ଲାହୋର: କ୍ରିକେଟର ଅନ୍ୟତମ ସଫଳ ଅଧିନାୟକ ମହେନ୍ଦ୍ର ସିଂହ ଧୋନି ଏହି କଥା ଉପରେ ଖୁବ କମ ଲୋକ ବୋଧହୁଏ ଅରାଜି ହେବେ । ଦକ୍ଷିଣ ଆଫ୍ରିକାରେ ଟି-20 ବିଶ୍ବକପର ପ୍ରଥମ ସଂସ୍କରଣ ଜିତିବା ପରେ ରାଞ୍ଚିର ଏହି ଷ୍ଟାର ଆଉ ପଛକୁ ଫେରି ଚାହିଁ ନାହାନ୍ତି ।
ଟି-୨୦ ବିଶ୍ବକପ ବିଜୟ ପରେ ଧୋନି 2011 ମସିହାରେ ବିଶ୍ବକପ ଏବଂ 2013 ଚାମ୍ପିଅନ୍ସ ଟ୍ରଫିରେ ମଧ୍ୟ ବିଜୟ ହାସଲ କରିଥିବା ଭାରତୀୟ ଟିମର ନେତୃତ୍ବ ନେଇଥିଲେ । କ୍ରୀଡା ଇତିହାସରେ ସେ ଏକମାତ୍ର ଅଧିନାୟକ ଯିଏକି ତିନିଟି ଆଇସିସି ଟ୍ରଫି ଜିତିଛନ୍ତି। ସୌରଭ ଗାଙ୍ଗୁଲିଙ୍କ ପରେ ଧୋନି ଭାରତୀୟ କ୍ରିକେଟର ବିକାଶରେ ବିଶେଷ ଭୂମିକା ଗ୍ରହଣ କରିଥିଲେ, ବିଶେଷ କରି ଟ୍ରଫି ଜିତିବା କ୍ଷେତ୍ରରେ।
ଅନେକ ଘଟଣା ଘଟିଛି ଯେତେବେଳେ ବିରୋଧୀ ଦଳ ଧୋନିଙ୍କ ଉପସ୍ଥିତ ବୁଦ୍ଧି ଏବଂ ଆଦର୍ଶ ବ୍ୟାଟିଂ ତଥା ୱିକେଟ କିପିଂ କୌଶଳକୁ ପ୍ରଶଂସା କରିଛନ୍ତି। ପାକିସ୍ତାନ ୱିକେଟ କିପର-ବ୍ୟାଟ୍ସମ୍ୟାନ୍ କାମ୍ରାନ ଆକମଲ ମଧ୍ୟ ଧୋନିଙ୍କୁ ପ୍ରଶଂସା କରିଛନ୍ତି ଏବଂ ତାଙ୍କୁ ଏହି ଖେଳର ଶ୍ରେଷ୍ଠ ଖେଳାଳି ଭାବରେ ନାମିତ କରିଛନ୍ତି। ଆକମଲ ଆହୁରି ମଧ୍ୟ କହିଛନ୍ତି ଯେ ପୂର୍ବତନ ଭାରତୀୟ ଅଧିନାୟକ ତାଙ୍କ କ୍ୟାରିୟରରେ କ୍ରମାଗତ ପ୍ରଦର୍ଶନ ପାଇଁ ଅନେକ ଶ୍ରେୟ ପାଇବାକୁ ଯୋଗ୍ୟ।
“ମୁଁ ଅନୁଭବ କରୁଛି ଯେ ସେ ହେଉଛନ୍ତି ଭାରତୀୟ ଦଳର ସର୍ବଶ୍ରେଷ୍ଠ ୱିକେଟ କିପର-ବ୍ୟାଟ୍ସମ୍ୟାନ ଯିଏ ଭାରତ ପାଇଁ ଅନେକ ସଫଳତା ହାସଲ କରିଛନ୍ତି, ଯାହା ଅବିଶ୍ବସନୀୟ। ଦିନିକିଆରେ 50ରୁ ଅଧିକ ଆଭରେଜ ରଖିବା ଏବଂ ମ୍ୟାଚ ବିଜୟୀ ଇନିଂସ ଖେଳିବା ପାଇଁ ସେ କ୍ରମାଗତ ଭାବରେ ପ୍ରଦର୍ଶନ କରିଛନ୍ତି,’’ ବୋଲି ଆକମଲ ୟୁଟ୍ୟୁବ୍ ସୋ କ୍ରିକଷ୍ଟରେ କହିଛନ୍ତି।