ଗାନ୍ଧୀନଗର: 400 ଟେଷ୍ଟ ୱିକେଟ କ୍ଲବରେ ସାମିଲ ହେଲେ ରବିଚନ୍ଦ୍ରନ ଅଶ୍ବିନ। ଭାରତୀୟ ଦଳର ଏହି ଷ୍ଟାର୍ ଅଫ୍ ସ୍ପିନର୍ ଦ୍ରୁତ 400 ୱିକେଟ ନେବାରେ ଦ୍ବିତୀୟ ସ୍ଥାନରେ ରହିଛନ୍ତି । ରବିଚନ୍ଦ୍ରନ ଅଶ୍ବିନ 77ଟି ଟେଷ୍ଟ ମ୍ୟାଚରେ ଏହି ରେକର୍ଡ ହାସଲ କରିଥିବାବେଳେ ଶ୍ରୀଲଙ୍କାର କିମ୍ବଦନ୍ତୀ କ୍ରିକେଟର ମୁଥେୟା ମୁରଲୀଧରନ 72ଟି ଟେଷ୍ଟରେ ଏହି ଉପଲବ୍ଧି ହାସଲ କରିଥିଲେ ।
ଭାରତ ଓ ଇଂଲଣ୍ଡ ମଧ୍ୟରେ ଚାଲିଥିବା ତୃତୀୟ ଟେଷ୍ଟ ମ୍ୟାଚରେ ଅଶ୍ବିନଙ୍କ ପାଖରେ ରେକର୍ଡର ତାଲିକା ଲାଗିଛି। ଭାରତ ପକ୍ଷରୁ 400 ୱିକେଟ ନେଇଥିବା ସେ ଚତୁର୍ଥ ବୋଲର ହୋଇପାରିଛନ୍ତି । ଖାଲି ସେତିକି ନୁହେଁ ବିଶ୍ବରେ 400 ୱିକେଟ ନେଇଥିବା ସେ 16ତମ ବୋଲର। ଇଂଲଣ୍ଡ ବିପକ୍ଷରେ ଖେଳାଯାଉଥିବା ପିଙ୍କବଲ ଟେଷ୍ଟ ମ୍ୟାଚରେ ଇଂଲଣ୍ଡର ଦ୍ବିତୀୟ ଇନିଂସରେ ଜୋଫ୍ରା ଆର୍ଚରଙ୍କୁ ଆଉଟ କରି ସେ ଏହି ରେକର୍ଡ ହାସଲ କରିଛନ୍ତି ।
ଏହାପୂର୍ବରୁ ଭାରତର କପିଲ ଦେବ, ଅନିଲ କୁମ୍ବଲେ ଓ ହରଭଜନ ସିଂହ ଭାରତ ପାଇଁ 400 ୱିକେଟ ନେଇଛନ୍ତି। କୁମ୍ବଲେ 132ଟି ଟେଷ୍ଟ ଖେଳି 619 ୱିକେଟ, କପିଲ ଦେବ 131ଟି ଟେଷ୍ଟ ଖେଳି 343 ୱିକେଟ ଓ ହରଭଜନ ସିଂହ 103ଟି ଟେଷ୍ଟ ଖେଳି 417ଟି ୱିକେଟ ନେଇଛନ୍ତି।