ଆଣ୍ଟିଗୁଆ: ଇଣ୍ଡିଜ ଗସ୍ତରେ ଭାରତୀୟ ମହିଳା କ୍ରିକେଟ ଟିମ୍ । 3ମ୍ୟାଚ ବିଶିଷ୍ଟ ଦିନିକିଆ ସିରିଜର ପ୍ରଥମ ମ୍ୟାଚରେ ଭାରତକୁ ପରାଜୟର ସାମ୍ନା କରିବାକୁ ପଡିଛି । ଭାରତୀୟ ମହିଳା ଦଳକୁ 1ରନ୍ରେ ପରାସ୍ତ କରିଛି କାରବାୟିନ ମହିଳା ଦଳ ।
ଏହି ରୋମାଞ୍ଚକର ମ୍ୟାଚରେ ଟିମ ଇଣ୍ଡିଆ 226ରନର ପିଛା କରି 224ରନ୍ରେ ଅଲ୍ଆଉଟ ହୋଇ ଯାଇଥିଲା ।
ପ୍ରଥମେ ଓ୍ବେଷ୍ଟଇଣ୍ଡିଜ ଟିମ ଟସ୍ ଜିତି ବ୍ୟାଟିଂ କରିଥିଲା । ନିର୍ଦ୍ଧାରିତ 50 ଓଭରରେ ଇଣ୍ଡିଜ ଦଳ 7 ଓ୍ବିକେଟ ବିନିମୟରେ 225ରନ ହାସଲ କରିଥିଲା । ଇଣ୍ଡିଜ ଦଳ ପକ୍ଷରୁ ଷ୍ଟେଫିନ ଟେଲର ସର୍ବାଧିକ 94ରନ ହାସଲ କରିଥିବାବେଳେ ନତାଶା ମ୍ୟାକଲିନ 51ରନ୍ କରିଥିଲେ । ତେବେ ଭାରତୀୟ ଦଳ ପକ୍ଷରୁ ସୀକ୍ଷା ପାଣ୍ଡେ ଓ ଦୀପ୍ତି ଶର୍ମା 2ଟି ଲେଖାଏଁ ଓ୍ବିକେଟ ନିଜ ନାଁରେ କରିଥିଲେ । ସେହିପରି ଝୁଲଣ ଗୋସ୍ବାମୀ, ଏକତା ଓ ପୁନମ ଗୋଟିଏ ଗୋଟିଏ ଲେଖାଏଁ ଓ୍ବିକେଟ ହାସଲ କରିଥିଲେ ।
ତେବେ ମିତାଲି ବାହିନୀ 226ରନ୍ର ବିଜୟଲକ୍ଷ୍ୟ ନେଇ ଗ୍ରାଉଣ୍ଡକୁ ଓହ୍ଲାଇଥିଲା । ଭାରତୀୟ ଦଳ ପକ୍ଷରୁ ସର୍ବାଧିକ 75(107ବଲ୍)ରନ ପ୍ରିୟା ପୁନିଆ ହାସଲ କରିଥିଲେ । ସେହିପରି ଜେମିମା 41(67ବଲ୍)ରନ କରିଥିଲେ । କାରବିୟାନ ମହିଳା ଦଳ ଟିମ ଇଣ୍ଡିଆକୁ 224ରନରେ ରୋକି ପ୍ରଥମ ଦିନିକିଆ ମ୍ୟାଚକୁ ନିଜ ନାଁରେ କରିଛି ।
ସୂଚନାଥାଉକି, 2ୟ ଦିନିକିଆ ମ୍ୟାଚ ନଭେମ୍ବର 3 ଓ 3ୟ ଦିନିକିଆ ମ୍ୟାଚ ନଭେମ୍ବର 6ରେ ଆଣ୍ଟିଗୁଆ ସ୍ଥିତ ଭିଭିଆନ ରିଚାର୍ଡସ ଷ୍ଟାଡିୟମରେ ଅନୁଷ୍ଠିତ ହେବ ।