ଚେନ୍ନାଇ: ଆଇପିଏଲ 2021ର 13ତମ ମୁକାବିଲାରେ ଡିଫେଣ୍ଡିଂ ଚମ୍ପିଆନ ମୁମ୍ବାଇ ଇଣ୍ଡିଆନ୍ସକୁ ଭେଟିବ ଦିଲ୍ଲୀ କ୍ୟାପିଟାଲ୍ସ । ଗତ ଆଇପିଏଲ ସିଜିନ ଫାଇନାଲ ମ୍ୟାଚରେ ଦିଲ୍ଲୀକୁ ହରାଇ ଚମ୍ପିଆନ ହୋଇଥିଲା ମୁମ୍ବାଇ। ଚେନ୍ନାଇର ଏମଏ ଚିଦାମ୍ବରମ ଷ୍ଟାଡିୟମରେ ଖେଳାଯିବାକୁ ଥିବା ଆଜିର ମ୍ୟାଚରେ ପୁନଃ ଫାଇନାଲ ଭଳି କଡ଼ା ଟକ୍କର ଦେଖିବାକୁ ମିଳିପାରେ।
ଆଇପିଏଲର 14ତମ ସଂସ୍କରଣର ପଏଣ୍ଟ ତାଲିକାର ତୃତୀୟ ସ୍ଥାନରେ ରହିଛି ଦିଲ୍ଲୀ କ୍ୟାପିଟାଲ୍ସ। ତା ପଛକୁ ମୁମ୍ବାଇ ଇଣ୍ଡିଆନ୍ସ 3ଟିରୁ 2ଟି ମ୍ୟାଚ ଜିତି ଚତୁର୍ଥ ସ୍ଥାନରେ ରହିଛି। ଗତ ମ୍ୟାଚର ଦୁଇ ଦଳର ବୋଲିଂ ଓ ବ୍ୟାଟିଂ ଉଚ୍ଚ କୋଟିର ରହିଥିଲା। ଦୁଇ ଦଳ 3ଟି ଲେଖାଏଁ ମ୍ୟାଚ ଖେଳିଥିବାବେଳେ ଗୋଟିଏରେ ପରାଜିତ ହୋଇଛନ୍ତି। ଆଜିର ମ୍ୟାଚରେ କିଏ ବାଜିମାତ କରିବ ତାହା ରୋମାଞ୍ଚକର ବିଷୟ ହେବ।
ଦିଲ୍ଲୀ କ୍ୟାପିଟାଲ୍ସର ଅଫ ସ୍ପିନର ରବି ଚନ୍ଦ୍ରନ ଅଶ୍ବୀନଙ୍କ ଉପରେ ସଭିଁଙ୍କ ନଜର ରହିବ। ପଞ୍ଜାବ କିଙ୍ଗ୍ସ ବିପକ୍ଷରେ ସେ ଭଲ ବୋଲିଂ କରିଥିଲେ। ତାଙ୍କ ବିରୋଧରେ ରନ ସଂଗ୍ରହ କରି ପାରିନଥିଲେ ବ୍ୟାଟ୍ସମ୍ୟାନ। ସେପଟେ ମୁମ୍ବାଇର ରାହୁଲ ଚହର ମଧ୍ୟ ଭଲ ଫର୍ମରେ ରହିଛନ୍ତି। ମୁମ୍ବାଇ ବିଜୟୀ ହୋଇଥିବା ଦୁଇଟି ମ୍ୟାଚରେ ସେ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିଛନ୍ତି। କୋଲକାତା ବିପକ୍ଷରେ 4ଟି ଓ ହାଇଦ୍ରାବାଦ ବିପକ୍ଷରେ 3ଟି ୱିକେଟ ନେଇଥିଲେ ରାହୁଲ ଚହର।
ଦିଲ୍ଲୀ କ୍ୟାପିଟାଲ୍ସ ପାଇଁ ଚିନ୍ତାର ବିଷୟ ହୋଇପାରେ ଚେନ୍ନାଇର ପିଚ। ଖେଳ ବଢ଼ିବା ସହ ଚେନ୍ନାଇ ପିଚ ଧିମା ହେଉଥିବା ଦେଖାଯାଇଛି। ମୁମ୍ବାଇ ଇଣ୍ଡିଆନ୍ସ ଏହି ପିଚରେ ମ୍ୟାଚ ଖେଳି ସାରିଥିବା ବେଳେ ଦିଲ୍ଲୀରେ ଏହି ପିଚରେ ତାର ପ୍ରଥମ ମ୍ୟାଚ ଖେଳିବ।