ନୂଆଦିଲ୍ଲୀ:ପୂର୍ବତନ ପାକିସ୍ତାନୀ ଅମ୍ପାୟାର ଅସଦ ରୌଫଙ୍କ ଦେହାନ୍ତ । ମୃତ୍ୟୁବେଳକୁ ତାଙ୍କୁ ୬୬ ବର୍ଷ ବୟସ ହୋଇଥିଲା । ଲାହୋରରେ ହୃଦଘାତରେ ତାଙ୍କର ଦେହାନ୍ତ ହୋଇଥିବା ଜଣାପଡିଛି । ବର୍ଷ ୨୦୦୦ରେ ରୌଫ, ଅନ୍ତର୍ଜାତୀୟ କ୍ରିକେଟରେ ପ୍ରଥମ ଅମ୍ପାୟାରିଂ କରିଥିଲେ । ସେ ୬୪ଟି ଟେଷ୍ଟ ମ୍ୟାଚ୍(ଫିଲ୍ଡ ଅମ୍ପାୟର ଭାବେ ୪୯ ଓ TV ଅମ୍ପାୟାର ଭାବେ ୧୫), ୧୩୯ଟି ଅନ୍ତର୍ଜାତୀୟ ଦିନିକିଆ ମ୍ୟାଚ୍ ଓ ୨୮ଟି ଅନ୍ତର୍ଜାତୀୟ ଟି୨୦ ମ୍ୟାଚ୍ ପରିଚାଳନା କରିଥିଲେ । ବର୍ଷ ୨୦୦୦ ସୁଦ୍ଧା ସେ ପାକିସ୍ତାନର ଅନ୍ୟତମ ଅଗ୍ରଣୀ ଅମ୍ପାୟର ଥିଲେ ।
ମିଡିଆ ରିପୋର୍ଟ ଅନୁଯାୟୀ, ବୁଧବାର ରାତିରେ ରୌଫ୍ ନିଜ ଦୋକାନରୁ ଫେରିବା ପରେ ହୃଦଘାତର ଶିକାର ହୋଇଥିଲେ । ରୌଫଙ୍କ ଦେହାନ୍ତରେ ପାକିସ୍ତାନ କ୍ରିକେଟ ବୋର୍ଡ ଅଧ୍ୟକ୍ଷ ରମିଜ ରାଜା ଟ୍ବିଟ୍ କରି ଗଭୀର ଶୋକବ୍ୟକ୍ତ କରିଛନ୍ତି । ଟ୍ବିଟ୍ରେ ରମିଜ ଲେଖିଛନ୍ତି,"ରୌଫ କେବଳ ଜଣେ ଭଲ ଅମ୍ପାୟାର ନଥିଲେ ବରଂ ଜଣେ ଭଲ ମଣିଷ ଥିଲେ । ସର୍ବଦା ହସ ହସ ମୁହଁରେ ସେ ତାଙ୍କର କାର୍ଯ୍ୟ କରିଥାନ୍ତି ।"