ଅହମ୍ମଦାବାଦ: 45 ଦିନ 47ଟି ମ୍ଯାଚ ପରେ ସେହି ଐତିହାସିକ ମୁହୂର୍ତ୍ତ ଆସି ଯାଇଛି । ଫ୍ୟାନ୍ସଙ୍କ ଅପେକ୍ଷାର ଅନ୍ତ ହୋଇଛି । 20 ବର୍ଷ ପରେ ବିଶ୍ବକପ ଫାଇନାଲ ଖେଳିଛନ୍ତି ଭାରତ ଓ ଅଷ୍ଟ୍ରେଲିଆ । ବିଶ୍ବକପ 2023 ଫାଇନାଲ ମ୍ୟାଚ୍ ନେଇ ଟସ୍ ପଡ଼ି ସାରିଛି । ଟସ୍ ଜିତି ପ୍ରଥମେ ଫିଲ୍ଡିଂ ନିଷ୍ପତ୍ତି ନେଇଛି ଅଷ୍ଟ୍ରେଲିଆ । ଭାରତକୁ ବ୍ୟାଟିଂ ଆମନ୍ତ୍ରଣ ଦେଇଛି କଙ୍ଗାରୁ ଦଳ । ତୃତୀୟ ଥର ବିଶ୍ବ ବିଜୟୀ ହେବାକୁ ଲକ୍ଷ୍ୟ ନେଇ ମୈଦାନକୁ ଓହ୍ଲାଇଛି ଟମ୍ ଇଣ୍ଡିଆ । ସେହିପରି ଷଷ୍ଠ ଥର ଚମ୍ପିଆନ ହେବାକୁ ଲକ୍ଷ୍ୟ ରଖିଛି ଅଷ୍ଟ୍ରେଲିଆ । ଭାରତ ଜିତିବ ବିଶ୍ବକପ୍ 140 କୋଟି ଭାରତୀୟଙ୍କର ଏହି ସ୍ବପ୍ନକୁ ନେଇ ମୈଦାନକୁ ଓହ୍ଲାଇଛି ରୋହିତ ସେନା । ଭାରତୀୟ ଦଳରେ କୌଣସି ପରିବର୍ତ୍ତନ ହୋଇନାହିଁ । ଅପରାଜେୟ ଭାରତ କଙ୍ଗାରୁ ଦଳକୁ ଟକ୍କର ଦେବାକୁ ରଣକ୍ଷେତ୍ରକୁ ଓହ୍ଲାଇ ସାରିଛି । ଷ୍ଚାଡିୟମରେ ଖଚାଖଚ ଭିଡ । 1 ଲକ୍ଷ 30 ହଜାର ଦର୍ଶକଙ୍କ ଚିୟରଅଫରେ କମ୍ପୁଛି ସବୁଠୁ ବଡ଼ ନରେନ୍ଦ୍ର ମୋଦି ଷ୍ଚାଡିୟମ ।
ଭାରତ ବନାମ ଅଷ୍ଟ୍ରେଲିଆ:ଚଳିତ ବିଶ୍ବକପରେ ଏଯାବତ ଭାରତ ଅପରାଜେୟ ରହିଛି । ଲିଗ୍ ପର୍ଯ୍ୟାୟରେ ଅଷ୍ଟ୍ରେଲିଆ ବିପକ୍ଷରେ ଆଭିଯାନ ଆରମ୍ଭଠୁ ନେଇ ନେଇ ସେମିଫାଇନାଲ ଯାଏ ସମସ୍ତ 10 ମ୍ୟାଚରେ ବାଜିମାତ କରିଛି ରୋହିତ ସେନା । ଭାରତର ଦମଦାର ପ୍ରଦର୍ଶନକୁ ନେଇ ସବୁଠି ଚର୍ଚ୍ଚା । ବ୍ୟାଟିଂଠୁ ନେଇ ବୋଲିଂ ସବୁଥିରେ ରୋହତି ସେନା ସମସ୍ତ 9 ଦଳକୁ ମାତ ଦେଇ ଫାଇନାଲରେ ପ୍ରବେଶ କରିଛି । ଆଜି ଅଷ୍ଟ୍ରେଲିଆ ବିପକ୍ଷରେ ତ୍ରୁଟିଶୂନ୍ୟ ପ୍ରଦର୍ଶନ କରି ତୃତୀୟ ଥର ବିଶ୍ବବିଜୟୀ ହେବାକୁ ଲକ୍ଷ୍ୟ ରଖିଛି ଦଳ । ସେହିପରି ପ୍ରଥମରୁ ଧିମା ପଡିଯାଇଥିବା କଙ୍ଗାରୁ ପରବର୍ତ୍ତୀ ସମୟରେ ସେମି ଫାଇନାଲ ଓ ଫାଇନାଲ ଟିକେଟ ହାତେଇଥିଲା । ପଞ୍ଚମ ଥର ବିଶ୍ବ ବିଜୟୀ ଟାଇଟଲ ହାତେଇବା ଅଷ୍ଟ୍ରେଲିଆ ଷଷ୍ଠ ଥର ଚମ୍ପିଆନ ହେବା ଲକ୍ଷ୍ୟ ନେଇ ମୈଦାନକୁ ଓହ୍ଲାଇଛି ।
ଶୁଭେଚ୍ଛା ଜଣାଇଲେ ପ୍ରଧାନମନ୍ତ୍ରୀ:ବିଶ୍ବକପ 2023 ଫାଇନାଲ ଫାଇଟ ପାଇଁ ଭାରତୀୟ ଦଳକୁ ଶୁଭେଚ୍ଛା ଜଣାଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ସୋସିଆ ମିିଡିଆ ଆକାଉଣ୍ଟ ଏକ୍ସରେ ପ୍ରଧାନମନ୍ତ୍ରୀ ଲେଖିଛନ୍ତି, '' ବେଷ୍ଟ ଅଫ୍ ଲକ୍ ଟିମ ଇଣ୍ଡିଆ । 140 କୋଟି ଭାରତୀୟ ତୁମକୁ ଚିୟରଅଫ କରୁଛନ୍ତି । ତୁମେ ନିଶ୍ଚୟ ଚମକିବ । ଉନ୍ନତ ଖେଳ ପ୍ରଦର୍ଶନ କର ଏବଂ ଖେଳର ଭାବନାକୁ କାୟମ ରଖ ।''