ନୂଆଦିଲ୍ଲୀ:ଟିମ ଇଣ୍ଡିଆର ନୂଆ ମୁଖ୍ୟ କୋଚ୍ ଖବର ନେଇ ସମସ୍ତେ ଉତ୍ସାହିତ । ଟି-୨୦ ବିଶ୍ବକପ ପରେ ମୁଖ୍ୟ କୋଚ୍ ରବି ଶାସ୍ତ୍ରୀଙ୍କ କାର୍ଯ୍ୟକାଳ ଶେଷ ହେଉଛି । ତାଙ୍କ ସ୍ଥାନରେ ପୂର୍ବତନ ଭାରତୀୟ କ୍ୟାପଟେନ ରାହୁଲ ଦ୍ରାବିଡ ଟିମ ଇଣ୍ଡିଆର ମୁଖ୍ୟ କୋଚ୍ ହେବା ଖବର ସାମ୍ନାକୁ ଆସିବା ପରେ ଉତ୍ସାହିତ ହୋଇପଡିଛନ୍ତି ଭାରତୀୟ ଫ୍ୟାନ୍ସ ।
ଏହି ଖବର କେବଳ ଭାରତୀୟଙ୍କୁ ଉତ୍ସାହିତ କରିନି ବରଂ ଇଂଲଣ୍ଡରୁ ମଧ୍ୟ ପ୍ରତିକ୍ରିୟା ସାମ୍ନାକୁ ଆସିଛି । ପୂର୍ବତନ ଇଂଲଣ୍ଡ କ୍ୟାପଟେନ ମାଇକେଲ ଭନ୍ଙ୍କ ଏକ ଟ୍ବିଟ୍ ଏବେ ହଇଚଇ ସୃଷ୍ଟି କରିଛି । ଟ୍ବିଟରେ ଭନ୍ ଲେଖିଛନ୍ତି, "ଯଦି ଏହା ସତ ଯେ, ଟିମ ଇଣ୍ଡିଆର ପରବର୍ତ୍ତୀ ମୁଖ୍ୟ କୋଚ୍ ରାହୁଲ ଦ୍ରାବିଡ ହେଉଛନ୍ତି, ତେବେ ବିଶ୍ବର ଅବଶିଷ୍ଟ ଟିମ ସତର୍କ ହୋଇଯିବା ଉଚିତ୍ ।"
ନିଜର ନିଆରା ଅନ୍ଦାଜର ଟ୍ବିଟ୍ ପାଇଁ ଚର୍ଚ୍ଚାରେ ଥିବା ପୂର୍ବତନ ଭାରତୀୟ ଓପନର ୱାସିମ ଜାଫର ମଧ୍ୟ ଏହି ପ୍ରସଙ୍ଗରେ ନିଜର ପ୍ରତିକ୍ରିୟା ରଖିଛନ୍ତି ।
ଟ୍ବିଟ୍ରେ ଜାଫର ଲେଖିଛନ୍ତି, "ଗତକାଲି ପର୍ଯ୍ୟନ୍ତ ଦ୍ରାବିଡ, ଜାତୀୟ କ୍ରିକେଟ ଏକାଡେମୀ(NCA)ର ମୁଖ୍ୟ ଭାବେ ରହିବାକୁ ଚାହାଁନ୍ତି ବୋଲି ରିପୋର୍ଟ ରହିଥିଲା । ମାତ୍ର ଶନିବାର ସକାଳୁ ଦ୍ରାବିଡ ଟିମ ଇଣ୍ଡିଆ ନୂଆ ମୁଖ୍ୟ କୋଚ୍ ହେବାନେଇ ଖବର ଆସିଲା । ଗୋଟିଏ ରାତି ଭିତରେ ଏପରି କ'ଣ ଘଟିଗଲା ? ବୋଧହୁଏ ଲର୍ଡ ଶାର୍ଦ୍ଦୁଳ ଜନ୍ମଦିନର କେକ୍ କାଟିବା ସହ କ୍ୟାଣ୍ଡେଲ ଲିଭାଇ ରାହୁଲ ଭାଇଙ୍କୁ କୋଚ୍ ହେବାନେଇ ପ୍ରାର୍ଥନା କରିଛନ୍ତି ।"