ଡୋମିନିକା: ଭାରତ ଓ ଘରୋଇ ୱେଷ୍ଟଇଣ୍ଡିଜ ମଧ୍ୟରେ ପ୍ରଥମ ଟେଷ୍ଟ ଆରମ୍ଭ ହୋଇଛି । ଏଥିରେ ଦମଦାର ଆରମ୍ଭ କରିଛି ଭାରତୀୟ ଦଳ । ପ୍ରଥମ ଦିନରେ ଭାରତୀୟ ବୋଲର ଆଧିପତ୍ୟ ବିସ୍ତାର କରିଛନ୍ତି । ରବି ଚନ୍ଦ୍ରନ ଅଶ୍ବିନୀଙ୍କ ଯାଦୁଗରୀ ସ୍ପିନ ଜାଲରେ ଫସିଛନ୍ତି ଇଣ୍ଡିଜ ବ୍ୟାଟର । ପ୍ରଥମ ଇନିଂସରେ ମାତ୍ର 150 ରନ କରି ଅଲଆଉଟ ହୋଇଛି ୱେଷ୍ଟଇଣ୍ଡିଜ । ଅଶ୍ବିନୀ 5ଟି ୱିକେଟ ଅକ୍ତିଆର କରିଛନ୍ତି । ଭାରତ ପ୍ରଥମ ପାଳି ଆରମ୍ଭ ହୋଇଛି । ଅଧିନାୟକ ରୋହିତ ଶର୍ମା ଓ ଯଶସ୍ବୀ ଜୈସ୍ବାଲ ବ୍ୟାଟିଂ ଜାରି ରଖିଛନ୍ତି ।
ଟସ୍ ଜିତି ପ୍ରଥମ ବ୍ୟାଟଂ ନିଷ୍ପତ୍ତି ନେଇଥିଲା ଘରୋଇ ୱେଷ୍ଟଇଣ୍ଡିଜ । ଦଳ ପକ୍ଷରୁ କ୍ରେଗ ବ୍ରାଥୱେଟ ଓ ତେଜନାରାଏନ ଚନ୍ଦରପାଲ୍ ସତର୍କତାର ସହ ପାଳି ଆରମ୍ଭ କରିଥିଲେ । ଦଳୀୟ ସ୍କୋର 31 ବେଳକୁ ଇଣ୍ଡିଜର ପ୍ରଥମ ୱିକେଟ ପତନ ହୋଇଥିଲା । ତେଜନାରାଏନ ଚନ୍ଦରପାଲ୍ ଅଶ୍ବିନୀଙ୍କ ଶିକାର ହୋଇଥିଲେ । ଚନ୍ଦରପାଲ 44ବଲରେ 12ରନ କରି ସଅଳ ପାଭିଲିୟନ ଫେରିଥିଲେ । ଏହାପରେ 20 ରନ କରି ଅଶ୍ବିନଙ୍କ ବଲରେ ଆଉଟ ହୋଇଥିଲେ କ୍ରେଗ ବ୍ରାଥୱେଟ । ଏହା ପରେ ଜର୍ମେନ ବ୍ଲାକଉଡ ଓ ରେମନ ରିଫର ବ୍ୟାଟିଂ କରିଥିଲେ । ଦଳୀୟ ସ୍କୋର 47ରେ ସାର୍ଦୁଳ ଠାକୁରଙ୍କ ଶିକାର ହୋଇଥିଲେ ରେମନ ରିଫର । ସେ 18 ବଲରେ ମାତ୍ର 2 ରନ କରି ଆଉଟ ହୋଇଥିଲେ । ଏହାପରେ ଏଲିକ ଆଥାଞ୍ଜି ଓ ଜର୍ମେନ ବ୍ଲାକଉଡ୍ ସ୍ଥିତି ସୁଧାରିବାକୁ ପ୍ରୟାସ କରିଥିଲେ । ଚତୁର୍ଥ ୱିକେଟରେ ଉଭୟ 21 ରନ ଯୋଡ଼ିଥିଲେ ।
ଲଞ୍ଚ୍ ବ୍ରେକ ପୂର୍ବରୁ ଜାଡେଜା ଆଉ ଏକ ୱିକେଟ ନେଇ ଘରୋଇ ଦଳକୁ ଘାଇଲା କରିଥିଲେ । ଜର୍ମେନ ବ୍ଲାକଉଡ 34 ବଲରେ 14 ରନ କରି ଆଉଟ ହୋଇଥିଲେ । ଦଳୀୟ ସ୍କୋର 68ରେ ଇଣ୍ଡିଜ 4 ୱିକେଟ ହରାଇ ସଙ୍କଟରେ ପଡିଥିଲା । ଲଞ୍ଚ୍ ବ୍ରେକ ପରେ ଅଶ୍ବିନୀଙ୍କୁ ଆଉ ଏକ ସଫଳତା ମିଳିଥିଲା । ଜୋଶୁଆ ଡା ସିଲଭା ଅଶ୍ବିନଙ୍କ ସ୍ପିନର ସାମ୍ନା କରି ପାରନଥିଲେ । 2 ରନ କରି ଆଉଟ ହୋଇଥିଲେ । ଦଳୀୟ ସ୍କୋର 76ରେ ଇଣ୍ଡିଜ 5ଟି ୱିକେଟ ହରାଇ ସାରିଥିଲା । ଏଲିକ ଆଥାଞ୍ଜି ଓ ଜାସନ ହୋଲ୍ଡର ସ୍ଥିତି ସମ୍ଭାଳି ବ୍ୟାଟିଂ କରିଥିଲେ । ମାତ୍ର ଭାରତୀୟ ବୋଲରଙ୍କ ଆଗରେ ବେଶୀ ସମୟ ତିଷ୍ଠି ପାରିନ ଥିଲେ । 49ତମ ଓଭରରେ ଜେସନ ହୋଲ୍ଡର 18 ରନ କରି ମହମ୍ମଦ ସିରାଜଙ୍କ ଶିକାର ହୋଇଥିଲେ । ଏହା ପରେ ବ୍ୟାଟିଂ କରିବାକୁ ଆସିଥିବା ଆଲଜାରୀ ଜୋସେଫ 4 ରନ କରି ଅଶ୍ବିନୀଙ୍କ ଶିକାର ହୋଇଥିଲେ । 54ତମ ଓଭରରେ ଅଶ୍ବିନୀଙ୍କୁ ଆଉ ଏକ ସଫଳତା ମିଳିଥିଲା । ଏଲିକ ଆଥାଞ୍ଜି 47 ରନ କରି ଆଉଟ ହୋଇଥିଲେ ।