ହାଇଦ୍ରାବାଦ: ଭାରତ-ଚୀନ ସୀମା ବିବାଦ ପାଇଁ ସାରା ଦେଶ ଏବେ ସରଗରମ । ଅନ୍ୟପଟେ କୋରୋନା କଟକଣା ପାଇଁ ସ୍ଥଗିତ ରହିଥିବା ଦେଶର ବିତ୍ତଶାଳୀ ଲିଗ ଆଇପିଏଲ ଆୟୋଜନ ନେଇ ସମ୍ଭାବନା ଦେଖା ଦେଇଛି । ତେବେ ଏହି ଧନୀ ଲିଗର ପ୍ରାୟୋଜକ ରହିଛି ଚୀନର ମୋବାଇଲ କମ୍ପନୀ ଭିଭୋ । ଯାହାକୁ ନେଇ ଏବେ ବେଶ ଚର୍ଚ୍ଚା ଜୋର ଧରିଛି ।
କାରଣ ଗଲୱାନ ଘଟିରେ ଦେଶର 20 ଯବାନ ଶହୀଦ ହେବା ପରେ ସାରା ଦେଶ ଚୀନ ସାମଗ୍ରୀକୁ ବ୍ୟାନ କରିବାକୁ ଯୋଜନା କରୁଛି । ମାତ୍ର ଆଜି ବିସିସିଆଇ କୋଷାଧକ୍ଷ୍ୟ ଅରୁଣ ଧୁମାଲ ମନ୍ତବ୍ୟ ଦେଇ କହିଛନ୍ତି ଚଳିତ ବର୍ଷ ଆଇପିଏଲର ପ୍ରାୟୋଜକ ଭିଭୋକୁ ବ୍ୟାନ କରିବା ନେଇ ଆମର କୌଣସି ଯୋଜନା ନାହିଁ ।
ସୂଚନାଥାଉ କି, ଚୀନ ମୋବାଇଲ ଟେକ୍ନୋଲୋଜି ସବୁଠାରୁ ଉନ୍ନତ ମାନର ଫୋନ ଭିଭୋ ଆଇପିଏଲ୍ ପାଇଁ ଟାଇଟଲ୍ ପ୍ରଯୋଜକ ରହିଛି । 2018ରୁ ପାଞ୍ଚ ବର୍ଷ ପାଇଁ 2,199 କୋଟି (ବାର୍ଷିକ 440 କୋଟି) ଟଙ୍କାରେ ଭିଭୋ ଆଇପିଏଲ ପ୍ରାୟୋଜନ ଭାର ନେଇଛି ।
ତେବେ ବିସିସିଆଇର କୋଷାଧ୍ୟକ୍ଷ ଅରୁଣ ଧୁମାଲ କହିଛନ୍ତି ଯେ, ‘‘ ବର୍ତ୍ତମାନ ସୁଦ୍ଧା ସେପରି କୌଣସି ଯୋଜନା ନାହିଁ । କାରଣ ଭିଭୋ ଆଇପିଏଲ ସ୍ପନସର କରିବା ଫଳରେ ଭାରତକୁ ବହୁତ ଲାଭ ହେଉଛି । ’’
“ଯେତେବେଳେ ଆମେ ଚୀନ କମ୍ପାନୀମାନଙ୍କୁ ଭାରତରେ ସେମାନଙ୍କ ଉତ୍ପାଦ ବିକ୍ରୟ କରିବାକୁ ଅନୁମତି ଦେଉଛୁ, ସେମାନେ ଭାରତୀୟ ଗ୍ରାହକଙ୍କଠାରୁ ଯାହା ଟଙ୍କା ନେଉଛନ୍ତି, ସେମାନେ ବ୍ରାଣ୍ଡର ପଦୋନ୍ନତି ଭାବରେ ବିସିସିଆଇକୁ ଏହାର ଏକ ଅଂଶ ଦେଉଛନ୍ତି । ବିସିସିଆଇ ସେହି ଟଙ୍କା ଉପରେ 42 ପ୍ରତିଶତ ଟିକସ ଭାରତ ସରକାରଙ୍କୁ ଦେଉଛି । ତେଣୁ ଏହା ଭାରତର ଅର୍ଥନିତୀକୁ ସାହାଯ୍ୟ କରୁଛି । ’’ ବୋଲି ଧୁମାଲ କହିଛନ୍ତି ।