ମାଉଣ୍ଟ ମାଉଙ୍ଗାନୁଇ(ନ୍ୟୁଜିଲାଣ୍ଡ): ଚଳିତ ମହିଳା କ୍ରିକେଟ ବିଶ୍ବକପରେ ବିଜୟରୁ ଅଭିଯାନ ଆରମ୍ଭ କରିଛି ଭାରତ । ପାକିସ୍ତାନ ବିପକ୍ଷରେ ପ୍ରଭାବୀ ପ୍ରଦର୍ଶନ ପରେ ଭାରତୀୟ ମହିଳା ଟିମର ଖେଳାଳି ପାକିସ୍ତାନୀ କ୍ୟାପଟେନ ବିଶମାହ ମାରୁଫଙ୍କ କୁନି ଝିଅ ସହିତ ସେଲଫି ନେଇଥିଲେ । ଏହି ଫଟୋ ଆଇସିସି ସେୟାର କରିବା ପରେ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଫଳରେ ମ୍ୟାଚ୍ ଜିତିବା ସହ ହୃଦୟ ଜିତିଛି ଭାରତୀୟ ମହିଳା କ୍ରିକେଟ ଟିମ ।
ଭାରତର ଚୀର ପ୍ରତିନ୍ଦ୍ବନ୍ଦ୍ବୀ ରହିଛି ପାକିସ୍ତାନ । ଦୁଇ ଦେଶ ମଧ୍ୟରେ ତିକ୍ତ ସଂପର୍କ ଯୋଗୁଁ ଦ୍ବିପାକ୍ଷିକ ସିରିଜ ବନ୍ଦ ଥିବାବେଳେ କେବଳ ଆଇସିସି ଟୁର୍ନାମେଣ୍ଟରେ ଭାରତ ଓ ପାକିସ୍ତାନ ଟିମ ସାମ୍ନାସାମ୍ନି ହେଉଛନ୍ତି । ଦୁଇ ଟିମ ମଧ୍ୟରେ କ୍ରିକେଟ ମ୍ୟାଚ୍କୁ ନେଇ ପ୍ରବଳ ଉତ୍ସାହ ରହିଥାଏ । ତେବେ ଭାରତୀୟ ଖେଳାଳିଙ୍କ ଖେଳୁଆଡ ମନୋଭାବଙ୍କୁ ବିଶ୍ବର ଅନେକ କ୍ରିକେଟ ଫ୍ୟାନ୍ସ ପ୍ରଶଂସା କରୁଛନ୍ତି ।
ଅନ୍ତର୍ଜାତୀୟ କ୍ରିକେଟ ପରିଷଦ(ICC) ନିଜର ଅଫିସିଆଲ ଟ୍ବିଟର ଆକାଉଣ୍ଟରେ ପୋଷ୍ଟ କରିଥିବା ଏହି ଫଟୋରେ ଭାରତୀୟ କ୍ୟାପଟେନ ମିତାଲି ରାଜ, ଶେଫାଳି ବର୍ମା, ସ୍ମୃତି ମାନ୍ଧାନା ଓ ଅନ୍ୟମାନେ ବିଶମାହ ମାରୁଫଙ୍କ ଝିଅ ଫାତିମାଙ୍କ ସହିତ ରହିଛନ୍ତି । ଏହି ଫଟୋର କ୍ୟାପ୍ସନରେ ଭାରତ ଓ ପାକିସ୍ତାନର ସ୍ପିରିଟ ଅଫ୍ କ୍ରିକେଟ ବୋଲି ଆଇସିସି ଟ୍ବିଟ୍ କରିଛି ।