ଦୁବାଇ: ନିରାଶ ବିରାଟବାହିନୀ । ଶେଷ ସୁଯୋଗ ହାତଛଡା ହୋଇଛି । ଚଳିତ ଆପିଏଲରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରର ଅଭିଯାନ ଶେଷ ହୋଇଛି । ଟ୍ରଫି ଜିତିବା ପାଇଁ ଦେଖିଥିବା ସ୍ବପ୍ନ ଚୁରମାର ହୋଇଛି । ଆଇପିଏଲ ଏଲିମିନେଟର ମ୍ୟାଚରେ ଆଉଟ ହୋଇଛି ଆରସିବି । ଅନୁଷ୍ଠିତ ଏଲିମିନେଟର ମ୍ୟାଚରେ କୋଲକାତାଠାରୁ ୪ୱିକେଟରେ ପରାସ୍ତ ହୋଇ ଟ୍ରଫି ଦୌଡରୁ ବାଦ ପଡିଛି ବାଙ୍ଗାଲୋର ।
ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲେ RCB କ୍ୟାପଟେନ ବିରାଟ କୋହଲି । ଫଳରେ ନିର୍ଦ୍ଧାରିତ ୨୦ ଓଭରରେ ୭ ୱିକେଟ ହରାଇ ୧୩୮ ରନ୍ ସଂଗ୍ରହ କରିଥିଲା ବାଙ୍ଗାଲୋର । RCB ପକ୍ଷରୁ କ୍ୟାପଟେନ ବିରାଟ କୋହଲି ୩୩ ବଲ୍ରୁ ୫ ଚୌକା ସହାୟତାରେ ସର୍ବାଧିକ ୩୯ ରନ୍ର ଇଂନିସ ଖେଳିଥିଲେ । ଦେବଦତ୍ତ ପାଦିକ୍କଲ ୨୧ ଓ ଗ୍ଳେନ ମାକ୍ସୱେଲ ୧୫ ରନ୍ କରିଥିଲେ । ଷ୍ଟାର ବ୍ୟାଟ୍ସମ୍ୟାନ ଏବି ଡିଭିଲିୟର୍ସ ମାତ୍ର ୧୧ ରନ୍ କରିଥିଲେ । ଭେଟେରାନ ସ୍ପିନର ସୁନିଲ ନାରାଏନଙ୍କ ଘାତକ ବୋଲିଂ ସାମ୍ନା କରିପାରିନଥିଲା ବାଙ୍ଗାଲୋର । ନାରାଏନ ୪ ଓଭର ବୋଲିଂ କରି ୨୧ ରନ୍ ବ୍ୟୟରେ ୪ଟି ୱିକେଟ ଅକ୍ତିଆର କରିଥିଲେ । କ୍ବାଲିଫାୟାର ୨ ମୁକାବିଲା ଖେଳିବାକୁ KKR ସାମ୍ନାରେ ୧୩୯ ରନ୍ର ବିଜୟ ଲକ୍ଷ୍ୟ ରହିଥିଲା ।