ହାଇଦ୍ରାବାଦ: ବିଶ୍ବକପ୍ ୨୦୨୩ରେ ମଙ୍ଗଳବାର ଶ୍ରୀଲଙ୍କା ବିପକ୍ଷରେ ରେକର୍ଡ ବିଜୟ ହାସଲ କରିଥିଲା ପାକିସ୍ତାନ ଟିମ୍ । ହାଇଦ୍ରାବାଦରେ ପାକିସ୍ତାନର ଏହି ବଡ଼ ବିଜୟରେ ମୁଖ୍ୟ ଭୂମିକା ନିର୍ବାହ କରିଥିଲେ ଦଳର ୱିକେଟ୍କିପର-ବ୍ୟାଟର ମହମ୍ମଦ ରିଜ୍ୱାନ । ସେ ଅପରାଜିତ ୧୩୧ ରନର ଦମଦାର ଇନିଂସ ଖେଳିବା ସହ ମ୍ୟାଚ୍ର ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ । ତେବେ ସେ ପାକିସ୍ତାନର ବଡ଼ ବିଜୟକୁ ଇସ୍ରାଏଲ ଆକ୍ରମଣରେ ଛିନଛତ୍ର ହୋଇଯାଇଥିବା ଗାଜାବାସୀଙ୍କୁ ଉତ୍ସର୍ଗ କରିଛନ୍ତି ।
ଇସ୍ରାଏଲ ଓ ପାଲେଷ୍ଟାଇନ ମଧ୍ୟରେ ଶନିବାର ଠାରୁ ଆରମ୍ଭ ହୋଇଥିବା ଯୁଦ୍ଧ ପଞ୍ଚମ ଦିନରେ ପହଞ୍ଚିଥିବା ବେଳେ କ୍ରମଶଃ ଜଟିଳ ହେବାରେ ଲାଗିଛି । ଏଥିରେ ଏବେ ଅନ୍ତର୍ଜାତୀୟ ସମୂଦାୟ ମଧ୍ୟ ହସ୍ତକ୍ଷେପ କରିବା ଆରମ୍ଭ କରିଛନ୍ତି । ପ୍ରଥମେ ପାଲେଷ୍ଟାଇନର ଆତଙ୍କବାଦୀ ସଂଗଠନ ହମାସ ପକ୍ଷରୁ ଇସ୍ରାଏଲ ଉପରେ ଶନିବାର ରକେଟ ମାଡ଼ କରାଯାଇଥିଲା । ଏହାପରେ ହମାସ ଆତଙ୍କବାଦୀମାନେ ଇସ୍ରାଏଲରେ ପଶି ରକ୍ତର ହୋଲି ଖେଳିବାରେ ଲାଗିଛନ୍ତି । ଏସବୁ ଭିତରେ ଇସ୍ରାଏଲ ମଧ୍ୟ ଗାଜା ଷ୍ଟ୍ରିପ୍ ଉପରେ ଆକ୍ରମଣ କରିଛି । ଏହାକୁ ନେଇ ବିଶ୍ବ ସମୁହ ଦୁଇ ଫାଳ ହୋଇଯାଇଥିବା ବେଳେ ଏବେ ରିଜ୍ୱାନ ପାକିସ୍ତାନର ବଡ଼ ବିଜୟକୁ ଗାଜବାସୀଙ୍କୁ ଉତ୍ସର୍ଗ କରି ଚର୍ଚ୍ଚାକୁ ଆସିଛନ୍ତି ।