ହାଇଦ୍ରାବାଦ: ବର୍ତ୍ତମାନ ସମସ୍ତଙ୍କ ନଜର ଦିନିକିଆ ବିଶ୍ବକପ ୨୦୨୩ ଉପରେ । ଏହାରି ମଧ୍ୟରେ ସାମ୍ନାକୁ ଆସଛି ଟି୨୦ ବିଶ୍ବକପ୍ ପୂର୍ବରୁ ଭାରତୀୟ ଦଳର ଖେଳସୂଚୀ । ୨୦୨୪ରେ ଖେଳାଯିବ ଟି୨୦ ବିଶ୍ବକପ । ଏହି ବିଶ୍ବକପ ପୂର୍ବରୁ ଟିମ୍ ଇଣ୍ଡିଆ ମୋଟ୍ ୧୯ଟି ମ୍ୟାଚ୍ ଖେଳିବ । ତେବେ ବିଶ୍ବକପ୍ ପୂର୍ବରୁ ମାତ୍ର ୧୯ଟି ମ୍ୟାଚ୍ ଖେଳି ଦଳକୁ ଟି୨୦ ବିଶ୍ବକପ ପାଇଁ ରଣନୀତି ପ୍ରସ୍ତୁତ କରିବା ସହ ଖେଳାଳି ଚୟନ କରିବା କଷ୍ଟକର ହୋଇପାରେ ବୋଲି କୁହାଯାଉଛି ।
ଭାରତୀୟ ଦଳ ଏବେ ୱେଷ୍ଟଇଣ୍ଡିଜ୍ ଗସ୍ତରେ ରହିଛି । ସେଠାରେ ଘରୋଇ ଦଳ ସହିତ ୫ ମ୍ୟାଚ୍ ବିଶିଷ୍ଟ ଟି୨୦ ସିରିଜ୍ ଖେଳିବ ଭାରତ । ଏହାପରେ ଆୟର୍ଲାଣ୍ଡ ଗସ୍ତ କରି ୩ଟି ଟି୨୦ ଖେଳିବ ଟିମ୍ ଇଣ୍ଡିଆ । ସେଠାରେ ଅଗଷ୍ଟ ୧୮ ତାରିଖରେ ପ୍ରଥମ ଟି୨୦, ୨୦ ତାରିଖରେ ଦ୍ବିତୀୟ ଟି୨୦ ଓ ୨୩ ତାରିଖରେ ତୃତୀୟ ଟି୨୦ ଖେଳାଯିବ । ଏହାପରେ ସେପ୍ଟେମ୍ବର ମାସରେ ଅଷ୍ଟ୍ରେଲିଆ ଦଳ ଭାରତ ଗସ୍ତରେ ଆସିବ । ଏଥିରେ ୩ ମ୍ୟାଚ୍ ବିଶିଷ୍ଟ ଦିନିକିଆ ସିରିଜ ରହିଛି । ଏହାପରେ ଭାରତରେ ଦିନିକିଆ ବିଶ୍ବକପ୍ ଅନୁଷ୍ଠିତ ହେବ । ଦିନିକିଆ ବିଶ୍ବକପ୍ ଶେଷ ହେବା ପରେ ଅଷ୍ଟ୍ରେଲିଆ ୫ ମ୍ୟାଚ୍ ବିଶିଷ୍ଟ ଟି୨୦ ସିରିଜ ଖେଳି ସ୍ବଦେଶ ଫେରିବ । ନଭେମ୍ବର ୨୩ ତାରିଖରେ ଭାଇଜାଗରେ ପ୍ରଥମ ଟି୨୦, ୨୬ରେ ତ୍ରିଭେନ୍ଦ୍ରମରେ ଦ୍ବିତୀୟ ଟି୨୦, ୨୮ରେ ଗୌହାଟୀରେ ତୃତୀୟ ଟି୨୦ ଖେଳିବେ ଘରୋଇ ଭାରତ ଓ ଭ୍ରମଣକାରୀ ଅଷ୍ଟ୍ରେଲିଆ । ସେହିପରି ଡିସେମ୍ବର ୧ ତାରିଖରେ ନାଗପୁର ଓ ୩ ତାରିଖରେ ହାଇଦ୍ରାବାଦରେ ଟି୨୦ ମ୍ୟାଚ୍ ଖେଳି ସ୍ବଦେଶ ଫେରିବ କଙ୍ଗାରୁ ଦଳ ।