ଜୟପୁର:ଘରୋଇ ଗ୍ରାଉଣ୍ଡରେ ଲକ୍ଷ୍ନୌ ଠାରୁ 10 ରନରେ ହାରିଲା ରାଜସ୍ଥାନ । ଆଜିର ମ୍ୟାଚରେ ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ 20 ଓଭରରେ କେବଳ 154 ରନ କରିପାରିଥିଲା ଲକ୍ଷ୍ନୌ ସୁପର ଜିଆଣ୍ଟ୍ସ । ତେବେ 155 ରନର ବିଜୟ ଲକ୍ଷ୍ୟ ଠାରୁ ମାତ୍ର 10 ରନ ପଛରେ ଅଟକି ଯାଇଥିଲା ରାଜସ୍ଥାନ ରୟାଲ୍ସ । ନିର୍ଦ୍ଧାରିତ 20 ଓଭରରେ 6 ୱିକେଟ ହରାଇ କେବଳ 144 ରନ ହିଁ କରିପାରିଛି ଦଳ ।
ଏହି ମ୍ୟାଚରେ ପ୍ରଥମେ ଟସ ଜିତି ଫିଲ୍ଡିଂ ନିଷ୍ପତି ନେଇଥିଲେ ରାଜସ୍ଥାନ ଅଧିନାୟକ ସଞ୍ଜୁ ସାମସନ । ପ୍ରଥମେ ବ୍ୟାଟିଂ କରିବାକୁ ଆସି ଦମଦାର ଆରମ୍ଭ କରିଥିଲା ଲକ୍ଷ୍ନୌ । ପ୍ରଥମ ୱିକେଟ ପାଇଁ ଅଧିନାୟକ କେଏଲ ରାହୁଲ ଓ କାୟଲ ମାୟର୍ସଙ୍କ ମଧ୍ୟରେ 82 ରନର ଭାଗିଦାରୀ ହୋଇଥିଲା । ତେବେ 32 ବଲରୁ 39 ରନ କରି ଜାଶନ ହୋଲ୍ଡରଙ୍କ ବଲରେ ଆଉଟ ହୋଇଥିଲେ ରାହୁଲ । ଏହାପରେ ତୁରନ୍ତ ଆୟୁଷ ବାଡୋନୀ ଓ ଦୀପକ ହୁଡ୍ଡା କେବଳ 1 ଓ 2 ରନ କରି ଆଉଟ ହୋଇଥିଲେ । ଅନ୍ୟପଟେ ପାଳି ସମ୍ଭାଳୁଥିବା ମାୟର୍ସ ମଧ୍ୟ 42 ବଲରୁ 51 ରନ କରି ଅଶ୍ବିନଙ୍କ ବଲରେ ପାଭିଲିୟନ ମୁହାଁ ହୋଇଥିଲେ । ଦଳ ପକ୍ଷରୁ ମାର୍କସ ଷ୍ଟୋଇନିସ ଓ ନିକୋଲାସ ପୁରନ ଯଥାକ୍ରମେ 21 ଓ 29 ରନ କରି ଆଉଟ ହୋଇଥିଲେ । କୃଣାଲ ପାଣ୍ଡ୍ୟା ଅପରାଜିତ 4 ରନ କରିଥିବା ବେଳେ ଯୁଧବୀର ସିଂହ ମାତ୍ର 1 ରନ କରି ରନ ଆଉଟ ହୋଇଥିଲେ । ଫଳରେ ଦଳ 20 ଓଭର ସୁଦ୍ଧା 7 ୱିକେଟ ବିନିମୟରେ କେବଳ 154 ରନ କରିଥିଲା ।
ରାଜସ୍ଥାନ ପକ୍ଷରୁ ରବିଚନ୍ଦ୍ରନ ଅଶ୍ବିନ 4 ଓଭର ବୋଲିଂ କରି 23 ରନ ବ୍ୟୟରେ ସର୍ବାଧିକ 2ଟି ୱିକେଟ ହାସଲ କରିଥିବା ବେଳେ ଟ୍ରେଣ୍ଟ ବୋଲ୍ଟ, ସନ୍ଦୀପ ଶର୍ମା ଓ ଜାଶନ ହୋଲ୍ଡର ଗୋଟିଏ ଲେଖାଏଁ ୱିକେଟ ନେଇଥିଲେ । ଅନ୍ୟପଟେ 4 ଓଭରରୁ ସର୍ବାଧିକ 41 ରନ ବ୍ୟୟ କରି କୌଣସି ୱିକେଟ ପାଇନଥିଲେ ଚହଲ । ଫଳରେ ସେ ଆଜି ପର୍ପଲ କ୍ୟାପ ହରାଇଛନ୍ତି । ସେ ଚଳିତ ସଂସ୍କରଣରେ ଏବେ ପର୍ଯ୍ୟନ୍ତ 11 ୱିକେଟ ନେଇଛନ୍ତି । ମାର୍କ ଉଡ 11 ୱିକେଟ ହାସଲ କରିଥିଲେ ମଧ୍ୟ ବ୍ୟୟ କରିଥିବା ରନ ହାର ତୁଳନାରେ ସେ ଆଜିଠାରୁ ପର୍ପଲ କ୍ୟାପର ଅଧିକାରୀ ହୋଇଛନ୍ତି ।