ହାଇଦ୍ରାବାଦ: ସରିଛି ଆଇପିଏଲ ୨୦୨୩ ମହାସମର । ପୁଣିଥରେ ଆଇପିଏଲରେ ସଫଳ ହୋଇଛନ୍ତି ଏହି ଟୁର୍ଣ୍ଣାମେଣ୍ଟର ସଫଳତମ ଅଧିନାୟକ ମହେନ୍ଦ୍ର ସିଂହ ଧୋନୀ । ତେବେ ରାଜନୀତିକୁ ଆସିବେ କି ଏହି ଦକ୍ଷ କ୍ରିକେଟର । ଖେଳ ଜଗତରେ ତାଙ୍କର ନେତୃତ୍ବ ନେବାର ଦକ୍ଷତା ସାରାଦେଶ ଦେଖିଛି । ଆଇପିଏଲ ୨୦୨୩ରେ ଧୋନୀଙ୍କ ନେତୃତ୍ବାଧିନ ଚେନ୍ନାଇ ସୁପରକିଙ୍ଗସ ଦଳ ସଫଳତା ପାଇବା ପରେ ଏହାର ଶ୍ରେୟ ମହେନ୍ଦ୍ର ସିଂହ ଧୋନୀଙ୍କୁ ଦେବା ସହ ଉଚ୍ଚ ପ୍ରଶଂସା କରିଛନ୍ତି ବିଶିଷ୍ଟ ଶିଳ୍ପପତି ତଥା ମହିନ୍ଦ୍ରା ଗ୍ରୁପ୍ର ଅଧ୍ୟକ୍ଷ ଆନନ୍ଦ ମହିନ୍ଦ୍ରା । ଏହା ସହିତ ରାଜନୀତିରେ ପ୍ରବେଶ ନେଇ ଧୋନୀ ଭାବିବା ଉଚିତ ବୋଲି ସେ ଲେଖିଛନ୍ତି ।
ଆଇପିଏଲ ୨୦୨୩ର ଫାଇନାଲ ମ୍ୟାଚ୍ ଯଦିଓ ମେ ୨୮ରେ ଖେଳାଯିବାର ସୂଚୀ ରହିଥିଲା, ହେଲେ ବର୍ଷା ବାଧକ ସାଜିବାରୁ ଏହା ୨୯କୁ ସ୍ଥଗିତ ରହିଥିଲା । ଏହାପରେ ୨୯ରେ ମଧ୍ୟ ବର୍ଷା ମ୍ୟାଚ୍କୁ ଅଧାରୁ ଅଟକାଇଥିଲା । ତେବେ ବିଳମ୍ବିତ ରାତିରେ ରୋମାଞ୍ଚକର ଭାବେ ଗୁଜରାଟକୁ ହରାଇ ଚମ୍ପିଆନ୍ ହୋଇଛି ମହେନ୍ଦ୍ର ସିଂହ ଧୋନୀଙ୍କ ଚେନ୍ନାଇ ସୁପରକିଙ୍ଗସ । ଅଧିନାୟକ ଭାବେ ଏହି ବିଜୟର ଶ୍ରେୟ ନିଶ୍ଚୟ ଧୋନୀଙ୍କର । ବହୁ ବିଶିଷ୍ଟ ବ୍ୟକ୍ତି ଏନେଇ ଧୋନୀଙ୍କୁ ଶୁଭେଚ୍ଛା ଜଣାଇଛନ୍ତି । ତେବେ ସମସ୍ତଙ୍କ ମଧ୍ୟରେ ଚର୍ଚ୍ଚାର କେନ୍ଦ୍ର ପାଲଟିଛି ବିଶିଷ୍ଟ ଶିଳ୍ପପତି ତଥା ମହିନ୍ଦ୍ରା ଗ୍ରୁପ୍ର ଅଧ୍ୟକ୍ଷ ଆନନ୍ଦ ମହିନ୍ଦ୍ରାଙ୍କ ଟ୍ବିଟ୍ ।