ହାଇଦ୍ରାବାଦ: ରବିବାରଠୁ ଦକ୍ଷିଣ ଆଫ୍ରିକା ଜୋହାନ୍ସବର୍ଗ ଗ୍ରାଉଣ୍ଡରେ ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଆରମ୍ଭ ହେବ ଏକଦିବସୀୟ ଶୃଙ୍ଖଳା । ମ୍ୟାଚ ପୂର୍ବରୁ ଟିମ ଇଣ୍ଡିଆକୁ ଝଟକା । ଦିନିକିଆ ସିରିଜ ଖେଳିବେ ନାହିଁ ଷ୍ଟାର ପେସର ଦୀପକ ଚହର । ମେଡିକାଲ ଏମର୍ଜେନ୍ସି କାରଣରୁ ସେ ସିରିଜ ଖେଳିବନାହିଁ ବୋଲି ମନା କରିଦେଇଛନ୍ତି । ତାଙ୍କ ସ୍ଥାନରେ ଆକାଶ ଦୀପଙ୍କୁ ଦଳରେ ସ୍ଥାନ ଦେଇଛି ଚୟନ କମିଟି । ତାଙ୍କ ବାପାଙ୍କ ସ୍ବାସ୍ଥ୍ୟାବସ୍ଥା ଗୁରୁତର ଥିବାରୁ ସେ ଦଳରେ ଯୋଗ ଦେଇପାରିନାହାନ୍ତି । ମ୍ୟାଚର ଗୋଟିଏ ଦିନ ପୂର୍ବରୁ ସେ ଖେଳିବେ ନାହିଁ ବୋଲି କହିଛନ୍ତି । ଏହା ପୂର୍ବରୁ ବେଙ୍ଗାଲୁରୁରେ ଖେଳାଯାଇଥିବା ଅଷ୍ଟ୍ରେଲିଆ ବିପକ୍ଷ ପଞ୍ଚମ ତଥା ଶେଷ ଟି୨୦ ମ୍ୟାଚ୍ରେ ମଧ୍ୟ ସମାନ କାରଣରୁ ଖେଳି ପାରିନଥିଲେ ଚହର ।
ସେହିପରି ଆଗକୁ ଖେଳାଯିବାକୁ ଥିବା ଦୁଇଟି ଟେଷ୍ଟ ସିରିଜରୁ ବାଦ ପଡିଛନ୍ତି ମହମ୍ମଦ ଶାମି । ସେ ସମ୍ପୂର୍ଣ୍ଣ ଫିଟ ଅଛନ୍ତି ନା ନାହାନ୍ତି ସେନେଇ ବିସିସିଆଇ ମେଡିକାଲ୍ ଟିମ୍ ସ୍ପଷ୍ଟ କରିନାହିଁ । ସେଥି ପାଇଁ ଟେଷ୍ଟ ମ୍ୟାଚରୁ ସମ୍ପୂର୍ଣ୍ଣ ବାଦ ପଡିଛନ୍ତି ଶାମି । ତାଙ୍କ ସ୍ଥାନରେ କାହାକୁ ଦଳରେ ସାମିଲ କରାଯିବ ସେନେଇ କୌଣସି ସୂଚନା ହସ୍ତଗତ ହୋଇ ନାହିଁ । ଅନ୍ୟପଟେ ଶ୍ରେୟସ ଆୟର ଦିନିକିଆ ସିରିଜର ପ୍ରଥମ ମ୍ୟାଚ ଖେଳବେ । ଏହାପରେ ଟେଷ୍ଟ ସିରିଜ ପାଇଁ ପ୍ରସ୍ତୁତ ହେବେ । ସେ ଦ୍ବିତୀୟ ଓ ତୃତୀୟ ମ୍ୟାଚ ଖେଳିବେ ନାହିଁ । ଏନେଇ ଆଜି ବିସିସିଆଇ ପକ୍ଷରୁ ସୂଚନା ଦିଆଯାଇଛି ।
ଏହା ମଧ୍ୟ ପଢନ୍ତୁ- ରବିବାର ଭାରତ-ଦକ୍ଷିଣ ଆଫ୍ରିକା ପ୍ରଥମ ଦିନିକିଆ ମ୍ୟାଚ, ରାହୁଲ ବାହିନୀଙ୍କ ଜୋରଦାର ଅଭ୍ୟାସ