ଶାରଜାହ: ଶନିବାର ମହିଳା ଟି-20 ରୋମାଞ୍ଚକର ମୁକାବିଲାରେ ଟ୍ରେଲବ୍ଳଜର୍ସକୁ 2 ରନରେ ହରାଇଛି ସୁପରନୋଭାସ । ଫଳରେ ଉଭୟ ଟିମ ଫାଇନାଲରେ ପ୍ରବେଶ କରିଛନ୍ତି । ସମସ୍ତ 3ଟି ଟିମ ଗୋଟିଏ ଲେଖାଏଁ ମ୍ୟାଚରେ ବିଜୟ ହାସଲ କରିଛନ୍ତି । ମାତ୍ର ଭେଲାସିଟି ତୁଳନାରେ ସୁପରନୋଭାସ ଓ ଟ୍ରେଲବ୍ଳଜର୍ସ ରନରେଟ ଆଧାରରେ ଆଗରେ ଥିବାରୁ ଫାଇନାଲକୁ ଉନ୍ନୀତ ହୋଇଛନ୍ତି । ଟ୍ରେଲବ୍ଳଜର୍ସକୁ ଓ ସୁପରନୋଭାସ ପୁନର୍ବାର ସୋମବାର ଫାଇନାଲ ମୁକାବିଲାରେ ମୁହାଁମୁହିଁ ହେବେ ।
ପ୍ରଥମେ ବ୍ୟାଟିଂ କରି ସୁପରନୋଭାସ 146 ରନ ସଂଗ୍ରହ କରିଥିଲା । ଦଳ ପକ୍ଷରୁ ଆଟାପଟ୍ଟୁ ସର୍ବାଧିକ 67 ରନର ଅର୍ଦ୍ଧଶତକୀୟ ଇଂନିସ ଖେଳିଥିଲେ । ଏହି ଇଂନିସରେ 5ଟି ଚୌକା ଓ 4ଟି ଛକା ସାମିଲ ରହିଛି । ପ୍ରିୟା ପୁନିଆ 37 ଓ କ୍ୟାପଟେନ ହରମନପ୍ରିତ କୌର 29 ବଲରୁ 31 ରନର ଇଂନିସ ଖେଳିଥିଲେ । ଜବାବରେ ଟ୍ରେଲବ୍ଳେଜର୍ସ ବିଜୟ ଠାରୁ 3ରନ ଦୂରରେ ରହିଯାଇଥିଲା ।