ବ୍ରିସବେନ୍ : ଗ୍ଲେନ୍ ଫିଲିପ୍ସଙ୍କ ଲଢୁଆ ଅର୍ଦ୍ଧଶତକ ସତ୍ତ୍ବେ ୨୦ ରନରେ ପରାସ୍ତ ହେଲା ନ୍ୟୁଜିଲାଣ୍ଡ । ବ୍ଲାକ୍ କେପ୍ସକୁ ପରାସ୍ତ କରିବା ପରେ ଦୁଇ ପଏଣ୍ଟ ପାଇ ଗୃପ ୧ ପଏଣ୍ଟ ଟେବୁଲରେ ଦ୍ବିତୀୟ ସ୍ଥାନ ଅକ୍ତିଆର କରିଛି ଇଂଲଣ୍ଡ । ଗୃପ ୧କୁ ଗୃପ ଅଫ ଡେଥ କୁହାଯାଉଛି । ସେମିଫାଇନାଲ ଦୌଡରେ ତିନୋଟି ଶକ୍ତିଶାଳୀ ଟିମ୍ ତଥା ଡିଫେଣ୍ଡିଂ ଚମ୍ପିଆନ ଅଷ୍ଟ୍ରେଲିଆ, ରନର୍ସଅପ ନ୍ୟୁଜିଲାଣ୍ଡ ଓ ଇଂଲଣ୍ଡ ରହିଛନ୍ତି । ତେଣୁ ସେମିଫାଇନାଲ ରାସ୍ତା ସହଜ କରିବା ପାଇଁ ଖେଳ ଆରମ୍ଭରୁ ହିଁ ଇଂଲିସ୍ ଟିମ୍ ଆକ୍ରମଣାତ୍ମକ ବ୍ୟାଟିଂ ଆରମ୍ଭ କରିଥିଲା । ଇଂଲଣ୍ଡ ନ୍ୟୁଜିଲାଣ୍ଡ ଆଗରେ ୧୮୦ ରନର ବିଜୟ ଲକ୍ଷ୍ୟ ରଖିଥିଲା । ଏହାର ଜବାବରେ ନ୍ୟୁଜିଲାଣ୍ଡ ନିର୍ଦ୍ଧାରିତ ୨୦ ଓଭରରେ ୬ ୱିକେଟ ହରାଇ ମାତ୍ର ୧୫୯ ରନ୍ କରିଥିଲା ।
ନ୍ୟୁଜିଲାଣ୍ଡର ବିଜୟ ରଥ ରୋକିବାରେ ସଫଳ ହୋଇଛି ବଟଲର ବାହିନୀ । ଇଂଲଣ୍ଡ ଠାରୁ ୨୦ ରନରେ ପରାସ୍ତ ହେବା ପରେ କିୱି ଦଳ ଚଳିତ T20 ବିଶ୍ବକପରେ ପ୍ରଥମ ପରାଜୟର ସ୍ବାଦ ଚାଖିଛି । ନ୍ୟୁଜିଲାଣ୍ଡର ଏହି ପରାଜୟ ଆଗକୁ ଦଳ ପାଇଁ ବଡ ବିପର୍ଯ୍ୟୟ ଆଣିପାରେ । ସେମିରେ ପ୍ରେବେଶ କରିବାକୁ ହେଲେ ନ୍ୟୁଜିଲାଣ୍ଡକୁ ପରବର୍ତ୍ତୀ ମ୍ୟାଚରେ ଆୟରଲାଣ୍ଡକୁ ପରାସ୍ତ କରିବାକୁ ହେବ ।