ଦୁବାଇ: ଆଜିଠୁ ICC ବିଶ୍ବକପର ସୁପର୍-12 ବା ଗ୍ରୁପ-A ପର୍ଯ୍ୟାୟ ଆରମ୍ଭ ହେବ । ଶୁକ୍ରବାର ପ୍ରଥମ ରାଉଣ୍ଡ ଶେଷ ହୋଇ ଥିବାବେଳେ ଆଜି ଠାରୁ ଆରମ୍ଭ ହେବ ଦ୍ବିତୀୟ ରାଉଣ୍ଡ । ଆଜିର ମ୍ୟାଚରେ 2ଟି ପ୍ରମୁଖ ମୁକାବିଲା ଦେଖିବାକୁ ମିଳିବ । ଅପରାହ୍ନ 3.30ରେ ଅଷ୍ଟ୍ରେଲିଆ-ଦକ୍ଷିଣ ଆଫ୍ରିକା ଏବଂ ସନ୍ଧ୍ୟା 7.30 ରେ ଇଂଲଣ୍ଡ-ୱେଷ୍ଟଇଣ୍ଡିଜ ମଧ୍ୟରେ ଗୁରୁତ୍ବପୂର୍ଣ୍ଣ ମ୍ୟାଚ ଖେଳାଯିବ ।
ତେବେ ପ୍ରଥମ ରାଉଣ୍ଡରେ ଦକ୍ଷିଣ ଆଫ୍ରିକାର ପଲା ଭାରି ରହିଛି । ଅଷ୍ଟ୍ରେଲିଆ ମଧ୍ୟ ସମ୍ମାନ ରଖିବା ଆଶାରେ ପଡିଆକୁ ଓହ୍ଲାଇବ । ତେଣୁ ଆଜି ଏକ ସଙ୍ଘର୍ଷପୂର୍ଣ୍ଣ ମ୍ୟାଚ ଦେଖିବାକୁ ମିଳିବ । ଅଭ୍ୟାସ ମ୍ୟାଚରେ ଆଫଗାନିସ୍ତାନ ଏବଂ ପାକିସ୍ତାନକୁ ହରାଇ ଦକ୍ଷିଣ ଆଫ୍ରିକା ମନୋବଳ ବୃଦ୍ଧି କରିଛି ।
ସେପଟେ ଅଷ୍ଟ୍ରେଲିଆ ଶେଷ 10 ଟି ମ୍ୟାଚ ମଧ୍ୟରୁ 8ଟି ରେ ପରାଜିତ ହୋଇଛି । ଅଭ୍ୟାସ ମ୍ୟାଚରେ ଦଳ ନ୍ୟୁଜଲାଣ୍ଡ ବିପକ୍ଷରେ ବିଜୟୀ ହୋଇଥିଲେ ମଧ୍ୟ ଭାରତ ଠାରୁ ଶୋଚନୀୟ ପରାଜୟ ବରଣ କରିଥିଲା ।
ସେହିପରି ଦ୍ବିତୀୟ ମୁକାବିଲାରେ ଡିଫେଣ୍ଡିଂ ଚାମ୍ପଅନ୍ ୱେଷ୍ଟଇଣ୍ଡିଜକୁ ଭେଟିବ ଇଂଲଣ୍ଡ । ରେକର୍ଡ ଦୃଷ୍ଟିରୁ ୱେଷ୍ଟଇଣ୍ଡିଜର ପଲା ଭାରି ରହିଛି । କିନ୍ତୁ ବର୍ତ୍ତମାନ ଦଳର ପ୍ରଦର୍ଶନ ନୈରାଶ୍ୟଜନକ ରହିଛି । ଅଭ୍ୟାସ ମ୍ୟାଚରେ ପାକିସ୍ତାନ ଏବଂ ଆଫଗାନିସ୍ତାନ ଠାରୁ ହାରିଛି ଦଳ । ସେପଟେ ଅଭ୍ୟାସ ମ୍ୟାଚରେ ଇଂଲଣ୍ଡ ସନ୍ତୁଳନ ରକ୍ଷା କରିଛି । ଭାରତ ଠାରୁ ପରାଜିତ ହୋଇଥିଲେ ମଧ୍ୟ ନ୍ୟୁଜଲାଣ୍ଡ ବିପକ୍ଷ ମ୍ୟାଚରେ ବିଜୟୀ ହୋଇଛି । ତେବେ ସବୁ ଦୃଷ୍ଟିରୁ ଆଜିଠୁ ବିଶ୍ବକପର ଅସଲ ଟକ୍କର ଆରମ୍ଭ ହେବ ବୋଲି କୁହାଯାଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
