ନୂଆଦିଲ୍ଲୀ: ପୂର୍ବତନ ଭାରତୀୟ କ୍ୟାପଟେନ ମହେନ୍ଦ୍ର ସିଂହ ଧୋନି ଆଗାମୀ ଟି-୨୦ ବିଶ୍ବକପ ପାଇଁ ଭାରତୀୟ ଟିମର ମେଣ୍ଟର ଚୟନ ହୋଇଛନ୍ତି । ଗତ ମାସ ମାସରେ ମେଗା ଇଭେଣ୍ଟ ପାଇଁ ସ୍କ୍ବାଡ ଘୋଷଣା ସମୟରେ BCCI ଏହି ନିଷ୍ପତ୍ତି ନେଇଥିଲା । ତେବେ ଏହି ଦାୟିତ୍ବ ତୁଲାଇବାକୁ ଧୋନି କୌଣସି ପାଉଣା ନେବାକୁ ମନା କରିଛନ୍ତି । ଏନେଇ ସ୍ପଷ୍ଟ କରିଛନ୍ତି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(BCCI) ସଭାପତି ସୌରଭ ଗାଙ୍ଗୁଲି । ୟୁଏଇ ଓ ଓମାନରେ ICC ପୁରୁଷ ଟି-୨୦ ବିଶ୍ବକପ ଅକ୍ଟୋବର ୧୭ରୁ ଆରମ୍ଭ ହେଉଛି ।
୪୦ ବର୍ଷୀୟ ଧୋନି ଅନ୍ତର୍ଜାତୀୟ କ୍ରିକେଟରରୁ ଗତବର୍ଷ ଅବସର ନେଇଥିଲେ । ୨୦୧୯ ବିଶ୍ବକପ ସେମିଫାନାଲ ମ୍ୟାଚ୍ ଭାରତ ପାଇଁ ତାଙ୍କର ଶେଷ ମ୍ୟାଚ୍ ଥିଲା । ଏହି ମ୍ୟାଚ୍ରେ ନ୍ୟୁଜିଲାଣ୍ଡ ଠାରୁ ଭାରତ ପରାସ୍ତ ହୋଇଥିଲା ।
ଉପସ୍ଥିତ ବୁଦ୍ଧି ଓ ଚତୁର ମ୍ୟାଚ୍ରଣନୀତି କୌଶଳ ସହିତ ହ୍ବାଇଟବଲ୍ କ୍ରିକେଟରେ ଅଭିଜ୍ଞତାର ଲାଭ ଉଠାଇବାକୁ ଧୋନିଙ୍କୁ ମେଣ୍ଟର ଭାବେ ଚୟନ କରାଯାଇଥିବା କୁହାଯାଉଛି । ଭାରତୀୟ କ୍ରିକେଟ ଇତିହାସରେ ଧୋନି ଅନ୍ୟତମ ସଫଳତମ କ୍ୟାପଟେନ ରହିଛନ୍ତି । ୱିକେଟକିପର ବ୍ୟାଟ୍ସମ୍ୟାନଙ୍କ ନେତୃତ୍ବରେ ଭାରତ, ଦକ୍ଷିଣ ଆଫ୍ରିକାରେ ଅନୁଷ୍ଠିତ ୨୦୦୭ ଟି-୨୦ ବିଶ୍ବକପ ଓ ଭାରତରେ ୨୦୧୧ ଦିନିକିଆ ବିଶ୍ବକପ ବିଜୟୀ ହୋଇଛି ।