ରାଞ୍ଚି: ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଦ୍ବିତୀୟ ଦିନିକିଆ ଖେଳାଯାଉଛି । ଟସ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲେ ଦକ୍ଷିଣ ଆଫ୍ରିକା କେଶବ ମହାରାଜ । ଏହି ମ୍ୟାଚ ଭାରତ ପାଇଁ କର ବା ମର ପରିସ୍ଥିତି ସୃଷ୍ଟି କରିଥିବାବେଳେ ୨୭୯ ରନର ବିଜୟ ଲକ୍ଷ୍ୟ ଦେଇଛି ଦକ୍ଷିଣ ଆଫ୍ରିକା । ସିରିଜର ପ୍ରଥମ ମ୍ୟାଚ୍ରେ ପରାଜୟ ପରେ ଭାରତ ପାଇଁ ଏହି ମ୍ୟାଚ୍ କର ବା ମର ସଦୃଶ୍ୟ ହୋଇଛି ।
ଆଜି ପାଳି ଆରମ୍ଭରୁ ଦକ୍ଷିଣ ଆଫ୍ରିକାକୁ ଭଲ ଆରମ୍ଭ ମିଳିପାରିନଥିଲା । ମାତ୍ର ୭ ରନ ଦଳୀୟ ସ୍କୋରରେ ଦକ୍ଷିଣ ଆଫ୍ରିକା ପ୍ରଥମ ୱିକେଟ ହରାଇଥିଲା । ଏହାପରେ ମଲାନ କିଛି ସମୟ ପିଚରେ ବିତାଇଥିଲେ ସୁଦ୍ଧା ବଡ଼ ସ୍କୋର କରିପାରିନଥିଲେ । ସେ ୨୫ ରନ କରି ପାଭିଲିୟନ ଫେରିଥିଲେ । ତେବେ ହେଣ୍ଡ୍ରିକ୍ସ ଓ ମକ୍ରମଙ୍କ ମଧ୍ୟରେ ଏକ ଭଲ ଭାଗିଦାରୀ ଦେଖିବାକୁ ମିଳିଥିଲା । ଉଭୟ ମିଶି ଦଳୀୟ ଖାତାରେ ୧୫୦ରୁ ଅଧିକ ରନ ଯୋଡ଼ିଥିଲେ ।