ମୁମ୍ବାଇ: ସମାନ ସେହି ଦୁଇ ଦଳ । ସେହି ମୈଦାନ । ସେବେ ବିଶ୍ବକପ 2011 ଟାଇଟଲ ଲଢେଇ ଥିଲା ଆଉ ଏହା 2023 ଲିଗ୍ ମ୍ୟାଚ୍ ଲଢେଇ । 12 ବର୍ଷ ପରେ ୱାଙ୍ଖଡେ ଷ୍ଚାଡିୟମରେ ମୁହାଁମୁହିଁ ହେବାକୁ ଯାଉଛନ୍ତି ଦୁଇଦଳ । ଆଇସିସି ଦିନିକିଆ ବିଶ୍ବକପ କ୍ରିକେଟ 2023ର 13ତମ ସଂସ୍କରଣରେ ଆଜି 33ତମ ଲିଗ ମ୍ୟାଚ ଖେଳାଯିବ । ମୁମ୍ବାଇର ୱାଙ୍ଖଡେ ଷ୍ଟାଡିୟମରେ ମୁହାଁମୁହିଁ ହେବେ ଭାରତ ଓ ଶ୍ରୀଲଙ୍କା । 2011 ବିଶ୍ବକପ ଫାଇନାଲରେ ଭାରତ ଶ୍ରୀଲଙ୍କାକୁ ହରାଇ 28 ବର୍ଷ ପରେ ବିଶ୍ବ ବିଜୟୀ ହୋଇଥିଲା । ଚଳିତ ସଂସ୍କରଣରେ ଭାରତ ତାର ସପ୍ତମ ଲିଗ୍ ମ୍ୟାଚରେ ଶ୍ରୀଲଙ୍କାକୁ ହରାଇବାକୁ ଲକ୍ଷ୍ୟ ରଖିଛି । ସେମି ଫାଇନାଲରୁ ଗୋଟିଏ ପାଦ ଦୂରରେ ଥିବା ରୋହିତ ସେନା ଶ୍ରୀଲଙ୍କା ବିପକ୍ଷ ବିଜୟସହ ସେମିରେ ସ୍ଥାନ ପକ୍କା କରିବାକୁ ପ୍ରୟାସ କରିବ । ସେହିପରି ଶ୍ରୀଲଙ୍କା ପାଇଁ ଏକପ୍ରକାର କର ବା ମର ପରିସ୍ଥିତି ସୃଷ୍ଟି ହୋଇଛି । ଦଳକୁ ସେମିରେ ପ୍ରବେଶ କରିବାକୁ ହେଲେ ଶେଷ 3ଟି ମ୍ୟାଚ୍ ଜିତିବାକୁ ହେବ । ତେଣୁ ଆଜି ଭାରତକୁ ହରାଇବା ପାଇଁ ସିଂହଳୀ ଦଳ ସବୁ ଶକ୍ତି ଖଟାଇବ ।
ଭାରତ 6ଟି ମ୍ୟାଚ ଖେଳି ସବୁଥିରେ ବାଜି ମାରିଛି । ଅଷ୍ଟ୍ରେଲିଆ, ନ୍ୟୁଜିଲାଣ୍ଡ, ଇଂଲଣ୍ଡ, ବାଂଲାଦେଶ, ଆଫଗାନିସ୍ତାନ ଓ ପାକିସ୍ତାନ କେହି ବି ରୋହିତ ସେନାକୁ ଅଟକାଇ ପାରିନାହାନ୍ତି । 12 ପଏଣ୍ଟ ସହ ଦଳ ଟେବୁଲ ଦ୍ବିତୀୟ ସ୍ଥାନରେ ରହିଛି । ଆଜି ଶ୍ରୀଲଙ୍କା ବିପକ୍ଷରେ ସପ୍ତମ ଲିଗ ମ୍ୟାଚ୍ ଖେଳିବ । 