କୋଲକାତା: ବୁଧବାର ଖେଳାଯାଇଥିବା ଆଇପିଏଲ 12ର 6ଷ୍ଠ ମ୍ୟାଚରେ ପଞ୍ଜାବକୁ ହରାଇଥିଲା ଘରୋଇ କୋଲକାତା । ରସେଲଙ୍କ ବିସ୍ଫୋରକ ବ୍ୟାଟିଂ ବଳରେ କେକେଆର 28 ରନରେ ବିଜୟୀ ହୋଇଥିଲା । ତେବେ ମ୍ୟାଚରେ ପଞ୍ଜାବ ଅଧିନାୟକ ଅଶ୍ବିନୀଙ୍କ ଏକ ଭୁଲ ଦଳକୁ ମହଙ୍ଗା ପଡିଥିଲା ।
ଲାଗୁଛି ଯେପରି ଏଥର ଆଇପିଏଲ ଅଶ୍ବିନୀଙ୍କ ପାଇଁ ବିବାଦ ଭରା ରହିଛି । ପ୍ରଥମେ ରାଜସ୍ଥାନ ବ୍ୟାଟ୍ସମ୍ୟାନ ବଟଲରଙ୍କ ସହ ମଙ୍କଡ ଆଉଟ ଆଉ ଏବେ ନିଜ ନିଷ୍ପତ୍ତି ପାଇଁ । ମଙ୍କଡ ଆଉଟ ପାଇଁ ସମସ୍ତେ ତାଙ୍କ ଖେଳୁଆଡ ମନୋଭାବକୁ ସମାଲୋଚନା କରିଥିଲେ । ଏବେ କେକେଆର ସହ ମ୍ୟାଚରେ ତାଙ୍କ ନିଷ୍ପତ୍ତି ପାଇଁ ସେ ପୁଣି ଚର୍ଚ୍ଚାର ପରିସରକୁ ଆସିଛନ୍ତି ।
କେକେଆର ବ୍ୟାଟ୍ସମ୍ୟାନ ଆନ୍ଦ୍ରେ ରସେଲ ଉକ୍ତ ମ୍ୟାଚରେ ମାତ୍ର ୩ ରନ କରିଥିବା ବେଳେ ମହମ୍ମଦ ସାମିଙ୍କ ଏକ ୟର୍କରରେ କ୍ଲିନ ବୋଲ୍ଡ ହୋଇଥିଲେ । ପଞ୍ଜାବ ଖେଳାଳି ଖୁସି ମନାଇବାରେ ଲାଗିଥିବାବେଳେ ଅମ୍ପାୟାର ଘୋଷଣା କରିଥିଲେ ନୋ ବଲ । ଏହାକୁ ନେଇ ସମସ୍ତେ ଆଶ୍ଚର୍ଯ୍ୟ ହୋଇଯାଇଥିଲେ । ପରେ ଜଣାପଡିଥିଲା ଅସଲ କଥା ।
ପ୍ରକୃତରେ ନିୟମ ମୁତାବକ ସର୍କଲ ଭିତରେ ୪ ଜଣ ଖେଳାଳି ଆବଶ୍ୟକ । ହେଲେ ସେହି ସମୟରେ ସେଠାରେ 3 ଜଣ ଖେଳାଳି ଥିଲେ ଏବଂ ସର୍କଲ ବାହାରେ 6 ଜଣ ଖେଳାଳି ଥିଲେ । ଫଳରେ ଅମ୍ପାୟାର ସେହି ବଲ୍କୁ ନୋ ବଲ ଘୋଷିତ କରିଥିଲେ । ଏହା ହିଁ ପଞ୍ଜାବ ପାଇଁ ସବୁଠାରୁ ବେଶୀ ମହଙ୍ଗା ସାବ୍ୟସ୍ତ ହୋଇଥିଲା । ଏହାପରେ ରସେଲ ବିସ୍ଫୋରକ ପାଳି ଖେଳିଥିଲେ । ତେବେ ମ୍ୟାଚ ପରେ ଏହି ନୋ ବଲ ପାଇଁ ଅଶ୍ବିନୀ ଦୋଷ ମୁଣ୍ଡାଇଥିଲେ ।
