ନୂଆଦିଲ୍ଲୀ: 2012ରେ ଇଂଲଣ୍ଡ ଠାରୁ ଘରୋଇ ସିରିଜରେ ହାରିବା ଗୌତମ ଗମ୍ଭୀର-ବିରେନ୍ଦ୍ର ସେହୱାଗଙ୍କ ଓପନିଙ୍ଗ ଯୋଡିର ଯୁଗ ଶେଷ ହୋଇଯାଇଥିଲା । ଏହା ପରବର୍ତ୍ତୀ ଅଷ୍ଟ୍ରେଲିଆ ବିପକ୍ଷ ସିରିଜରେ ଗମ୍ଭୀରଙ୍କୁ ଡ୍ରପ କରାଯାଇ ମୁରଲୀ ବିଜୟଙ୍କୁ ସେହୱାଗଙ୍କ ସହ ଓପନ କରିବାକୁ ସୁଯୋଗ ଦିଆଗଲା । ଅଷ୍ଟ୍ରେଲିଆ ବିପକ୍ଷ ସିରିଜର ପ୍ରଥମ ଦୁଇଟି ଟେଷ୍ଟ ମ୍ୟାଚରେ ଦୁଇଟି ଖରାପ ପ୍ରଦର୍ଶନ ପରେ ସେହୱାଗଙ୍କୁ ମଧ୍ୟ ବିଶ୍ରାମ ଦିଆଯାଇଥିଲା ଓ ତାଙ୍କ ସ୍ଥାନରେ ଦିଲ୍ଲୀର ଆଉ ଏକ ଓପନର ଶିଖର ଧୱନ ଆସିଥିଲେ ।
ମୋହାଲିରେ ଚାଲିଥିବା ତୃତୀୟ ଟେଷ୍ଟରେ ଧୱନ ଡେବ୍ୟୁ ମ୍ୟାଚରେ 187 ସ୍କୋର କରିଥିଲେ ଏବଂ ବିଜୟଙ୍କ ସହ 289 ରନ୍ର ଓପନିଂ ଷ୍ଟାଣ୍ଡ ସେୟାର କରିଥିଲେ । ବିଜୟ ଯିଏକି ସେହି ମ୍ୟାଚରେ 153 ରନ ସ୍କୋର କରିଥିଲେ ।
ଧୱନ ଓ ବିଜୟ କିଛି ସମୟ ଧରି ଭାରତର ଓପନିଂ ଯୋଡି ଭାବେ ଖେଳିଥିଲେ ଓ ସଫଳ ହୋଇଥିଲେ । ଏହାସହ ଉଭୟ ନିଜ ପାଇଁ ସାଉଁଟିଥିଲେ ଅନେକ ସ୍ମୃତି । ନିକଟରେ ଭାରତୀୟ ସ୍ପିନର ରବିଚନ୍ଦ୍ରନ ଅଶ୍ବିନଙ୍କ ସହ ତାଙ୍କ ଇନଷ୍ଟାଗ୍ରାମ ଲାଇଭ ସୋରେ ଧୱନ, ବିଜୟ ଓ ତାଙ୍କ ମଧ୍ୟରେ ଥିବା ଗଭୀର ବନ୍ଧୁତ୍ବ ବିଷୟରେ କହିଥିଲେ ।
‘‘ସେ ପଡ଼ିଆରେ ଏବଂ ବାହାରେ ଜଣେ ସୁନ୍ଦର ବ୍ୟକ୍ତିତ୍ବ । ମୁଁ ତାଙ୍କୁ ଅତି ନିକଟରୁ ଜାଣିଛି । ସେ ଏକ ସୁନ୍ଦର ହୃଦୟର ଅଧିକାରୀ । ପ୍ରତ୍ୟେକ ଜିନିଷ ପାଇଁ ସେ ଟିକିଏ ‘ଏହିପରି ନୁହେଁ, ସେପରି ନୁହେଁ’ । ମୁଁ ଜଣେ ‘ବିନ୍ଦାସ’ ଚରିତ୍ର,’’ ବୋଲି ମୁରଲିଙ୍କ ବିଷୟରେ ଶିଖର ଧୱନ କହିଛନ୍ତି।