ମୁମ୍ବାଇ: ମହିଳା ପ୍ରିମିୟର ଲିଗରେ ଦମଦାର ମୁମ୍ବାଇ ଇଣ୍ଡିଆନ୍ସ ଫର୍ମରେ ରହିଛି । ଲଗାତାର ଦ୍ବିତୀୟ ବିଜୟ ହାସଲ କରିଛି ହର୍ମନପ୍ରୀତ କୌରଙ୍କ ନେତୃତ୍ବାଧୀନ ମୁମ୍ବାଇ । ବ୍ରାବୋର୍ଣ୍ଣ ଷ୍ଟାଡିୟମରେ ଖେଳାଯାଇଥିବା ମ୍ୟାଚରେ ସ୍ମୃତି ମାନ୍ଧନାଙ୍କ ଦଳ ରୟାଲ ଚାଲେଞ୍ଜର୍ସ ବାଙ୍ଗାଲୋରକୁ 9 ୱିକେଟରେ ହରାଇଛି ମୁମ୍ବାଇ । ଅଲରାଉଣ୍ଡର ହେଲି ମାଥ୍ୟୁସଙ୍କ ଦମଦାର ବ୍ୟାଟିଂ ଓ ବୋଲିଂ ମୁମ୍ବାଇକୁ କ୍ରମାଗତ ଦ୍ବିତୀୟ ବିଜୟ ଦେଇଛି । 3 ୱିକେଟ ନେବା ସହ ଅପରାଜିତ 77 ରନର ପାଳି ଖେଳିଥିବାରୁ ହେଲି ମାଥ୍ୟୁସ ପ୍ଲେୟାର ଅଫ ଦି ମ୍ୟାଚ ବିବେଚିତ ହୋଇଥିଲେ । ଆରସିବିର ଲଗାତର ଦ୍ବିତୀୟ ପରାଜୟ ହୋଇଛି ।
ଟସ ଜିତି ପ୍ରଥମେ ରୟାଲ ଚାଲେଞ୍ଜର୍ସ ବ୍ୟାଟିଂ ନିଷ୍ପତ୍ତି ନେଇଥିଲା । ଦୁଇ ଓପରନ ସ୍ମୃତି ମାନ୍ଧନା ଓ ସୋଫି ଡିଭାଇନ ଭଲ ଆରମ୍ଭ କରିଥିଲେ । ଉଭୟ ପ୍ରଥମ ୱିକେଟ ପାଇଁ 39 ରନ ସଂଗ୍ରହ କରିଥିଲେ । ପଞ୍ଚମ ଓଭରରେ ସାଇକା ଇଶାକ ଏହି ଯୋଡିକୁ ଭାଙ୍ଗିଥିଲେ । ସୋଫି 16 ରନ କରି ଆଉଟ ହୋଇଥିଲେ । ଏହାପରେ ବିପର୍ଯ୍ୟୟର ସମ୍ମୁଖୀନ ହୋଇଥିଲା ଆରସିବି । ବ୍ୟାଟିଂ କରିବାକୁ ଆସିଥିବା ଦିଶା କସାଟ ଖାତା ଖୋଲି ନପାରି ଆଉଟ ହୋଇଥିଲେ । ଦିଶା ସାଇକା ଇଶାକଙ୍କ ଦ୍ବିତୀୟ ଶିକାର ଥିଲେ । ପରେ ପରେ ସ୍ମୃତି ମାନ୍ଧାନାଙ୍କୁ ପାଭିଲିୟନ ପଠାଇତିଲେ ହେଲି ମାଥ୍ୟୁସ । 23 ରନ କରି ସଅଳ ପାଭିଲିୟନ ଫେରିଥିଲେ ସ୍ମୃତି । ପୁଣି ଆଉ ଗୋଟିଏ ଶିକାର କରିଥିଲେ ହେଲି ମାଥ୍ୟୁସ । ହିଥର ନାଇଟ ଖାତା ଖୋଲିବା ପୂର୍ବରୁ ପାଭିଲିୟନ ଫେରିଥିଲେ ।
ଦଳୀୟ ସ୍କୋର ମାତ୍ର 43ରେ 4ଟି ୱିକେଟ ପତନ ହୋଇଥିଲା । ପରେ ପରେ ଏଲିସ ପେରୀ 13 ରନ କରି ଆଉଟ ହୋଇଥିଲେ । ଗୋଟିଏ ପରେ ଗୋଟିଏ ୱିକେଟ ପତନ ହେବା ଦଳକୁ ସଙ୍କଟରେ ପକାଇଥିଲା । ଦଳୀୟ ସ୍କୋର 100ଛୁଇଁବା ମୁସ୍କିଲ ହୋଇପଡିଥିଲା । 71ରନରେ ଦଳ 5ଟି ୱିକେଟ ହରାଇଥିଲା । ମଧ୍ୟଭାଗରେ ରିଚା ଘୋଷ, କନିକା, ଆହୁଜା, ଶ୍ରେୟଙ୍କା ପାଟିଲ ଓ ମୋଗାନ ସ୍କଟ ବ୍ୟାଟିଂ କରି ଦଳୀୟ ସ୍କୋରକୁ 155ରେ ପହଞ୍ଚାଇଥିଲେ । ରିଚା 28, କନିକା 22, ଶ୍ରେୟଙ୍କା 23 ଓ ସ୍କଟ 29 ରନ କରିଥିଲେ । ମୁମ୍ବାଇ ପକ୍ଷରୁ ହେଲି ମାଥ୍ୟୁସ 3ଟି, ଇଶାକ ଓ ଆମେଲିଆ କେର 2ଟି ଲେଖାଏଁ ୱିକେଟ ନେଇଥିଲେ ।