ନୂଆଦିଲ୍ଲୀ:ଆଇସିସି ଦିନିକିଆ ବିଶ୍ବକପର 13ତମ ସଂସ୍କରଣ ଭାରତରେ ଆୟୋଜିତ ହେବ । ଏନେଇ କ୍ରୀଡାସୂଚୀ ପ୍ରସ୍ତୁତ ହୋଇଛି । ଚଳିତବର୍ଷ ଶେଷ ଆଡକୁ ଅର୍ଥାତ ଅକ୍ଟୋବର 5ରୁ ଆଇସିସି ଦିନିକିଆ ବିଶ୍ବକପ ଆରମ୍ଭ ହେବ । ନଭେମ୍ବର 19 ତାରିଖରେ ଫାଇନାଲ ଅନୁଷ୍ଠିତ ହେବ । ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଫାଇନାଲ ମୁକାବିଲା ଖେଳାଯିବ ବୋଲି ଖବର ପ୍ରକାଶ ପାଇଛି । ବିଶ୍ବକପର ସମସ୍ତ ମ୍ୟାଚ ଖେଳାଯିବା ପାଇଁ ମୋଟ 12ଟି ଭେନ୍ୟୁ ନିର୍ଦ୍ଧାରଣ କରାଯାଇଛି ।
ମିଳିଥିବା ସୂଚନା ଅନୁସାରେ ଅହମ୍ମଦାବାଦ ଓ ବେଙ୍ଗାଲୁରୁ ସମେତ ଚେନ୍ନାଇ, ଦିଲ୍ଲୀ, ଧର୍ମଶାଳା, ଗୌହାଟୀ, ହାଇଦ୍ରାବାଦ, କୋଲକାତା, ଲକ୍ଷ୍ନୌ, ଇନ୍ଦୋର, ରାଜକୋଟ ଓ ମୁମ୍ବାଇରେ ମ୍ୟାଚ ଖେଳାଯିବ । ଅହମ୍ମଦାବାଦରେ ନରେନ୍ଦ୍ର ମୋଦି ଷ୍ଟାଡିୟମରେ ଫାଇନାଲ ମ୍ୟାଚ ଖେଳାଯିବ । ଟୁର୍ଣ୍ଣାମେଣ୍ଟରେ ମୋଟ 46 ଦିନରେ 48ଟି ମ୍ୟାଚ ରହିଛି । କେଉଁଠି କେଉଁ ଦଳର ମୁକାବିଲା ହେବ ସେ ନେଇ ସୂଚୀ ପ୍ରକାଶ କରାଯାଇନାହିଁ । ବିଶ୍ବକପ ପର୍ବରୁ ୱାର୍ମ ଅପ ମ୍ୟାଚ ପାଇଁ 2ରୁ 3ଟି ଷ୍ଟାଡିୟମ ଚୟନ କରାଯିବ । ବର୍ଷା ସମ୍ଭାବନା ଥିବା ଭେନ୍ୟୁକୁ ବିଶ୍ବକପ ତାଲିକାରୁ ବାଦ ଦିଆଯାଇଛି ।
ଏହା ବି ପଢନ୍ତୁ...IND vs AUS ODI: ଆଜି ସିରିଜ ନିର୍ଣ୍ଣାୟକ ତୃତୀୟ ଦିନିକିଆ, ସିରିଜ ସିଲ ଲକ୍ଷ୍ୟରେ ଦୁଇଦଳ
ନିୟମ ଅନୁସାରେ ଆଇସିସି ବିଶ୍ବକପ ବର୍ଷେ ପୂର୍ବରୁ ବିଶ୍ବକପ ସୂଚୀ ଜାରି କରିଥାଏ । ଏହା ପଛରେ ଅନେକ କାରଣ ରହିଛି । ଭାରତରେ ଅକ୍ଟୋବର/ନଭେମ୍ବର ମାସରେ ମୌସୁମୀ ଥାଏ କିଛି ଅଞ୍ଚଳରେ ବର୍ଷା ହୋଇଥାଏ ତେଣୁ ବିସିସିଆଇ ଷ୍ଟାଡିୟମ ଚୂଡନ୍ତ କରିବାକୁ ସମୟ ମାଗିଛି । ବିଶ୍ବକପ ଆୟୋଜନରେ ଭାରତ ସରକାର କର ମୁକ୍ତ କରିବା ସହ ପାକିସ୍ତାନ ଖେଳାଳିଙ୍କ ପାଇଁ ଭିସା ବ୍ୟବସ୍ଥା କରିବାକୁ ଆଇସିସି ନିର୍ଦ୍ଦେଶ ଦେଇଛି । ଗତ ସପ୍ତାହରେ ଏ ନେଇ ବୈଠକ ବସିଥିଲା । ଭିସା ବ୍ୟବସ୍ଥା କରିବା ସହିତ କର ଛାଡକୁ ନେଇ ଖୁବଶୀଘ୍ର ବିସିସିଆଇ ଆଇସିସିକୁ ଅବଗତ କରାଇବ ବୋଲି ଜଣାପଡିଛି ।
ପ୍ରକାଶଥାଉ କି, ଆୟୋଜକ ଭାରତ, ଡିଫେଣ୍ଡି ଚାମ୍ପିଆନ ଇଂଲଣ୍ଡ, ଅଷ୍ଟ୍ରେଲିଆ, ନ୍ୟୁଜିଲାଣ୍ଡ, ପାକିସ୍ତାନ, ବାଂଲାଦେଶ ଓ ଆଫଗାନିସ୍ତାନ ବିଶ୍ବକପ ପାଇଁ ଯୋଗ୍ୟତା ଅର୍ଜନ କରି ସାରିଛନ୍ତି । 2013 ପରଠୁ ଭାରତରେ ପାକିସ୍ତାନ ଖେଳିନାହିଁ । ଭାରତ ବିଶ୍ବକପ 2023 ବିଜେତା ହେବା ନେଇ ଦାବିଦାର ରହିଛି । ଘରୋଇ ଗ୍ରାଉଣ୍ଡରେ ଭାରତକୁ ହରାଇବା ଅନ୍ୟ ଦଳ ପାଇଁ କଷ୍ଟକର ହୋଇପାରେ ।
