କଲମ୍ବୋ(ଶ୍ରୀଲଙ୍କା): ଦମଦାର ପ୍ରଦର୍ଶନ ସହ ଶ୍ରୀଲଙ୍କାକୁ ପ୍ରଥମ ଦିନିକିଆରେ ହରାଇଲା ଭାରତ । ପ୍ରଥମେ ବୋଲରଙ୍କ କମାଲ ପରେ ବ୍ୟାଟ୍ସମ୍ୟାନଙ୍କ ଜବରଦସ୍ତ ପ୍ରଦର୍ଶନ ବଳରେ ୨୬୩ ରନର ବିଜୟ ଲକ୍ଷ୍ୟକୁ ସହଜରେ ହାସଲ କରିନେଇଛି ଯୁବ ଟିମ ଇଣ୍ଡିଆ । ମାତ୍ର ୩୬. ୪ ଓଭରରେ ୩ ୱିକେଟ ହରାଇ ବିଜୟ ଲକ୍ଷ୍ୟ ହାସଲ କରିନେଇଛି ଭାରତ । ଫଳରେ ୭ ୱିକେଟରେ ବିଜୟୀ ହେବାସହ ୩ ମ୍ୟାଚ ବିଶିଷ୍ଟ ଦିନିକିଆ ସିରିଜରେ ୧-୦ରେ ଆଗୁଆ ହୋଇଛି ।
263 ରନ୍କୁ ପିଛା କରିଥିବା ଭାରତକୁ ଦମଦାର ଆରମ୍ଭ ଦେଇଥିଲେ ଓପନର ପୃଥ୍ବୀ ଶ । ଘରୋଇ ଦଳର ଦ୍ରୁତ ବୋଲରଙ୍କୁ ଜୋରଦାର ପ୍ରହାର କରିଥିଲେ ଶ । ତେବେ ଭାରତୀୟ ଇଂନିସର ଷଷ୍ଠ ଓଭରରେ ଶ'ଙ୍କ ୪୩ ରନ୍ର ବିସ୍ଫୋରକ ଇଂନିସ ଶେଷ ହୋଇଥିଲା । ଧନଞ୍ଜୟ ଦି ସିଲଭା ଶ'ଙ୍କୁ ପାଭିଲିୟନ ଫେରାଇବା ପରେ ପ୍ରଥମ ଅନ୍ତର୍ଜାତୀୟ ଦିନିକିଆ ମ୍ୟାଚ ଖେଳୁଥିବା ଇଶାନ କିଶନ କ୍ୟାପଟେନ ଶିଖର ଧାୱନଙ୍କ ସହ ଯୋଗ ଦେଇଥିଲେ ।
ଶ୍ରୀଲଙ୍କା ସ୍ପିନରଙ୍କୁ ମହଙ୍ଗା ସାବ୍ୟସ୍ତ କରାଇବା ସହ ମାତ୍ର ୩୩ ବଲରୁ ଅର୍ଦ୍ଧଶତକ ପୂରଣ କରିଥିଲେ । ଦ୍ବିତୀୟ ୱିକେଟ ଯୋଡିରେ ଧାୱନଙ୍କ ସହ ମିଶି ୮୫ ରନର୍ ଭାଗିଦାରୀ କରିଥିଲେ । ୫୯ ରନର ଅର୍ଦ୍ଧଶତକୀୟ ଇଂନିସ ଖେଳି କିଶନ ଆଉଟ ହୋଇଥିଲେ ।