କଲମ୍ବୋ: ଏଠାରେ ଖେଳାଯାଉଥିବା ଭାରତ ଓ ଶ୍ରୀଲଙ୍କା ମଧ୍ୟରେ ପ୍ରଥମ ଦିନିକିଆ ମ୍ୟାଚରେ ଟସ୍ ଜିଣି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲା ଘରୋଇ ଦଳ । ନିର୍ଦ୍ଧାରିତ ୫୦ ଓଭରରେ ୯ ୱିକେଟ ହରାଇ ୨୬୨ ରନ ସଂଗ୍ରହ କରିଛି ସିଂହଳ ଦଳ । ଫଳରେ ଟିମ ଇଣ୍ଡିଆ ସାମ୍ନାରେ ୨୬୩ ରନ୍ର ବିଜୟ ଲକ୍ଷ୍ୟ ରହିଛି ।
ନିୟମିତ ବ୍ୟବଧାନରେ ଭାରତୀୟ ବୋଲର ୱିକେଟ ଅକ୍ତିଆର କରିଥିଲେ ମାତ୍ର ଚମିକା କରୁଣାରତ୍ନେଙ୍କ ଅପରାଜିତ ୪୩ ରନର ଇଂନିସ ଫଳରେ ଶ୍ରୀଲଙ୍କା ୨୬୨ ରନର ଲଢୁଆ ସ୍କୋର କରିବାକୁ ସମର୍ଥ ହୋଇଛି ।
ଦୁଇ ଷ୍ଟାର ସ୍ପିନର କୁଲଦୀପ ଯାଦବ, ୟୁଜଭେନ୍ଦ୍ର ଚହଲଙ୍କ ସହ ଦ୍ରୁତ ବୋଲର ଦୀପକ ଚହର ଦୁଇଟି ଲେଖାଏଁ ୱିକେଟ ଅକ୍ତିଆର କରିଛନ୍ତି ।
କ୍ୟାପଟେନ ଦାସୁନ ସନାକା ପ୍ରଥମେ ବ୍ୟାଟିଂ ନିଷ୍ପତ୍ତି ନେବାପରେ ଭଲ ଆରମ୍ଭ କରିଥିଲେ ଦୁଇ ଶ୍ରୀଲଙ୍କା ଓପନର । ପ୍ରଥମ ୯ ଓଭରରେ ଅଭିସ୍କା ଫର୍ନାଣ୍ଡୋ ଓ ମିନୋଦ ଭାନୁକା ୪୯ ରନ ଯୋଡିଥିଲେ । ତେବେ ୧୦ମ ଓଭରରେ ଚହଲ ୩୨ ରନରେ ବ୍ୟାଟିଂ କରୁଥିବା ଫର୍ନାଣ୍ଡୋଙ୍କୁ ଆଉଟ୍ କରି ଭାରତକୁ ପ୍ରଥମ ସଫଳତା ଦେଇଥିଲେ ।