ହାଇଦ୍ରାବାଦ:ଆଇପିଏଲ 16ତମ ସଂସ୍କରଣରେ ଆଜି ରହିଛି ଡବଲ ହେଡର ମ୍ୟାଚ । ରାଜସ୍ଥାନ ରୟାଲ୍ସକୁ ଭେଟିବ ଦିଲ୍ଲୀ କ୍ୟାପିଟାଲ୍ସ ଓ ମୁମ୍ବାଇ ଇଣ୍ଡିଆନ୍ସ ସହ ମୁହାଁମୁହିଁ ହେବ ଚେନ୍ନାଇ ସୁପ କିଙ୍ଗ୍ସ । ଅପରାହ୍ନ 3ଟା ସମୟରେ ବର୍ଷାପଡା ଷ୍ଟାଡିୟମରେ ରାଜସ୍ଥାନ ଓ ଦିଲ୍ଲୀ ମଧ୍ୟରେ ମୁକାବିଲା ହେବ । ଘରୋଇ ଗ୍ରାଉଣ୍ଡରେ ଦ୍ବିତୀୟ ଥର ପାଇଁ ଚଳିତ ସିଜିନରେ ରାଜସ୍ଥାନ ଏହି ମ୍ୟାଚ ଖେଳିବ । ପୂର୍ବ ମ୍ୟାଚରେ ରାଜସ୍ଥାନ ବିଜୟ ହାସଲ କରିଥିବା ବେଳେ ଆଜିର ମ୍ୟାଚରେ ବିଜୟ ଧାରା ଜାରି ରଖିବାକୁ ଚେଷ୍ଟା କରିବ ସଞ୍ଜୁ ସାମନଙ୍କ ବାହିନୀ ।
ଅନ୍ୟପଟେ ଦିଲ୍ଲୀ ବର୍ତ୍ତମାନ ସୁଦ୍ଧା ଗୋଟିଏ ବି ମ୍ୟାଚରେ ବିଜୟୀ ହୋଇନଥିବା ବେଳେ ଏହି ଧାରା ଭାଙ୍ଗିବାକୁ ଚେଷ୍ଟା କରିବ । ଚଳିତ ସିଜିନରେ ଲକ୍ଷ୍ନୌ ସହ ପ୍ରଥମ ମ୍ୟାଚ ଖେଳିଥିଲା ଦିଲ୍ଲୀ । କିନ୍ତୁ ଏଥିରେ ଦଳ ବିଜୟୀ ହେବାରେ ବଞ୍ଚିତ ହୋଇଥିଲା । ସେହିପରି ଦ୍ବିତୀୟ ମ୍ୟାଚରେ ଗୁଜୁରାଟକୁ ଭେଟିଥିବା ବେଳେ ଏଥିରେ ମଧ୍ୟ ପରାଜିତ ହୋଇଥିଲା । ତେବେ ଦୁଇଟି ମ୍ୟାଚରେ ପରାଜିତ ହୋଇ ପଏଣ୍ଟ ଟେବୁଲର 8ନମ୍ବର ସ୍ଥାନରେ ରହିଛି ଦିଲ୍ଲୀ । ଋଷଭ ପନ୍ତଙ୍କ ଅନୁପସ୍ଥିତି ଦଳ ଉପରେ ପ୍ରଭାବ ପକାଉଥିବା ମନେ ହେଉଛି । ଆଜିର ମ୍ୟାଚ ଦିଲ୍ଲୀ ପାଇଁ ଗୁରୁତ୍ବପୂର୍ଣ୍ଣ ରହିଛି । ଡେଭିଡ ଓ୍ବାର୍ଣ୍ଣରଙ୍କ ନେତୃତ୍ବରେ ପଡିଆକୁ ଓହ୍ଳାଇବ ଡିସି ।