ମୁମ୍ବାଇ:ଆଇସିସି ବିଶ୍ବ ଟେଷ୍ଟ ଚମ୍ପିଆନସିପ ଫାଇନାଲ ମ୍ୟାଚ୍କୁ ନେଇ କ୍ରିକେଟ ମହଲରେ ବଢୁଛି ଉଷ୍ମତା । ବିରାଟ କୋହଲିଙ୍କ ନେତୃତ୍ବରେ ଫାଇନାଲ ଖେଳିବାକୁ ଥିବା ଟିମ ଇଣ୍ଡିଆ ନ୍ୟୁଜିଲାଣ୍ଡକୁ ହାଲୁକା ଭାବେ ନେବା ଉଚିତ ହେବନାହିଁ । ଏହା କହିଛନ୍ତି ପୂର୍ବତନ ଭାରତୀୟ ଦ୍ରୁତ ବୋଲର ଅଜିତ ଅଗରକର ।
ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ସାଉଥାମ୍ପଟନର ଏଜେସ ବାଉଲରେ ଜୁନ 18ରୁ WTC ଫାଇନାଲ ମୁକାବିଲା ଖେଳାଯିବ । ଏହାପୂର୍ବରୁ ଲର୍ଡ୍ସ କ୍ରିକେଟ ଗ୍ରାଉଣ୍ଡରେ ନ୍ୟୁଜିଲାଣ୍ଡ ଦୁଇଟି ଟେଷ୍ଟ ଇଂଲଣ୍ଡ ବିପକ୍ଷରେ ଖେଳିବ । ଏହି ସିରିଜ ଜୁନ 2ରୁ ଆରମ୍ଭ ହେବ ।
ଗତ କିଛି ବର୍ଷ ମଧ୍ୟରେ ଏକାଧିକ ଆଇସିସି ଟୁର୍ଣ୍ଣାମେଣ୍ଟର ନକଆଉଟ ମ୍ୟାଚରେ ଭାରତର ପ୍ରଦର୍ଶନ ଭଲ ରହିନାହିଁ । ଏଥିରେ ଟି20 ବିଶ୍ବକପ, ଚମ୍ପିଆନ୍ସ ଟ୍ରଫି ଓ ବିଶ୍ବକପ ମଧ୍ୟ ସାମିଲ ରହିଛି । ସେଥିପାଇଁ ଭାରତକୁ ଧ୍ୟାନର ସହ ଏହି ଆଇସିସି ଇଭେଣ୍ଟର ଫାଇନାଲ ମ୍ୟାଚରେ ଖେଳିବାକୁ ହେବ କହି ସତର୍କ କରିଛନ୍ତି ଅଗରକର ।
ଭାରତୀୟ ଟିମ ଜୁନ୍ 3, 2021ରେ ଏଖ ସ୍ବତନ୍ତ୍ର ଚାଟାର୍ଡ ବିମାନ ଯୋଗେଁ ୟୁକେରେ ପହଞ୍ଚିବ । ଭାରତରେ 14ଦିନ କ୍ବାରେଣ୍ଟିନରେ ରହିବା ପରେ ୟୁକେ ଯାତ୍ରା କରିବ ବିରାଟ ବାହିନୀ । ଅନ୍ୟପଟେ ନ୍ୟୁଜିଲାଣ୍ଡ ଟିମ ଇଂଲଣ୍ଡରେ ରହିଛି ଓ ଜୁନ 15ରେ ସାଉଥାମ୍ପଟନରେ ପହଞ୍ଚିବା ସହ ଜୈବ ସୁରକ୍ଷା ବଳୟରେ ପ୍ରବେଶ କରିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