ପୁଣେ: ଚଳିତ ଆଇପିଏଲରେ ଆଜି (ଶୁକ୍ରବାର) 42ତମ ଲିଗ ମ୍ୟାଚ ଖେଳାଯିବ । ଏଥିରେ ପଞ୍ଜାବ କିଙ୍ଗସ ଓ ଲକ୍ଷ୍ନୌ ସୁପରଜିଆଣ୍ଟ୍ସ ପରସ୍ପରକୁ ଭେଟିବ । ଏହି ମ୍ୟାଚକୁ ନେଇ ଦର୍ଶକଙ୍କ ମଧ୍ୟରେ ଉତ୍ସାହ ରହିଛି । ସୁପରଜିଆଣ୍ଟ୍ସ ପଏଣ୍ଟ ଟେବୁଲର ଚତୁର୍ଥ ସ୍ଥାନରେ ରହିଛି । 8ଟି ମ୍ୟାଚରୁ 5ଟି ଜିତି ମୋଟ 10 ପଏଣ୍ଟ ପାଇଛି ସୁପରଜିଆଣ୍ଟ୍ସ । ଆଜିର ମ୍ୟାଚ ଜିତିଲେ ତୃତୀୟକୁ ଉଠିବ ଦଳ ।
ସେହିପରି 8ଟି ମ୍ୟାଚ ଖେଳି 4ଟି ଜିତି 8 ପଏଣ୍ଟ ସହ ଟେବୁଲ ସପ୍ତମ ସ୍ଥାନରେ ରହିଛି ପଞ୍ଜାବ । ଆଜିର ମ୍ୟାଚକୁ ଜିତି ଦଳ ପାଇଁ ଷଷ୍ଠ ସ୍ଥାନକୁ ଉଠିବାର ସୁଯୋଗ ରହିଛି । ଆଜିର ମ୍ୟାଚରେ ଦଳର ଦମଦାର ବ୍ୟାଟିଂ ଶୃଙ୍ଖଳିତ ବୋଲିଂ ମୁଖ୍ୟ ଆକର୍ଷଣ ସାଜିବ । ପୂର୍ବରୁ କେ.ଏଲ ରାହୁଲ ପଞ୍ଜାବ କିଙ୍ଗସର ଅଧିନାୟକ ଥିଲେ । ଏଥର ସୁପରଜିଆଣ୍ଟ୍ସର ନେତୃତ୍ବ ନେଉଛନ୍ତି । ପୂର୍ବ ଦୁଇ ମ୍ୟାଚରେ ସେ ଦମଦାର ଶତକ ହାସଲ କରିଛନ୍ତି । ଆଜିର ମ୍ୟାଚରେ ମଧ୍ୟ କିଛି ବଡ ଇନିଂସ ଖେଳି ପାରନ୍ତି । ତାଙ୍କୁ ରୋକିବାକୁ ହେଲେ ପଞ୍ଜାବ ବୋଲରଙ୍କୁ କିଛି କମାଲ କରିବାକୁ ପଡିବ । ମୟଙ୍କ ନେତୃତ୍ବରେ ଦଳ ଆଜିର ମ୍ୟାଚ ଜିତିବାକୁ କୌଣସି ସୁଯୋଗ ହାତଛଡା କରିବ ନାହିଁ ।