟ ଓ ୟୁସୁଫ ପଠାନ 2ଟି ୱିକେଟ ନେଇଥିଲେ ।
ଏହା ବି ପଢନ୍ତୁ...ସାଉଥ ଆଫ୍ରିକା ବିପକ୍ଷ ଟି-୨୦ ସିରିଜରୁ ବାଦ ପଡିଲେ ହୁଡ୍ଡା