ଦୁବାଇ: ବାଜିଲା ଟି20 ବିଶ୍ବକପ୍ ବିଗୁଲ୍ । ଚଳିତ ବର୍ଷ ଆମେରିକା ଓ ୱେଷ୍ଟଇଣ୍ଡିଜରେ ହେବାକୁ ଥିବା ଏହି ହାଇପ୍ରୋଫାଇଲ୍ ଆଇସିସି ଇଭେଣ୍ଟ ପାଇଁ ଶୁକ୍ରବାର କ୍ରୀଡ଼ାସୂଚୀ ଘୋଷଣା କରିଛି ଆଇସିସି । ଜୁନ 1ରୁ ଜୁନ 29 ମଧ୍ୟରେ ଖେଳାଯିବ ଟି20 ବିଶ୍ବକପ୍ 2024 । ପ୍ରଥମ ଥର ପାଇଁ ଏହି ଆଇସିସି ଟୁର୍ଣ୍ଣାମେଣ୍ଟରେ 20ଟି ଦଳ ଅଂଶଗ୍ରହଣ କରିବେ । ତେବେ ଚଳିତ ବର୍ଷ ଉଦ୍ଘାଟନୀ ମ୍ୟାଚ୍ ଆୟୋଜକ ଆମେରିକା ଓ କାନାଡ଼ା ମଧ୍ୟରେ ଖେଳାଯିବ । ଭାରତ ଏହାର ଅଭିଯାନ ଜୁନ 5 ତାରିଖରୁ ଆୟରଲାଣ୍ଡ ବିପକ୍ଷରେ ଆରମ୍ଭ କରିବ । ସେହିଭଳି 29 ଜନରେ ଖେଳାଯିବ ଫାଇନାଲ୍ ମ୍ୟାଚ୍ ।
ଟୁର୍ଣ୍ଣାମେଣ୍ଟରେ ଖେଳାଯିବ 55 ମ୍ୟାଚ୍: ଟି20 ବିଶ୍ବକପ୍ 2024ରେ 30 ଦଳ ମଧ୍ୟରେ ମୋଟ 55ଟି ମ୍ୟାଚ୍ ଖେଳାଯିବ । ଜୁନ 1ରୁ 18 ତାରିଖ ମଧ୍ୟରେ ଗ୍ରୁପ୍ ପର୍ଯ୍ୟାୟ ମ୍ୟାଚ୍ ଖେଳାଯିବ । ଏହାପରେ ଜୁନ 19ରୁ 24 ତାରିଖ ମଧ୍ୟରେ ସୁପର-8 ପର୍ଯ୍ୟାୟ ମ୍ୟାଚ୍ ଖେଳାଯିବ । ଏହି ପର୍ଯ୍ୟାୟରୁ ଯେଉଁ 4ଟି ଦଳ ସେମିରେ ପ୍ରବେଶ କରିବେ, ସେମାନଙ୍କ ମଧ୍ୟରେ ସେମିଫାଇନାଲ୍ 26 ଓ 27 ଜୁନରେ ଖେଳାଯିବ । ଶେଷରେ ଫାଇନାଲ୍ ମ୍ୟାଚ୍ ଜୁନ 29 ତାରିଖରେ ବାରବାଡୋସ୍ରେ ଖେଳାଯିବା ନେଇ କ୍ରୀଡ଼ାସୂଚୀ ଜାରି କରିଛି ଆଇସିସି ।
9 ଜୁନରେ ଭାରତ-ପାକିସ୍ତାନ ମହାଲଢ଼େଇ: ଟି20 ବିଶ୍ବକପ୍ 2024ର ବହୁପ୍ରତିକ୍ଷିତ ଭାରତ ଓ ପାକିସ୍ତାନ ମଧ୍ୟରେ ମହାଲଢ଼େଇ ଜୁନ 9 ତାରିଖରେ ନ୍ୟୁୟର୍କରେ ଖେଳାଯିବ । ଜୁନ 5 ତାରିଖରେ ଆୟରଲାଣ୍ଡ ବିପକ୍ଷରେ ଅଭିଯାନ ଆରମ୍ଭ କରିବା ପରେ ଭାରତ 9 ତାରିଖରେ ଏହାର ପାରମ୍ପରିକ ପ୍ରତିଦ୍ବନ୍ଦ୍ବୀ ପାକିସ୍ତାନକୁ ଭେଟିବ । ଏହାପରେ ଜୁନ 12ରେ ଆମେରିକା ଓ 15ରେ କାନାଡ଼ା ବିପକ୍ଷରେ ମୈଦାନକୁ ଓହ୍ଲାଇବେ ମେନ୍ ଇନ୍ ବ୍ଲ୍ୟୁ । ଟିମ୍ ଇଣ୍ଡିଆର ସବୁ ମ୍ୟାଚ୍ ଭାରତୀୟ ସମୟ ଅନୁଯାୟୀ ରାତି 8:30ରୁ ଆରମ୍ଭ ହେବ ।