2011 ବିଶ୍ବକପ ଫାଇନାଲ ମ୍ୟାଚ୍ ପୁଣି ଥରେ ମନେପଡିଛି । ମହେନ୍ଦ୍ର ସିଂହ ଧୋନୀ ବିଶାଳ ବିଜୟୀ ଛକା ମାରି 28 ବର୍ଷ ପରେ ଭାରତକୁ ବିଶ୍ବକପ ଭେଟି ଦେଇଥିଲେ । ଆଜି 12 ବର୍ଷ ପରେ ପୁଣି ସେହି ୱାଙ୍ଖଡେ ଷ୍ଟାଡିୟମରେ ଦୁଇ ଦଳ ମୁହାଁମୁହିଁ ହେବାକୁ ଯାଉଛନ୍ତି । ଆଜି ଯଦି ଭାରତ ଜିତେ ତେବେ ସେମି ଫାଇନାଲ ଖେଳିବା ନିଶ୍ଚିନ୍ତ । ଚଳିତ ବର୍ଷର ଏସିଆ କପରେ ଭାରତ ଶ୍ରୀଲଙ୍କାକୁ ହରାଇ ଚମ୍ପିଆନ ହୋଇଥିଲା । ଆଜି ମଧ୍ୟ ଶ୍ରୀଲଙ୍କାକୁ ହରାଇ ସେମି ପଥ ପରଷ୍କାର କରିବ ରୋହିତ ସେନା । ଇଂଲଣ୍ଡ ବିପକ୍ଷରେ ଭାରତର ବ୍ୟାଟିଂ ବିପର୍ଯ୍ୟୟ ଦେଖିବାକୁ ମିଳିଥିଲା । ରୋହିତ, ସୂର୍ଯ୍ୟକୁମାର ଓ ରାହୁଲଙ୍କୁ ଛାଡିଦେଲେ ଅନ୍ୟ କେହି ସଫଳ ହୋଇନଥିଲେ । ଭାରତ ବଡ ସ୍କୋର ମଧ୍ୟ କରିନଥିଲା । ମାତ୍ର ବୋଲିଂରେ ଦମଦାର ପ୍ରଦର୍ଶନ ଦେଖିବାକୁ ମିଳିଥିଲା । ଇଂଲଣ୍ଡ ବିପକ୍ଷ ତ୍ରୁଟିକୁ ସୁଧାରି ଦଳକୁ ଆଜି ମୈଦାନକୁ ଓହ୍ଲାଇବାକୁ ହେବ । ଶ୍ରେୟାସ ଆୟରଙ୍କ ଫର୍ମକୁ ନେଇ ଦଳ ଚିନ୍ତାରେ ରହିଛି । ସେପଟେ ଆହତ ହାର୍ଦ୍ଦିକ ପାଣ୍ଡ୍ୟା ମଧ୍ୟ ଖେଳିବେ ନା ନାହିଁ ତାହା ନିଶ୍ଚିନ୍ତ ହୋଇନାହିଁ । ବୋଲିଂରେ ମହମ୍ମଦ ସାମି ପ୍ରତିପକ୍ଷଙ୍କ ପାଇଁ ଆତଙ୍କ ଖେଳାଇଛନ୍ତି ।
ଶ୍ରୀଲଙ୍କା ପାଇଁ କର ବା ମର ପରିସ୍ଥିତି ସୃଷ୍ଟି ହୋଇଛି । ଦଳ 6ଟି ମ୍ୟାଚରୁ 2ଟି ଜିତିଛି । ସେମି ଦୌଡରେ ରହିବାକୁ ହେଲେ ଦଳକୁ ଶେଷ 3ଟି ମ୍ୟାଚ୍ ଜିତିବାକୁ ହେବ । ତେଣୁ ଆଜି ଭାରତକୁ ହରାଇବା ପାଇଁ ସିଂହଳୀ ଦଳ ସବୁ ଶକ୍ତି ଖଟାଇବ । ସେପଟେ ଚଳିତ ଏସିଆ କପ୍ ପରାଜୟର ପ୍ରତିଶୋଧ ନେବାକୁ ଲକ୍ଷ୍ୟ ରଖିଛି କୁଶାଲ ମେଣ୍ଡିସ ବାହିନୀ । ଆହତ ସମସ୍ୟା ଦେଇ ଗତି କରୁଥିବା ଶ୍ରୀଲଙ୍କା ଆଜି ତାର ଶକ୍ତି ଓ ସମାର୍ଥ୍ୟର ପରୀକ୍ଷା ଦେବ ।