ଚେନ୍ନାଇ: କ୍ରିକେଟ୍ ଇତିହାସରେ କ୍ୟାପଟେନ୍ କୁଲ ଭାବରେ ପରିଚିତ ମହେନ୍ଦ୍ର ସିଂହ ଧୋନି। ପଡିଆରେ ପରିସ୍ଥିତି ଯେତେ ଜଟିଳ ଥିଲେ ମଧ୍ୟ ନିଜ ନିୟନ୍ତ୍ରଣ ହରାନ୍ତି ନାହିଁ ଧୋନି । ହାରିବା ସ୍ଥିତି ଆସିଯାଇଥିଲେ ମଧ୍ୟ ସେ ଶାନ୍ତ ଓ ବିନ୍ଦାସ ମିଜାଜରେ ସ୍ଥିତି ସମ୍ଭାଳିଥାନ୍ତି । ଏଥିପାଇଁ ଅନେକ ରୋମାଞ୍ଚକର ମ୍ୟାଚରେ ସେ ଶେଷ ମୂହୁର୍ତ୍ତରେ ଦଳକୁ ବିଜୟୀ କରିଥାନ୍ତି ।
ତେବେ ସର୍ବଦା କୁଲ୍ ରହୁଥିବା କ୍ଯାପଟେନ କୁଲଙ୍କ ମିଜାଜ ନିକଟରେ ବିଗିଡି ଯାଇଥିଲା। ଚେନ୍ନାଇର ଏମଏ ଚିଦାମ୍ବରମ ଷ୍ଟାଡିୟମରେ ଶନିବାର କିଙ୍ଗସ୍ ଇଲେଭେନ ପଞ୍ଜାବ ବିପକ୍ଷ ମ୍ୟାଚରେ ଏହି ଦୃଶ୍ୟ ଦେଖିବାକୁ ମିଳିଥିଲା । ଦ୍ରୁତ ବୋଲର ଦୀପକ ଚହରଙ୍କ ଉପରେ ଧୋନି ଖୁବ୍ ରାଗି ଯାଇଥିବା ଦେଖିବାକୁ ମିଳିଥିଲା।
ମ୍ୟାଚର ଦ୍ବିତୀୟ ଇଂନିସର 19 ତମ ଓଭରରେ ଦୀପକ ବୋଲିଂ କରିବାକୁ ଆସିଥିଲେ। ଏହି ସମୟରେ ପଞ୍ଜାବକୁ ବିଜୟ ପାଇଁ ୧୨ ବଲରେ ୩୯ ରନ ଦରକାର ଥିଲା। ବୋଲିଂ କରିବାକୁ ଆସିଥିବା ଚହରଙ୍କ ପ୍ରଥମ ବଲରେ ପଞ୍ଜାବର ସର୍ଫରାଜ ଖାନ୍ ଚୌକା ମାରିଥିଲେ। ତେବେ ଏହି ବଲ ନୋ ବଲ ଥିଲା ଏବଂ ପଞ୍ଜାବକୁ ଫ୍ରି ହିଟ୍ ମିଳିଥିଲା । ଏହା ପର ବଲ ଚହର ପୁଣି ନୋ ବଲ ପକାଇଥିଲେ। ଲଗାତାର 2ଟି ନୋ ବଲ ପାଇଁ ତାଙ୍କ ଉପରେ ଧୋନି ରାଗି ଯାଇଥିଲେ । କ୍ୟାପ୍ଟେନ କୁଲ ହରାଇ ବସିଥିଲେ ନିଜର ନିୟନ୍ତ୍ରଣ । ଚହ୍ବରଙ୍କ ପାଖକୁ ଆସି ତାଙ୍କୁ ରାଗି କରି କିଛି କହିଥିବାର ଦେଖାଯାଇଥିଲା ।