କଲମ୍ବୋ:ଶନିବାର ପୁଣିଥରେ ଗରମ ହେବ ମୈଦାନ । ପୁଣିଥରେ କ୍ରିକେଟ୍ ମୈଦାନରେ ମୁହାଁମୁହିଁ ହେବାକୁ ଯାଉଛନ୍ତି ଦୁଇ ପାରମ୍ପାରିକ ପ୍ରତିଦ୍ବନ୍ଦ୍ବୀ ଭାରତ ଓ ପାକିସ୍ତାନ । ଟି୨୦ ବିଶ୍ବକପ୍ ପରେ ପୁଣି ଥରେ ଭାରତ ଓ ପାକିସ୍ତାନ ମଧ୍ୟରେ ହେବାକୁ ଯାଉଛି ଆଉ ଏକ ରୋମାଞ୍ଚଭରା ମ୍ୟାଚ୍ । ଗତ ଅଗଷ୍ଟ ୩୦ ତାରିଖରୁ ଆରମ୍ଭ ହୋଇଥିବା ଏସିଆ କପ୍ ୨୦୨୩ରେ ଅଭିଯାନ ଆରମ୍ଭ କରିବ ଟିମ୍ ଇଣ୍ଡିଆ । ତାହା ପୁଣି ପାକିସ୍ତାନ ବିପକ୍ଷରେ ଶନିବାର ପ୍ରଥମ ମ୍ୟାଚ୍ ଖେଳି । ତେବେ ଦିନିକିଆ ହେଉ ବା ଟି୨୦, ପ୍ରତି ଫର୍ମାଟ୍ରେ ଦୁଇ ପଡ଼ୋଶୀଙ୍କ ମଧ୍ୟରେ ହେଉଥିବା ମ୍ୟାଚ୍ରେ ଏକାଧିକ କୀର୍ତ୍ତିମାନ ରହିଛି । ତେବେ ଏସିଆ କପ୍ରେ ଭାରତର ପଲ୍ଲା ଭାରି ରହିଥିବାବେଳେ ଦିନିକିଆ କ୍ରିକେଟ ଇତିହାସରେ ପାକିସ୍ତାନ ଭାରତଠାରୁ ଢେର ଆଗରେ ରହିଛି ।
ଏସିଆ କପ୍ରେ ଭାରତର ପଲ୍ଲା ଭାରି: ୧୯୮୪ ମସିହାରୁ ଆରମ୍ଭ ହୋଇଥିବା ଏସିଆ କପ୍ରେ ଉଭୟ ଟି୨୦ ଓ ଦିନିକିଆ ଫର୍ମାଟ୍ରେ ଖେଳ ହୋଇଛି । ତେବେ ପାକିସ୍ତାନ ବିପକ୍ଷରେ ବର୍ତ୍ତମାନ ସୁଦ୍ଧା ଭାରତ ଦିନିକିଆ ଫର୍ମାଟ୍ରେ ୬ ଥର ଏବଂ ଟି୨୦ରେ ଥରେ ବିଜେତା ହୋଇଛି । ସେହିଭଳି ପାକିସ୍ତାନ ଦିନିକିଆରେ ୨ ଥର ବିଜେତା ହୋଇଛି । ମୋଟାମୋଟି ଭାବେ ଏସିଆ କପ୍ରେ ଭାରତ ୪୯ ଦିନିକିଆ ଖେଳିସାରିଛି । ସେଥିମଧ୍ୟରୁ ୩୧ ମ୍ୟାଚ୍ରେ ଭାରତ ବିଜୟୀ ହୋଇଛି । ଶନିବାର ପାକିସ୍ତାନ ବିପକ୍ଷରେ ୫୦ତମ ମ୍ୟାଚ୍ ଖେଳିବ ଭାରତ । ଦିନିକିଆ ଫର୍ମାଟ୍ରେ ଭାରତ ଆଗକୁ ଶ୍ରୀଲଙ୍କା ଏକମାତ୍ର ଦଳ ଭାବେ ସର୍ବାଧିକ ୩୪ ଦିନିକିଆ ବିଜୟ ପାଇଛି । ଦିନିକିଆ ଫର୍ମାଟ୍ରେ ଏସିଆ କପ୍ରେ ୧୩ଟି ସଂସ୍କରଣ ଆୟୋଜିତ ହୋଇଥିବାବେଳେ ଭାରତ ୧୨ଟିରେ ଖେଳିଛି । ୧୯୮୬ ଏସିଆ କପ୍ରେ ଭାରତ ଅଂଶଗ୍ରହଣ କରିନଥିଲା । ୧୯୮୪, ୧୯୮୮, ୧୯୯୦, ୧୯୯୫, ୨୦୧୦ ଓ ୨୦୧୮ରେ ଭାରତ ଏସିଆ କପ୍ ଚମ୍ପିଆନ୍ ହୋଇଛି । ଅନ୍ୟପଟେ ୨୦୦୦ ମସିହାରେ ପାକିସ୍ତାନ ପ୍ରଥମ ଥର ପାଇଁ ଏସିଆ କପ୍ ବିଜେତା ହୋଇଥିଲା । ପୁଣି ଦ୍ବିତୀୟ ଟ୍ରଫି ପାଇଁ ପଡ଼ୋଶୀ ଦଳକୁ ଆହୁରି ୧୨ ବର୍ଷ ଲାଗିଯାଇଥିଲା ।