ନୁଆଦିଲ୍ଲୀ:ଆଗାମୀ ଏସିଆ କପ୍ ପାଇଁ ଜାରି ହୋଇଛି ଖେଳ ସୂଚୀ । ଚଳିତ ବର୍ଷ ସେପ୍ଟେମ୍ବର ମାସରେ ହେବାକୁ ଥିବା ଏହି ଟୁର୍ଣ୍ଣାମେଣ୍ଟ ପାଇଁ ଭାରତ ଓ ପାକିସ୍ତାନ ଗୋଟିଏ ଗ୍ରୁପ୍ରେ ସ୍ଥାନ ପାଇଛନ୍ତି । ଏହାକୁ ନେଇ ଏସୀୟ କ୍ରିକେଟ ପରିଷଦ ଅଧ୍ୟକ୍ଷ ଜୟ ଶାହ କ୍ରିକେଟ କ୍ୟାଲେଣ୍ଡର ଜାରି କରି ସୂଚନା ଦେଇଛନ୍ତି । ଭାରତ ଓ ପାକିସ୍ତାନ ସହ ଗ୍ରୁପ୍ରେ ଶ୍ରୀଲଙ୍କା ଓ ଆଫଗାନିସ୍ତାନ ରହିଛନ୍ତି । ତାସହିତ କ୍ବାଲିଫାଏ ମ୍ୟାଚ୍ ଖେଳି ଆଉ ଗୋଟିଏ ଟିମ୍ ଏହି ଗ୍ରୁପ୍ରେ ସାମିଲ ହେବ । ତେବେ ଏସିଆ କପ୍ କେଉଁଠାରେ ଆୟୋଜନ ହେବ ତାହାକୁ ନେଇ କୌଣସି ସୂଚନା ପ୍ରଦାନ କରାଯାଇନାହିଁ ।
ଜୟ ଶାହ ବିସିସିଆଇର ସଚିବ ଦାୟିତ୍ବରେ ମଧ୍ୟ ରହିଛନ୍ତି । ଆଜି ଟ୍ବିଟ୍ କରି କହିଛନ୍ତି, "2023-24 କ୍ରିକେଟ ସିଜିନ ପାଇଁ କ୍ୟାଲେଣ୍ଡର ଜାରି ହୋଇଛି । ଏହି ଖେଳକୁ ଏକ ନୂଆ ଧାରା ଦେବାକୁ ଆମର ଏହି ପ୍ରୟାସ । କ୍ରିକେଟ ଓ କ୍ରିକେଟଙ୍କ ପାଇଁ ଏକ ଭଲ ଦିନ ଆସିବ ଆମର ବିଶ୍ବାସ ।" ଦିନିକିଆ ଓ ଟି-୨୦କୁ ମିଶାଇ ଏସୀୟ କ୍ରିକେଟ ପରିଷଦ ମୋଟ ୧୪୫ଟି ମ୍ୟାଚ୍ ଆୟୋଜନ କରିବ । କେବଳ ୨୦୨୩ରେ ୭୫ଟି ମ୍ୟାଚ୍ ଖେଳାଯିବ । ସେହିଭଳି ୨୦୨୪ରେ ୭୦ଟି ମ୍ୟାଚ୍ ଖେଳାଯିବ ।
ମହିଳା ବର୍ଗ ଏସିଆ କପ ୨୦୨୪ ସେପ୍ଟେମ୍ବର ମାସରେ ଖେଳାଯିବ । ଏହି ଟୁର୍ଣ୍ଣାମେଣ୍ଟ ପାଇଁ ମଧ୍ୟ ଭାରତ ଓ ପାକିସ୍ତାନ ଗୋଟିଏ ଗ୍ରୁପରେ ରହିଛନ୍ତି । ଏହି ଦୁଇ ଟିମ୍ ସହ ଦୁଇଟି କ୍ବାଲିଫାଇଂ ଦଳ ଗ୍ରୁପରେ ସ୍ଥାନ ପାଇବେ । 2023 କ୍ରିକେଟ କ୍ୟାଲେଣ୍ଡର ମୁତାବକ ପୁରୁଷ ଚ୍ୟାଲେଞ୍ଜର କପ୍ରୁ ଆରମ୍ଭ ହେବ । ଏହି ୫୦ ଓଭର କ୍ରିକେଟ ଟୁର୍ଣ୍ଣାମେଣ୍ଟରେ ୧୦ଟି ଦଳ ଭାଗ ନେବେ । ଏଥିରେ ବାହାରିନ, ସାଉଦି, ଆରିବ, ଭୁଟାନ, ଚୀନ, ମିଆଁମାର, ମାଲଦୀପ, ଥାଇଲ୍ୟାଣ୍ଡ, ଇରାନ ଭଳି ଦେଶ ଭାଗ ନେବେ । ଏହି ଦଳଗୁଡିକୁ ଦୁଇଟି ଗ୍ରୁପ୍ରେ ବିଭକ୍ତ କରାଯିବ । ପ୍ରତ୍ୟେକ ଗ୍ରୁପରେ ୫ଟି ଲଖାଏଁ ଟିମ୍ ରହିବ । ଚ୍ୟାଲେଞ୍ଜର କପରେ ବିଜୟୀ ଓ ରନର ଅପ ଦଳ ସିଧା ସଳଖ ପୁରୁଷ ପ୍ରିମିୟର କପ ଖେଳିବାକୁ ଯୋଗ୍ୟତା ହାସଲ କରିବେ ।
ମାର୍ଚ୍ଚ ମାସରେ ପୁରୁଷ ୧୬ ବର୍ଷରୁ କମ ଆଞ୍ଚଳିକ ଟୁର୍ଣ୍ଣାମେଣ୍ଟ ଆରମ୍ଭ ହେବ । ପ୍ରତ୍ୟେକ ମ୍ୟାଚ୍ ୩୫ ଓଭର ଲେଖାଏଁ ଖେଳାଯିବ । ଏହି ଟୁର୍ଣ୍ଣାମେଣ୍ଟରେ ଅଞ୍ଚଳ ମୁତାବକ ୮ଟି ଦଳ ଭାଗ ନେବେ ।
ପ୍ରିମିୟର ଟୁର୍ଣ୍ଣାମେଣ୍ଟ ଚଳିତ ବର୍ଷ ଏପ୍ରିଲ ମାସରୁ ଆରମ୍ଭ ହେବ । ଏଥିରେ ମଧ୍ୟ ଦୁଇଟି ଗ୍ରୁପରେ ୫ଟି ଲେଖାଏଁ ଦଳ ରହିବେ । ଦୁବାଇ, ନେପାଳ, କୁଏତ୍, କତାର, ଓମାନ, ହଙ୍ଗକଙ୍ଗ, ସିଙ୍ଗାପୁର ଓ ମାଲେସିଆ ଭଳି ଦଳ ଏହି ଟୁର୍ଣ୍ଣାମେଣ୍ଟରେ ଭାଗ ନେବେ । ଏହା ସହ ଦୁଇଟି ଦଳ ଯୋଗ୍ୟତା ଅର୍ଜନ କରି ଏହି ଟୁର୍ଣ୍ଣାମେଣ୍ଟରେ ସାମିଲ ହେବ ।
