ଚେନ୍ନାଇ: ଅଷ୍ଟ୍ରେଲୀୟ ଅଲ୍-ରାଉଣ୍ଡର ଗ୍ଳେନ ମାକ୍ସୱେଲ ତାଙ୍କର ଦୀର୍ଘ ଦିନର ବାନ୍ଧବୀ ଭାରତୀୟ ବଂଶୋଦ୍ଭବ ବିନି ରମଣଙ୍କୁ ଅଷ୍ଟ୍ରେଲିଆରେ ବିବାହ କରିଥିଲେ । ତେବେ ଚେନ୍ନାଇରେ ଏହି ନବଦମ୍ପତ୍ତି ଭାରତୀୟ ବିବାହ ରୀତିନୀତିରେ ପୁଣିଥରେ ବିବାହ କରିଛନ୍ତି । ଏହି ସମୟ ବେଳର ଭିଡିଓ ଭାଇରାଲ ହେବାରେ ଲାଗିଛି । ବିନି ଭାରତୀୟ ମୂଳ ବଂଶୋଦ୍ଭବ ହୋଇଥିବାରୁ ମାକ୍ସୱେଲ ଓ ବିନି ଦୁଇଥର ବିବାହ କାର୍ଯ୍ୟକ୍ରମ ପାଇଁ ନିଷ୍ପତ୍ତି ନେଇଥିଲେ ।
ଚଳିତ ସପ୍ତାହରେ ନବଦମ୍ପତି ଭାରତୀୟ ଷ୍ଟାଇଲରେ ସେମାନଙ୍କର ବିବାହ ଶେଷ କରିଛନ୍ତି । ଏହି ସମୟର ଭିଡିଓ ମଧ୍ୟ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଉଭୟ ମାକ୍ସୱେଲ ଓ ବିନି ପରସ୍ପର ବେକରେ ବରମାଳ ପକାଇଥିଲେ, ଯାହାକି ତାମିଲ ବିବାହ ରିତିନୀତିରେ ଏକ ଲୋକପ୍ରିୟ ପ୍ରଥା । ଚେନ୍ନାଇରେ ଅନୁଷ୍ଠିତ ହୋଇଥିବା ମାକ୍ସୱେଲ ଓ ବିନିଙ୍କ ବିବାହ ଉତ୍ସବ କାର୍ଡ ମଧ୍ୟ ତାମିଲରେ ପ୍ରିଣ୍ଟ ହୋଇଥିଲା ଓ ଇଣ୍ଟରନେଟ୍ରେ ଭାଇରାଲ ହୋଇଥିଲା । COVID-19 ମହାମାରୀର ଠିକ୍ ପୂର୍ବରୁ 2020ରେ ମାକ୍ସୱେଲ ଓ ବିନିଙ୍କ ନିର୍ବନ୍ଧ ହୋଇଥିଲା ।