କେପଟାଉନ:ଦକ୍ଷିଣ ଆଫ୍ରିକାରେ ଆଇସିସି ମହିଳା ଟି-ଟ୍ବେଣ୍ଟି ବିଶ୍ବକପର ଅଷ୍ଟମ ସଂସ୍କରଣ ଶୁକ୍ରବାରଠୁ ଆରମ୍ଭ ହୋଇଯାଇଛି । ଚଳିତ ମହିଳା ଟି-ଟ୍ବେଣ୍ଟି ବିଶ୍ବକପରେ ଆଜି ଦୁଇ ପାରମ୍ପରିକ ପ୍ରତିନ୍ଦ୍ବନ୍ଦୀ ପରସ୍ପରକୁ ଭେଟିବେ । ଭାରତ ଓ ପାକିସ୍ତାନ ମଧ୍ୟରେ ହାଇଭୋଲଟେଜ ମ୍ୟାଚ ଖେଳାଯିବ । ରୋମାଞ୍ଚକ ମ୍ୟାଚ ଦେଖିବା ଅପେକ୍ଷାରେ ରହିଛନ୍ତି କ୍ରିକେଟପ୍ରେମୀ । କେପଟାଉନର ନ୍ୟୁଲାଣ୍ଡସ ଗ୍ରାଉଣ୍ଡରେ ସନ୍ଧ୍ୟା 6ଟା 30ରୁ ଆରମ୍ଭ ହେବ ମ୍ୟାଚ । ବିଜୟରୁ ଅଭିଯାନ ଆରମ୍ଭ ଲକ୍ଷ୍ୟରେ ରହିଛି ହର୍ମନପ୍ରୀତଙ୍କ ଦଳ । ଅନ୍ୟପଟେ ପାକିସ୍ତାନ ମଧ୍ୟ ବିସମା ମାହରୁଫଙ୍କ ଅଧିନାୟକତ୍ବରେ ଭାରତକୁ ପରାସ୍ତ କରିବା ଟାର୍ଗେଟ ରଖିଛି ।
ଭାରତ ଓ ପାକିସ୍ତାନ ମଧ୍ୟରେ ସବୁବେଳେ କଡା ସଂଘର୍ଷ ଦେଖିବାକୁ ମିଳିଥାଏ । ଏସିଆ କପରେ ଅନୁଷ୍ଠିତ ମ୍ୟାଚରେ ପକିସ୍ତାନ ଭାରତକୁ ପରାସ୍ତ କରିଥିଲା । ଆଜିର ମୁକାବିଲାରେ ଭାରତ ପାକିସ୍ତାନକୁ ପରାସ୍ତ କରି ଏସିଆ କପ ପରାଜୟର ପ୍ରତିଶୋଧ ନେବା ଲକ୍ଷ୍ୟରେ ରହିଛି । ସବୁ ବିଭାଗରୁ ଦେଖିବାକୁ ଗଲେ ଭାରତ ପାକିସ୍ତାନଠୁ ଉନ୍ନତ ରହିଛି । ପାକିସ୍ତାନ ଉପରେ ଆଧିପତ୍ୟ ବିସ୍ତାର କରିବାର ଯଥେଷ୍ଟ କ୍ଷମତା ଦଳ ପାଖରେ ରହିଛି ।
ଭାରତ ପାଖରେ ଆହତ ସମସ୍ୟା ରହିଛି । ବ୍ୟାଟର ସ୍ମୃତି ମାନ୍ଧାନା ନ ଖେଳିବାର ଯଥେଷ୍ଟ ସମ୍ଭାବନା ରହିଛି । ଅଭ୍ୟାସ ମ୍ୟାଚରେ ତାଙ୍କ ଆଙ୍ଗୁଠିରେ ଆଘାତ ଥିବାରୁ ଆଜିର ମୁକାବିଲାରୁ ସେ ବାଦ ପଡିପାରନ୍ତି । ଅଧିନାୟକ ହର୍ମନପ୍ରୀତ ମଧ୍ୟ ଫିଟ ନାହାନ୍ତି । ଦଳ ପାଇଁ ଚୂଡାନ୍ତ ଏକାଦଶ ଚୟନ କରିବା କଷ୍ଟକର ହୋଇପାରେ । ଏହାଛଡା ଦଳର ଜେମିମା ରୋଡ୍ରିଗ୍ସ, ଦିପ୍ତୀ ଶର୍ମା ଓ ପୂଜା ବସ୍ତ୍ରାକାରଙ୍କ ଉପରେ ନଜର ରହିବ । ସଦ୍ୟ ସମାପ୍ତ ମହିଳା ତ୍ରିରାଷ୍ଟୀୟ ସିରିଜରେ ଭାରତ ରନର୍ସଅପ ହୋଇଥିଲା । ଦୀପ୍ତି ଶର୍ମାଙ୍କ ଜବରଦସ୍ତ ପ୍ରଦର୍ଶନ ଦେଖିବାକୁ ମିଳିଥିଲା ।